جەبار عەبدولڵا عەزیز
مێژوو شاهیدی ئەوەیە هەر لەو كاتەی سەرۆك بارزانی پەیوەندی بەشۆڕشی شاخەوە كردووە، تاكو ئیستا سەرچاوەی چارەسەری كێشەكان بووە، كاتێك كێشەیەك سەرهەڵدەدات لەناوخۆیی كوردستان و عێراق بەگشتی رۆڵگێڕانی ئەو كەسایەتییە زۆر بەڕوونی دیارە لەچارەسەركردنی، نموونەی زۆر زیندوومان هەن كەبارزانی بۆتە فریادرەسی ئەو كێشەو گرفتانەی كەزۆر قوڵ و چارەسەریان ئەستەم بووە، كاتێك رژێمی بەعسی فاشیزم رووخا دۆخێك لەعێراق سەری هەڵدا ئەمریكاش ئەو توانایەی نەبوو چارەسەریان بۆ بدۆزێتەوە، هەرچەند زۆر هەوڵیان دا ئەو بارگرژیە نەهێڵن و عێراقێكی فیدڕاڵی و دیموكراسی دروست بكەن بۆ هەموو پێكهاتەكان بەبێ جیاوازی، بەڵام بێ ئەنجام بوو. چەندان سیاسەت مەداریان هێنایە سەر گۆڕەپان بۆگێڕانەوەی شكۆ بۆ ئەو وڵاتە بەڵام بێ سود بوو، ناچاربوون لەرێگای پەیوەندیێكی تەلەفۆنی سەرۆك بارزانی بكەن بەرێنیشاندەری چارەسەرییەكان، ئەویش بێ گوێدانە مەرج و داخوازیەكانی بۆ گەلەكەی ئەوكارەی گرتە ئەستۆی خۆی بەس بۆ ئەوەی وڵاتی عێراق نەبێتە مەیدانی شەڕوو جەنگ و ئاژاوەگێڕی.
لەدەسپێكی ئەو كارە بارزانی هەستێكی نەتەوەی و نشتیمانی لەدڵی هەموو سەركردە عێراقیەكاندا چاندوو وردە وردە عێراق راستەڕێ بوویەوە، هەرچەندە دەستهەڵاتدارانی ئەو وڵاتە مێژویێكی باشیان نەبووە بەیەكەوە هەمیشە پلانگێڕان هەوڵی لەناوبردنی ئەو ماڵباتە، سەرەڕای ئەوەش سەرۆك بارزانی هەوڵی دروستكردنی ئاشتی و تەبایی داو ڕۆڵی گێڕانەوەی سەروەری دا بۆ گەلی عێراق و دورخستنەوەی لەململانێی تایفی، شیعە و سونە و كوردی كۆكردەوە لەسەر یەك مێز، هەر ئەمەش بووە هۆكاری یەكەمی دامەزراندنی حكوومەتێكی فیدڕاڵی و دیموكراسی، هەر لەدوای ئەو كۆبونەوەیە سیاسییەكان دەستیان خستە نیو دەستی یەكتری بۆ دروستكردنی عێراقێكی جیاواز و دابینكردنی مافی هاووڵاتیان، بۆماوەی یەك ساڵ یاسایێكی دانا بۆ سیاسییەكان كەهەر مانگێك كەسێك ببێتە سەرۆكی كاربەڕێخەری عێراق، تاكو دۆخەكە هێور دەبێتەوە ئینجا گەل لەڕێگای هەڵبژاردنەوە بەئازادانە ڕەئی خۆی بدات كێ ببێتە حوكمدار لەو وڵاتە”.
ئەو یاسا نوێیە بیرۆكەی بارزانی بوو كەخۆشی نەخستە ناو لیستی ئەو سیاسیانەی كە بۆماوەی مانگێك دەستهەڵاتی وڵاتیان پێبەخشرا، ئەوەش بووە جێگای سەرسوڕمان بۆ وڵاتانی جیهان و گەلی عێراق كەئیستاش وەڵامی ئەو پرسیارە لەلایان بارزانییەوە بەڕوونی نەدراوەتەوە، دواتر بەناچاری ناوی بارزانیان خستە ئەو لیستەوە كە كۆتا كەس بوو ببێتە سەرۆكی وڵات، ئەویش كەسێكی تری لەجێگای خۆی ڕاسپارد تاكو ئەو كارە تەواو بكات.
دوای تێپەڕبوونی چەندین كابینەی نوێ لەعێراق و سەرهەڵدانی گرژی و ئاڵۆزی لەنێوان حزبە سیاسیەكان لەپێناو وەرگرتنی كورسی دەستهەڵات و قبوڵ نەكردنی داواكاریەكانی یەكتری ناچار دەبوون لەدەرگای بارزانیان دەدا بۆ چارەسەركردن و دامەزراندنی كابینەیەكی نوێ، جگە لەو ئەركەی كە زۆر قوڕس بوو بۆ بارزانی كە چاودێری عێراقی درابویە دەستی ئەركی چارەسەری نێوخۆیش هەر لەئەستۆی ئەو بوو، هەر كێشەو گرفتێك بەرۆكی كوردستانی گرتبایە سیاسییەكان و حزبەكانی تر بەڕاشكاوانە دەیانوت چارەسەریەكەی لەدەست بارزانیدایە ئەو دەتوانێت ئەو ئاڵۆزیانە نەهێڵێت و بنەبڕیان بكات، دوور نەچین ئەو ناكۆكیانەی لەئیستادا بوونیان هەبوو لەناو خۆی هەرێمی كوردستان بارزانی لەڕێگای تەلەفۆنەوە توانی لەسەر یەك مێز كۆیان بكاتەوە و زەمینەی سازكرد بۆ دانیشتن و تێپەڕاندنی ئەو قەیرانانە.
