زاری كرمانجی-سۆران:
بەرپرسی راگەیاندن و جێگری بەرپرسی مەڵبەندی سۆرانی یەكێتی نیشتیمانی كوردستان، دڵخۆشن بە لێكنزیكبوونەوەی (پارتی و یەكێتی) دەشڵێن ” بوونی هەرناكۆییەك لە نێوان ئەم دوو حزبە لە بەرژەوەندی خەڵكی كوردستان نابێت و گرنگە بە گیانێكی برایانە ئەو حكومڕانییەی هەرێمی كوردستان هەیە بەڕێوەی ببەن.
عارف ماویلی، بەرپرسی راگەیاندنی مەڵبەندی سۆرانی یەكێتی نیشتیمانی كوردستان، بە زاری كرمانجی گووت: ” دڵخۆشین بەو لێك نزیكبوونەوەی جارێكی دیكەی یەكێتی نیشتیمانی كوردستان و پارتی دیموكراتی كوردستان، كە هاوپەیمانەكەی خۆمان پارتی بووە، بەتایبەتیش ئەو دانیشتنەی دوێنێی نێوان (قوباد تاڵەبانی و مەسرور بارزانی) سەرۆكی حكوومەتی هەرێمی كوردستان، بە دڵنیاییەوە خەڵكەكەش ئەوەی لە ئێمە دەوێت، لەبەر ئەوەی سەرجەم چین و توێژەكانی كوردستان خوازیارن یەكێتی و پارتی، هەماهەنگبن لە ئیدارەدانی حكوومەتی هەرێمی كوردستان، بەیەكەوە بەڕێوەی ببەن”.
بەرپرسی راگەیاندنی مەڵبەندی سۆرانی یەكێتی نیشتیمانی كوردستان، گووتیشی: ” بوونی هەرناكۆییەك لە نێوان ئەم دوو حزبە لە بەرژەوەندی خەڵكی كوردستان نابێت، گرنگە یەكێتی و پارتی، بە گیانێكی برایانە ئەو حكومڕانییەی هەرێمی كوردستان هەیە بەڕێوەی ببەن، بۆیە بەم نزیكبوونەوەی ئێستا، ئێمە وەك یەكێتی نیشتیمانی كوردستان، پیرۆزبایی لە لەم دانیشتنە دەكەین و پێی دڵخۆش بووینەو خەڵكیش دڵخۆشە پێی، تەمەناش دەكەین دانیشتنی زیاتر هەبێت لە داهاتوودا و ئیدارە دانێكی تەندروست بەڕێوەببەن لە هەرێمی كوردستاندا.
لای خۆیەوە هەڵۆ حەسەن، جێگری بەڕێوەبەری مەڵبەندی سۆرانی یەكێتی نیشتیمانی كوردستان، بە زاری كرمانجی راگەیاند: ” هەنگاونان بەرەو چارەسەركردنی كێشەكانی نێوان دوو هێزی سەرەكی كوردستان (یەكێتی و پارتی) جێگەی دڵخۆشیە، چونكە هەم قەوارەی هەرێمی كوردستان هەڕەشەی گەورەی لەسەرە، هەمیش دۆستەكانی ئەو هەرێمە ئەوروپاو ئەمریكاو UN ئامۆژگاریان بۆ كورد ئەوەیە كە ئەگەر یەكگرتوو نەبن چارەنوسێكی نادیار لەرێگای ئەو هەرێمەیە، بۆیە لێكنزیكبوونەوەی ئەم دوو پارتە بە گرنگ دەزانم”.
گووتیشی: ” ئەوەی سیاسەت بكا دەبێ راستەقینە بێت و چی بۆ نەتەوەكەی و گەیشتن بە ئامانجەكانی گەلەكەی باشە هەر دەبێت ئەوە بكات و باكی بەقسەو قسەلۆكی ئەوانە نەبێ كە هیچ بەر پرسیاریەتێكیان لەسەر شان نییەو باكیان بە لە بار بردنی دەسكەوتەكانی بەدەست هاتوو بەخوێنی هەزاران شەهیدو ئەنفال نییە، بەهیوام هەموو لایەك خزمەت بە ئایندەی نەتەوەو گەلەكەمان بكەین.
