وەزیری هەرێم بۆ پێكهاتەكان، نوێترین هەڵوێستی پێكهاتەكانی لەبارەی پرسی هەڵبژاردنەكان راگەیاند و گوتی، نابێت دەستوەردان لە مافی پێكهاتەكان بكرێت و هەڵبژاردنمان بۆ پێكهاتەكان بەیەك بازنە قبووڵە.
ئەمڕۆ یەكشەم حەوتی ئایار، ئایدن مەعرووف وەزیری هەرێم بۆ كاروباری پێكهاتەكان، لە كۆنگرەیەكی رۆژنامەوانیدا رای گەیاند، حكوومەتی هەرێمی كوردستان بەردەوام چاودێری مافی پێكهاتەكان بووە، بەڵام بەداخەوە كار بگاتە تۆماری داوای یاسایی دژی پێكهاتەكان، ئەوە مایەی نیگەرانیمانە.
زیاتر گوتی، دەبێ پێكهاتەكان مافەكانیان دەستەبەر بكرێت و هەڵبژاردن لە كاتی خۆیدا بكرێت، ئەگەر لایەنە سیاسییەكانیش كێشەیان هەیە لەسەر بابەتی هەڵبژاردن، ناكرێ بەسەر پێكهاتەكاندا بشكێتەوە.
روونی كردەوە، بۆ بابەتی هەڵبژاردن لەگەڵ یەك بازنەییدان و نابێ دەستوەردان لە مافی پێكهاتەكان بكرێت، پێویستە كورسی بۆ ئێزیدییەكانیش زیاد بكرێت.
لە بەشێكی قسەكانیدا تەواوی ئەو پێشنیارەی یەكێـتیی رەت كردەوە كە داوای كردووە كورسیی پێكهاتەكان بەپێی ناوچەكان دابەش بكرێت و گوتی، لەگەڵ ئەوە نین كورسییەكانی پێكهاتەكان بەپێی ناوچەكان دابەش بكرێن، چونكە ئەوە كاریگەریی نەرێنیی دەبێت لەسەر پێكهاتەكان و بۆ بەرژەوەندی سیاسی بەكار دەهێنرێن.
