بارزانی نەمر بڕوای بەوە هەبوو رۆژێك دێت كورد بە ئاواتەكانی دەگات
زاری كرمانجی- سۆران:
مەناف مراد بژیانی، پێشمەرگەی هەر دوو شۆڕشی ئەیلوول و گوڵان، لەم دیدارەدا لەگەڵ زاری كرمانجی دەڵێت: باوكم لە كۆماری كوردستان لە مەهاباد بەشدار بووە، جگە لەوەی باوكم هەڤاڵی بارزانی نەمر بوو بۆ یەكێتی سۆفیەت، هەروەها مامێكم لەگەڵ پسمامێكم لەگەڵ بارزانی نەمر چووبوونە یەكێتی سۆفیەت، كە ئەو كات تەمەنم تەنها 5 ساڵ بوو، لەگەڵ دایكم و برایەكی دیكە لە گوندەكەی خۆمان دەژیاین.
پێشمەرگەی هەر دوو شۆڕشی ئەیلوول و گوڵان، گوتیشی: لە ساڵی 1961 بوومەتە پێشمەرگە كە ئەو كات شۆڕشی ئەیلوول دەستی پێ كردبوو، كاتێك بارزانی نەمر لە ساڵی 1958 لە یەكێتی سۆفیەت گەڕایەوە هێشتا لەسەر گوندەكەمان بووین، كە گوندەكەمان دەكەوێتە مزووری باڵا لە سنووری قەزای مێرگەسۆر، بە پێیان چووین تا گەلی عەلی بەگ، پاشان بە ئۆتۆمبێل چووین بۆ هەولێر، كە ئەو كات شەمەندەفەڕ دەهاتە شارەكە، بارزانی نەمر و هەڤاڵانی بە شەمەندەفەر گەڕانەوە هەرێمی كوردستان، كاتێك باوكم و مام و خزمەكانمان گەڕانەوە زۆر خۆشحاڵ بووین و ئەو ڕۆژە وەكو ئەوە وابوو كە ئێستا لە دایك بوومە.
بژیانی، دەشڵێ: شۆڕشی ئەیلوول كە لە ساڵی 1961 دەستی پێكرد هەر لە گوندەكەمان بووین، بارزانی نەمریش لە گوندی بارزان بوو، بە دوای ئێمەدای نارد، ئێمەش چووین بۆ بارزان، عیسێ سوار، كە خەڵكی گوندی سێلكێ بوو نزیكەی 150 كەسی لەگەڵ خۆ لە عەشیرەتی مزووری باڵا برد و بەپێیان چووین، ئەو كات لە نزیك ئاكرێ سەربازانی رژێمی بەعس تا چیای پیرس هاتبوون، شەڕ دەستی پێكرد و توانیمان شكەستیان پێبهێنین و پاشەكشە بە دوژمن بكەین، بارزانی نەمریش هێزێكی زۆری لەگەڵ بوو ئەوانیش چوون بۆ دۆلی نەهلێ.
مەناف مراد بژیانی، پێشمەرگەی هەر دوو شۆڕشی ئەیلوول و گوڵان، ئاشكراشی كرد: لە بنەماڵەكەمان بەردەوام كەسی مێرخاس و قارەمان دروست بوونە، جاری وا هەبووە یەك كەسمان لە ماڵ نەماوە، تەنها ئافرەتەكان مابوون، بارزانی نەمر یەك هەنگاو چوو بێتە پێشەوە كەسێك لە بنەماڵەكەمان لەگەڵ بووە، هەتا ئەو كاتەی رێككەوتنی 11ی ئازار مۆر كرا، من لە زاویتە بووم.
پێشمەرگەی هەر دوو شۆڕشی ئەیلوول و گوڵان، ئەوەشی گوت: بارزانی نەمر بە ساڵان لەناو ئەشكەوت دەمایەوە، بارزانی نەمر، زۆرجار دەیگوت ئەگەر ناتانەوێت لەگەڵ من بێن یان ماڵ و منداڵەكانتان بەتەنهان بگەڕێنەوە لای خێزانەكانتان، كاتێك چووینە نێروە هەموو خەڵكی ناوچەكە هاوكاری بارزانی نەمر بوون و چەكیان هەڵگرت و دژی رژێمی بەعس وەستانەوە، چووینە بەرواری باڵا لەوێ ماوەیەكی زۆر ماینەوە ئەو كات من و برایەكەم بەناوی لەتیف منداڵ بووین، بارزانی بە بەرپرسەكەمانی گوت هەر شوێنێك چووبم ئەو ماڵە لەگەڵ من بووە، گوتی بۆ ئێوە هاتوونە هێشتا ئێوە منداڵن، ئێمەش پێمان گوت ئێمە رێبازی باوكمان بەرنادەین تۆ هەر شوێنێك بۆی بچی ئێمەش لەگەڵت دەبین، ئەو كات كەسێك هەبوو بەناوی رەمەزان كوڕِانی، بارزانی نەمر پێی گوت چاوتان زۆر لێ بێت و هەرچی پێویست بێت بۆ منداڵەكانی مراد دابین بكەن.
بژیانی، گوتیشی: زۆرجار بارزانی نەمرم بینیوە و ئەو بەردەوام باسی ئەوەی دەكرد رۆژێك دێت كورد بە ئاواتەكانی دەگات، بارزانییەكان روویان لە كام شوێن كردبایە دوژمن نەدەما و توشی شكەستێكی گەورە دەبوو، هەندێك جار بە مانگ نەدەگەڕاینەوە و نەمان دەزانی چی بەسەر ماڵ و منداڵەكانی ئێمە هاتووە، لەگەڵ بارزانی نەمر بەشداریمان لە دەیان داستان كردووە، دوای تێكچوونی شۆڕش لە ساڵی 1975 هەموو وڵاتانی ناوچەكە بوونە دوژمنی بارزانی نەمر، ئەو كات ئاوارەی ئێران بووین، لە گەلی زاویتە كە دەكەوێتە سنووری دهۆك بەپێیان چووین تا شاری شنۆی رۆژهەڵاتی كوردستان، كاتێك بارزانی نەمر لە ساڵی 1979 كۆچی دوایی كرد رۆژێكی زۆر ناخۆش بوو بۆ ئێمە و هەستمان بە نەخۆشییەكی زۆر كرد.
مەناف مراد بژیانی، پێشمەرگەی هەر دوو شۆڕشی ئەیلوول و گوڵان، زیاتر دەڵێ: كاتێك شۆڕشی گوڵان دەستی پێ كرد، من لە كارگەیەك لە ئێران كارم دەكرد، كە زانیمان دووبارە شۆڕش دەستی پێ كردووتەوە زۆر خۆشحاڵ بووین و دووبارە بووینەوە پێشمەرگە، ئەو كات ئیدریس بارزانی لەگەڵ پێشمەرگە بوو و خۆی لە پێشمەرگە جیا نەدەكردەوە، نان خواردن و جلوبەرگی وەكو پێشمەرگە بوو، بە دەیان جار هاتۆتە بارەگاكەمان و دەیگوت چ هەیە بخۆم، وێنەیەكی من لەگەڵ ئیدریس بارزانی هەیە كە بە كامێرای ئەوم لە شاری شنۆی رۆژهەڵاتی كوردستان گرت، زۆر حەزی لە خواردنی هێلكە بوو، كاتێك كە لە ساڵی 1987 كۆچی دوای كرد رۆژێكی زۆر ناخۆش بوو وامان دەزانی كە ئێدی دونیا بۆ ئێمە كۆتایی هاتووە، شوكر بۆ خوای گەورە ئەمڕۆ سەرۆك بارزانی درێژە پێدەری خەباتی ئەوانە و دەستكەوتەكانی ئەوانی پاراستووە، ناوی بارزان ناوێكی گەورەیە، هەموو دنیا لە بارزان دەترسێت، بۆیە تا لەسەر گۆی زەوی ژیان مابێت، ناوی بارزانی نەمر دەمێنێت.
