” چەندین سەرۆك شارەوانی گۆڕاون نەیانتوانیوە كێشەی نەخشەی 22 چارەسەر بكەن “
موڕشید برادۆستی – سۆران:
ماوەی چەندین ساڵە، هەزاران پارچە زەوی لە نەخشەی 22ی دێلیزیان لە سنووری ناحیەی دیانای سەر بە ئیدارەی سۆران دابەشكراون، بەڵام تا ئێستا خزمەت گوزاری سەرەتایی نەگەێندراوەتە ئەو نەخشەیە، بە گووتەی هاووڵاتییان و خاوەن نوسینگەكانی خانووبەرەش، یەكێكە لە پڕ كێشەترین نەخشە و زێدەڕۆی زۆری كراوەتەسەری، ناشی شارنەوە، بەهۆی زەویەكانی ئەو نەخشەیە، خەڵكێكی زۆر تووشی زەرەری ماددی، گرفتی یاسایی و كێشەی كۆمەڵایەتی هاتوون، چاوەڕوان دەكەن لایەنی پەیوەندی دار بەشێوەیەك لە شێوەكان كێشەكانیان چارەسەر بكات و خزمەتگواریش بگەینێتە ناوچەكە.
كێشە و گرفتی زەویەكانی نەخشەی 22 و چەند نەخشەیەكی دیكە، ئەوەندە گەورە بووە، چەندین سەرۆك شارەوانی لە سەرۆكایەتی شارەوانی سۆران بگۆڕدرێن، هێشتا نەیان توانیوە ئەو كێشەیە چارەسەر بكەن، بە گووتەی هاووڵاتییانیش، پارچە زەوی 200 مەتری لەو نەخشەیە هەیە، سێ كەس كڕیویانە و ئاگایان لەیەكتریش نییە، لە كاتێكدا خانووش لەسەری دروست كراوە!.
عەلی سەدیق خاوەنی نوسینگەی خانووبەرەی دێلیزیان، بە زاری كرمانجی گووت:” كاتێك نەخشەی 22 لە دێلیزیان دانرایە، هەڵەی شارەوانی تێدابووە، چونكە دۆخ و شوێنەكەیان لە نزیكەوە نەبینیوە و لای خۆیانەوە دیاناوە، چونكە پێش نەخشەكە دروست بكرێت بەشی زۆری زەویەكان خانوویان لەسەر دروست كرابوو، لە هەمان كات، زێدەڕۆیی كردنە سەر ئەو نەخشەیەش گرفتێكی دیكەیە.
زیاتر گووتی:” شارەوانی خۆی ئەو زەویانەی بە خەڵك داوە لە بەرامبەر قەرەبۆ كردنەوەی هاووڵاتییان لە شوێنێكی دیكە كە زەویان بەرپڕۆژەی حكومەت كەوتووە، بەڵام ئامادە نییە ئەو نەخشەیە چارەسەرێكی بۆ بدۆزێتەوە، ئەم زەویە چەندین كێشەی بۆ خەڵك دروست كردووە، لەوانە كێشەی یاسایی، كۆمەڵایەتی، دارایی، ئەمانە و چەندین كێشەی دیكە .
عەلی دێلزی، دووپاتی كردەوە، لەو زەویانەی نەشخەی 22، خاوەنی زەوی كشتووكاڵی واتە خاوەنی یەكەم، قەرەبۆی خۆی لە حكومەت لەبەرامبەر زەویەكە وەرگرتووە، بەڵام هەڵكەوتەی ناوچەكە وایە جیا لە زەوی، گردۆلكەشی بەسەرەوەیە، بۆیە هەڵساوە ئەو گردانەشی كە بەسە زەویەكە وەیە كڕین و فرۆشتینان پێوەكراوە، بە شێوەی تۆز و با فرۆشتوویانە، پارچە زەوی هەیە تاپۆی بەناوی كەسێكە، بە تۆز و با دوو كەسی دیكە كڕیویانە و كەسیش ئاگایان لێك نییە .
ئەو خاوەن نوسینگەی خانووبەرە، ئاشكراشی كرد:” نرخی زەویەكانی نەخشەی 22، لە 2500 دۆلار دەستپێدەكات تا 20 هەزار دۆلار، بەشی زۆریشییان تاپۆن شارەوانی نەیان توانیوە چارەسەری زەویەكانی نەخشەی 22 بكەن، ئەمەش بووەتە هۆی زەرەرمەندی سەدان خەڵك، چونكە جیا لە دروست بوونی كێشە و گرفتی زۆر، هاووڵاتی هەیە پارچە زەوی تاپۆی بە 30 وەرەقە كڕیوە، كاتێك دەفرۆشێت نزیكەی 1500 دۆلار خەرجی زەڕیبە دەبی بداتە حكومەت، ئەمەش زیانی زۆری پێدەگات، لە كاتێكدا هیچ خزمەت گوزاری لێ نیە و پارچە زەویەكانیش پڕ گرفت و كەم و كوڕین، ئەمەش لاوازی دەسەڵاتی شارەوانیە، چونكە ساڵانی پێشتر خۆی زەویەكانی دابەش كردووە و تاپۆشی پێداون، بەڵام ئامادە نییە پشتگیری بكات كێشەكان چارەسەر بكات .
بەوپێیەی زەویەكانی نەخشەی 22 تاپۆن، دەبێ ساڵانە زەڕیبە بداتە حكومەت، ئەمەش رەوا نییە زەڕیبە لەو نەخشەیە وەربگیرێت، چونكە خاوەن زەوی ناتوانێ بچێتە سەر زەوی خۆی یان بیكاتە خانوو، بەهۆی هەبوونی كێشەش ناچارە بە نرخێكی هەرزان بیفرۆشێت كە نیوەی پارەكەش بۆ زەڕیبە دەڕوات، بەڵام ئەگەر بێتوو زەویەكان كێشەیان نەبا و زەویەكە خزمەت گوزاری بۆ چووبا و كردبایە خانوو یان ئەوهابا، ئەوكات زەڕیبەی خۆشی دابا هیچ كێشە نەبوو.
عەبدولستار محەمەد، هاووڵاتییەكی ئیدارەی سۆرانە، دەڵێت:” چەند ساڵێكە پارچە زەویەكم لە نەخشەی 22ی دێلزیان بە 55 وەرەقە دۆلاری ئەمریكی كڕیووە، بە نیازی دروست كردنی خانوو بووم، بەڵام هیچ خزمەت گوزاری سەرەتایی بۆ نەچووە و كڕیاریش نییە تا بیفرۆشین، تووشی زەرەر و گرفتێكی زۆر هاتووین، زەویەكان مادام تاپۆی فەرمیان هەیە، پێویستە حكومەت رێگە چارەیەك بۆ ئەو زەویانە بدۆزێتەوە، یان خزمەت گوزاری بگینێتە ئەو شوێنانە یان زەریبەی زەویەكانمان لەسەر لاببات یاخود رێگەمان پێبدات بیكەینە خانوو.
فەتحی مەغدید یەكێكی دیكەیە لە نوسینگەكانی خانووبەرە لە سۆران، بە زاری كرمانجی گووت:” نەخشەی 22 دەكەوێتە سنووری گوندی دێلزیان تاكو گەڕەكی ئازادی دیانا هەزاران پارچە زەوی لەخۆ دەگرێت، كاتی خۆی بێ ئەوەی هەڵكەوتەی شوێنەكە ببیندرێت، راستەوخۆ نەخشەیان لەسەر جێگیر كرد، لە كاتێكدا لە نێو ئەو نەخشەیە چەندین خانوو كرابوون، ئەمەش گرفتی زۆری دروست كردووە .
زیاتر گووتی:” خانوو هەیە كاتی خۆی دروست كراوە و پێنج ژمارەی لەژێرە، واتە پارچە زەویەكە پێنج كەسی دیكە كڕیویانە و كەس ئاگایان لە كەس نییە، زێدەڕۆی زۆری لەسەر كراوە، خزمەت گوزاری هیچی بۆ نەچووە، پێویستە لیژنەیەكی بالا بۆ چارەسەر كردنی كێشەی نەخشەی 22 دروست بكرێت .
لای خۆشیەوە، سەلوا شۆڕۆ سەرۆكی شارەوانی قەزای ناوەندی سۆران، لەسەر پرسی نەخشەی 22، بە زاری كرمانجی راگەیاند:” ئاگادارین نەخشەی 22 سالانێكە كێشە و گرفتی هەیە، بەم هۆیەوە حكومەتیش نەیتوانیوە خزمەت گوزاری بگەینێتە شوێنەكە، ئەمەش بۆ كۆنی نەخشەكە دەگەڕێتەوە، پێویستی بە بەراستكردنەوەیە هەیە كە لە گەڵ دۆخی ئێستای هەڵكەوتەكە بگونجێت .
سەرۆك شارەوانی سۆران، لە دیمانەیەكی زاری كرمانجیدا، دووپاتی لەوەكردەوە:” تایبەت بۆ پرسی نەخشەی 22، هەڵگۆرد شێخ نەجیب سەرپەرشتیاری ئیدارەی سۆران لەسەر هێڵە و بەدڵنیاییەوە بەدواداچوونی تەواو بۆ دەكرێت لە ئایندەیەكی نزیكدا گرفتەكانی ئەو نەخشەیە چارەسەر دەكرێن و رێكخستنەوە بۆ كۆلان و گەڕەكەكانی دەكرێت، داوجار خزمەت گوزاریش دەگەینینە ئەو نەخشەیە”.
