محەمەدی حاجی مەحموود، سەرۆكی پارتی سۆسیال دیموكراتی كوردستان لە میانی چاوپێكەوتنێكیدا لەگەڵ ماڵپەڕێكی سلێمانی ئاشكرای كرد، لە دوای ئەنفالكردنی كوردستان لە لایەن ڕژێمی عێراق لە هەشتاكان، كۆماری ئیسلامیی ئێران مانگانە پارەی بۆ یەكێتی و حزبی سۆسیالیست بڕیوەتەوە. باسیشی لەوە كردووە كە ئێران ئازووخەشی پێ داون.
ئەوەشی دركاند كە لە ساڵی 2009دا هەریەك ئەو لەگەڵ هەریەك لە سەڵاحەدین محەمەد بەهائەدین (ئەمینداری گشتیی یەكگرتوو)، عەلی باپیر (سەرۆكی كۆمەڵ) و قادر عەزیز (ئێستا ئەندامی مەكتەبی سیاسیی یەكێتییە)، سەردانی كۆماری ئیسلامیی ئێرانیان كردووە و قاسم سولەیمانی، فەرماندەی فەیلەقی قودسی سەر بە سوپای پاسدارانی ئێرانیان بینیوە و داوای هاوكارییان لێ كردووە.
محەمەدی حاجی مەحموود ئەوەشی ئاشكرا كرد، قاسم سولەیمانی بەدەم داواكارییەكەیان هاتووە و بڕی ملیۆنێك دۆلاری بە هەریەك لە خۆی و سەڵاحەدین بەهائەدین و عەلی باپیر و قادر عەزیز داوە ”بۆ پاڵپشتیی هەڵبژاردن،“ چونكە ”ئەوكات بۆ هەڵبژاردنی پەرلەمانی كوردستان، لیستێكمان بە ناوی (لیستی خزمەتگوزاری و چاكسازی) هەبوو.“ گوتیشی: ”قاسم سولەیمانی نامەیەكی لە گیرفانی دەرهێنا و لێی نووسی و پێشیانی دام گوتی باشە؟ گوتم باشە، گوتی بۆ هەر چوارتانە. ئیتر نامەكەم دا بە عەلی باپیر و گوتم مامۆستا بەخوا ئێمە دوو جار داوا بكەین و نەماندەنێ، وازی لێ دەهێنین، ئیتر با ئەوە لای ئێوە بێت و باوەڕ ناكەم ئێوە وا بە ئاسانی وازی لێ بێنن، ئەوان پارەكەیان وەرگرت، ئیتر لە ملیۆنێك دۆلار كەمتر نەبوو.“
ئەمە لە كاتێكدایە كە پێشتریش لە چەند لاپەڕەیەكی كتێبی (بیرەوەریی پێشمەرگەیەك)ی محەمەدی حاجی مەحموود، ئەوە ئاشكرا كرابوو كە عەلی باپیر بڕی 250 هەزار دۆلاری لە جەلال تاڵەبانی، سكرتێری گشتیی پێشووی یەكێتیی نیشتمانیی كوردستان وەرگرتووە، ئەو پارەیەش لە چوارچێوەی ڕێككەوتننامەی تاران كە لە نێوان كۆمەڵ و یەكێتی بە سەرپەرشتیی ئێران واژۆ كراوە.
لەمبارەیەوە محەمەد حەكیم، گوتەبێژی فەرمیی كۆمەڵی دادگەری ڕوونكردنەوەیەكی بڵاو كردەوە و تێیدا جگە لەوەی سوپاسی پارتی سۆسیالست دیموكراتی كوردستانی كرد کە لە گواستنەوەی بنکە و بارەگاکانیان ھاوکاریان بوون، ئەوەی رەت كردەوە (بە یەك جار بڕی ٢٥٠ هەزار دۆلاری ئەمریكی)یان لە یەكێتی وەرگرتبێت.
هەر لەمبارەیەوە لە مانگی ئاداری 2022، محەمەد حەكیم، گوتەبێژی كۆمەڵی دادگەری دانی بەوەدا نا كە بەپێی رێكکەوتنی 1997ی تاران، مانگانە بڕی دوو ملیۆن دیناری چاپی سویسرییان لە یەکێتی وەرگرتووە و تەنانەت ئەو مانگەی ساڵی 2003ش كە بارەگاكانیان لە سنووری هەورامان و هەڵەبجە چۆڵ كردووە، پارەكەیان پێ دراوە. گوتەبێژەكەی كۆمەڵ دانیشی بەوەدا ناوە كە كۆماری ئیسلامیی ئێران چاودێریی جیبەجێكردنی ڕێككەوتننامەی (تاران)ی نێوان یەكێتی و كۆمەڵ بووە.
بەم شێوەیەش دەركەوت كە لە 1997ەوە تاوەكوو 2003، مانگانە كۆمەڵ بڕی دوو ملیۆن دیناری عێراقیی چاپی سویسریی لە یەكێتی وەرگرتووە كە سەرجەمی پارەكە لەو شەش ساڵەدا لانی كەم (144) ملیۆن دیناری سویسریی بووە كە بەرامبەر بووە بە دەیان ملیۆن دۆلاری ئەمریكی.
