بەڕێوەبەری ناحیەی بارزان: بە داخەوە نەمانتوانیوە سوود لە ئاوی زێی گەورە وەربگرین

مستەفا دۆلەمەری- بارزان:

لە دیدارێكی هەفتەنامەی زاری كرمانجیدا، بەشیر محیەدین بەڕێوەبەری ناحیەی بارزان، تیشك دەخاتە سەر كار و پلان و پڕۆژە خزمەتگوزارییەكان و بەرنامەی داهاتوویان بۆ زیاتر خزمەتكردنی ناوچەكە.
لە دەستپێكی قسەكانیدا، بەڕێوەبەری ناحیەی بارزان، دەڵێ:” سنووری ناحیەی بارزان پێك دێت لە ٤٦ گوند كە لە ئێستادا ٣٤ گوند ئاوەدانن و ١٠ گوندیش لە چوارچێوەی كۆمەڵگەی وڵاتژێری خەڵك تێیدا نیشتە جێن، بەهۆی شەری پەكەكە و توركیا گوندەكانی خۆیان چۆڵ كردوە و دوو گوندیش ئاوەدان نین، سنووری ناحیەی بارزان هاوسنوورە لەگەڵ ناحیەی شێلادزێی سەر بە قەزای ئامێدی و لە لای رۆژهەڵاتیش هاوسنوورە لەگەڵ ناحیەی گۆڕەتوو سەر بە قەزای مێرگەسۆر و رێژەی دانیشتوان لە سنووری ناحیەی بارزان نزیكەی ٣٠٠٠٠ كەس دەبێت.
لە بەشێكی دیكەی قسەكانیدا، بەڕێوەبەری ناحیەی بارزان، دووپاتی كردەوە، ساڵی رابردوو چەندین پڕۆژەی گرینگ لە سنوورەكەمان جێبەجێ كراون، وەك قیڕتاوكردنەوەی ڕێگای سەرەكی بارزان – سەڤرە و تێكەڵە ڕێژ كردنی هەدوو لای شەقامەكە بە درێژایی ١١ كم و٢٥٠ مەتر چاككردنەوەی قۆرتەكانی شەقامی سەرەكی ناو بارزان، هەروەها تێكەڵە ڕێژ كردنی كوڵانەكانی گۆندی بێكرێس و پرێسە، دروستكردنی چوار پۆل لە قوتابخانەی بنەڕەتی وڵاتژێری، تێكەڵە ڕێژ كردن و نوژەنكردنەوە و دارچاندنی گۆڕستانی شارۆچكەی بلێ، بەستنی ئینارەی كارەبا لە شارۆچكەی بلێ و بارزان و بازێ و شرێ و كۆمەڵگەی وڵاتژێری و نۆژەنكردنەوەی سێریانی بلێ، دروستكردنی ٢ جۆگەی ئاو لە گۆندی هەسنێ و بارزان.
سەبارەت بە بەرنامە و پلانیان بۆ ئەمساڵ، بەڕێوەبەری ناحیەی بارزان، ئاشكراشی كرد:” بۆ ئەم ساڵ بەرنامە و پلانی باشمان هەیە، وەك تەواو كردنی قیڕتاوی شەقامی سەرەكی بارزان- سەڤرە كە ٤ كم ماوە و نۆژەنكردنەوەی رێگەی بەری نزار، دروستكردنی ئاوەڕۆ بۆ شارۆچكەی بارزان و بلێ، دانانی چەند محاویلەیەك بۆ چارەسەری بارزۆری كارەبا لە سنوورەكەمان چەندین پڕۆژەی دیكەش لە پلان دان ئەگەر حكوومەت رەزامەندیان لەسەر بدات، ئەو پڕۆژانە سوودی زۆریان بۆ سنوورەكەمان دەبێت.
ناشی شارێتەوە، پڕۆژەی ئاوی بارزان لە سنوورەكەمان، یەكێكە لە پڕۆژە هەرە گرینگەكانی حكوومەتی هەرێمی كوردستان كە لە ٢٢-١-٢٠١٣ لە لایەن نێچیروان بارزانی بەردی بناغەی بۆ دانراوە و كارەكانیش بە شێوەیەكی باش بەڕێوەچوون تا ساڵی ٢٠١٩ و76% پرۆژەكە تەواو كرابوو، بەڵام ئەو كات بەهۆی هاتنی شەری داعش پڕۆژەكە وەستا، و دواتر بە هەوڵی مەلا مستەفا مەسعود بارزانی و سەرپەرشتیاری ئیدارەی سۆران و قایمقایمی قەزای مێرگەسۆر، توانرا لە ساڵی ٢٠٢٢ دەست بە پڕۆژەكە بكرێتەوە و ئێستاش لە قۆناغێكی زۆر باشدایە، توانیانە كۆمەڵگەی وڵاتژێری و گوندی هەمدلا و رەزیان، هەڤنكا، بیرا كەپرا، سەڤرە، تۆڕەكانی داخلی ناو گوندەكان تەواو بكەن و ئێستاش لە ریشە و هۆستان كاردەكەن و دەتوانم بڵێم،٩٠% كارەكان تەواو كراون، بە گشتی ئەو پڕۆژە گرینگیەكی زۆری هەیە و ئێمە هیوادارین لە ماوەیەكی نزیكدا تەواو بكرێت و بخرێتە خزمەت هاووڵاتییانی سنووری ناحیەی بارزان، كە كێشەی كەم ئاوی و تانكەری بە یەكجاری چارەسەر بكرێت.
بەشیر محیەدین، ئاماژەی بەوەشدا:” ناحیەی بارزان پێویستی بە فراوانكردنی شەقامەكان هەیە بە شێوەیەكی گشتی و دروستكردنی شەقامێكی جووت ساید لە رێزان بۆ نەخۆشخانەی گشتی بلێ، بۆ ئەوەی جەنجاڵی ناو شارۆچكەی بلێ كەمببێتەوە و دانانی وێستگەیەكی مۆبایلی كارەبا لە نێوان ڕەزیان – هەمدلا، بۆ بەرزكردنەوەی ڤۆڵتیەی كارەبا.
بەڕێوەبەری ناحیەی بارزان، ئەوەشی خستەڕوو:” سەبارەت بە گرفتی كارەبا هەڵساوین بە دەركردنی فیدەرێكی نوێ لە وێستگەی ٣٢ رێزان بۆ شارۆچكەی بلێ كە تەواوی شارۆچكەی بلێ پێكەوە دەبەستێتەوە، پڕۆژەكە لە قۆناغی جێبەجێ كردندایە و بەشی زۆری كارەكانی تەواو بوونە و لە ماوەیەكی زۆر نزیكدا دەكەوێتە خزمەت هاووڵاتییان، لەمەودووا هەموو كارەبای بلێ لە یەك فیدەر دەبێت، هەروەها دانانی دوو محاویلەی كارەبا لە ناو سەنتەری شارۆچكەی بلێ بۆ چارەسەری بارزۆری كارەبا و لە ماوەیەكی نزیكدا محاویلەیەكی كارەبا لە گوندی بارزان دەكەوێتە خزمەت هاووڵاتییان.
روونیشی دەكاتەوە، بە داخەوە تاوەكو ئێستا وەكو پێویست نەمانتوانیوە سوود لە ئاوی زێی گەورە وەربگرین بۆ دروستكردنی پرۆژەكانی كشتووكاڵ، بەڵام جێگەی خۆشحاڵیە هاووڵاتییان لە رێگەی پڕۆژەكانی كەرتی تایبەتەوە هەڵدەستن بە دروستكردنی چەندین كارگە یەكێك لەوانە كارگەی رامی فاڕمە كە دەكەوێتە سنووری ناحیەی بارزان، كارگەیەكی گەورەی ئاژەڵداریە بە مەبەستی دروستكردنی شیر و پەنیر، ماست، و لە ئێستادا بەشێكی زۆری خەڵك روویان كردۆتە چاندنی گەنمەشامی، وێنجە چوونكە خواستێكی زۆری لەسەرە بۆ دروستكردنی ئالیكی ئاژەڵداری .
بەشیر محیەدین بەڕێوەبەری ناحیەی بارزان، گوتیشی:” مەلا مستەفا مەسعود بارزانی، هەڵساوە بە دروستكردنی كارگەیەكی شیر بۆ ئەوەی دەرفەتی كار بۆ تاك بە تاكی سنووری قەزای مێرگەسۆر بڕەخسێنێت و خەڵك زیاتر گرنگی بە كاری ئاژەڵداری بدات و هاووڵاتییان بتوانن شیری ئاژەڵ و مانگاكانیان ساغ بكەنەوە و بیفرۆشن بەو كارگەیە و بۆ ئەو مەبەستەش چەند بنكەیەك لە تەواوی ناحیەكانی قەزای مێرگەسۆر دانراون، كارگەكە راستەوخۆ شیرەكە لە هاووڵاتییان دەكرێت و ئەمەش دەبێتە هاندەرێكی باش بۆ ئەوەی خەڵكی ناوچەكە روو لە ئاژەڵداری بكەن، بە ناوی تەواوی خەڵكی دەڤەرەكەمان سوپاسی مەلا مستەفا مەسعود بارزانی و سەرپەرشتیاری ئیدارەی سەبەخۆی سۆران و قایمقامی مێرگەسۆر دەكەین، كە لە بە ئەنجام گەیاندنی پرۆژەكان هاوكار و پاڵپشتمان بوونە”.