زاری كرمانجی – سۆران :
بەپێی نووسراوێك كە واژووی رێبەر ئەحمەد وەزیری ناوخۆی حكومەتی هەرێمی كوردستانی بەسەرەوەیە، چەند بڕیارێك لەبارەی تۆماركردنی ئۆتۆمبێل و ماتۆرسكیل دەركراوە و لەگەڵ ئەوەشدا مەرجەكانی سەلامەتیی و تۆماركردنی ئۆتۆمبێل و ماتۆرسكیلی هاوردەكراو، هەموار كراوەتەوە.
لە نووسراوەكەی وەزارەتی ناوخۆ داهاتووە:
پاڵپشت بەو دەسەڵاتەی پێمان دراوە لە یاسای وەزارەتی ناوخۆ ژماری 6ی ساڵی 2009 و دوا بەدوای ڕێنمایی ژمارە 7ی ساڵی 2021 و ئاماژە بە كۆنووسی كۆبوونەوەی نێوان ڕاوێژكاری یاسایی وەزارەتی ناوخۆ و بەڕێوەبەر و جێگری بەڕێوەبەری گشتیی گومرگ و كۆنووسی كۆبوونەوەی نێوان بەڕێوەبەری گشتیی دیوانی وەزارەتی ناوخۆ و بەڕێوەبەری گشتیی هاتوچۆ و بەڕێوەبەرایەتیی هاتوچۆ لە پارێزگاكانی هەولێر، سلێمانی، دهۆك، بڕیارمان دا بە دەرچواندنی ئەم ڕێنماییە:
ماددەی یەكەم:
یەكەم هەمواركردنەوەی بڕگەی یەكەم لە ماددەی 7 لە ڕێنمایی سەرەوە و بەم شێوەیەی خوارەوە دەخوێندرێتەوە:
ئۆتۆمبێلی بەكارهاتوو دەبێت ئەم كەموكوڕییانەی خوارەوەی نەبێت:
1 – ژێرئاوكەوتوو، سووتاو و بڕاوە نەبێت.
2 – شاسی بڕاوە نەبێت.
3 – توكمەی دەرگا، یان بانی بڕاوە نەبێت.
4 – گشت ئێرباگەكانی پێش تۆماركردن كار بكات.
دووەم: زیادكردنی خاڵەكانی (7 و 8 و 9 و 10) لە بڕگەی دووەم لە ماددەی 7 لە ڕێنمایی سەرەوە و بەم شیوەیەی خوارەوە:
7 – لە پارێزگا و ئیدارە سەربەخۆكان كۆمەڵگەی چاككردنەوەی ئۆتۆمبێل بە شێوەی هاوبەشی نێوان كەرتی گشتی و تایبەت بە پشتبەستن بە پاشكۆی (هـ) لە ڕێنمایی گرێبەستە حكوومییەكان ژمارە(2)ی ساڵی 2016 دروست دەكرێ و دەبەسترێتەوە بە بەرێوەبەری گشتی گومرك لە وەزارەتی دارایی و ئابووری.
8 – لیژنەیەكی هاوبەشی نێوان وەزارەتی ناوخۆ و دارایی و ئابووری لە چوارچێوەی ئیداری و تەكنیك ئەو كۆمەڵگەیه دادەڕێژن و بە بەیانێك بڵاو دەكرێتەوە.
9 – هەمان لیژنەی هاتوو لە خاڵی 8ی سەرەوە، هەڵسەنگاندن بۆ پڕۆژە پێشكەشكراوەكان دەكات و باشترین هەڵدەبژێرێ.
10 – جێبەجێكاری پڕۆژە بەلایەن كەم دەبێ رێژەی 20%ی داهات بداتە گەنجینەی حكوومەتی هەرێمی كوردستان.
ماددەی دووەم:
هەمواركردنەوەی ماددە 9 خاڵی 3 بەم شێوەیەی خوارەوە دەخوێندرێتەوە:
3 – بڕوانامەی (coc) بۆ ئۆتۆمبێلی بەكارهاتوو دەبێ لەو وڵاتەی كە لێی هاوردە كراوە بۆ هەرێمی كوردستان، یان لە خاڵە سنوورییەكانی بكرێت.
ماددەی سێیەم:
یەكەم: كار بە هیچ ڕێنمایی و بەیان و بڕیار و نووسراوێك ناكرێ دوای كەوتنەبەركاری ئەم ڕێنماییە.
دووەم: ئەم ڕێنماییە لە رۆژی دەرچوونی جێبەجێ دەكرێ و لە رۆژنامەی وەقایعی كوردستان بڵاو دەكرێتەوە.
