لیژنەی ئابووری: چاودێری چڕی بازاڕ دەكەین و سەرپێچیكاران بەتوندترین شێوە سزا دەدەین
زاری كرمانجی- سۆران:
ساڵانە لەگەڵ هاتنی مانگی رەمەزانی پیرۆز نرخی خۆراك و كاڵا لە بازاڕ بەرزدەبێتەوە، بەڵام لە رەمەزانی ئەمساڵ بەتایبەت لە ئیدارەی سۆران، نرخی كەلوپەل گۆڕانی بەسەردا نەهاتووە، بگرە هەرزانتریش بووە. لیژنەكانی ئابووری لە قەزا و ناحیەكان بەردەوام چاودێری بازاڕ دەكەن، هەر شوێنێك ببینن شت گران دەفرۆشێت، سزا دەدەن.
بەگۆتەی خاوەن ماركێت و دوكاندارەكانی ئیدارەی سۆران، لە مانگی رەمەزانی ئەمساڵ نرخی خۆراك بە بەراورد بەر لەم مانگە گۆڕانكارییەكی وای بەسەردا نەهاتووە، بگرە هەرزانتریش بووە، ئاماژە بۆ ئەوەش دەكەن، ئەگەر گۆڕانكاری لە نرخی كەلوپەل هەبێت، پەیوەندی بە گۆڕانكاری نرخی دۆلارەوە هەیە، ئەگەرنا بەشێوەیەكی گشتی نرخەكان جێگیر بوونە لە مانگی رەمەزاندا، تەنها ئەوەی كەمێك رووی لەبەرزبوونەوە كردووە، نرخی گۆشتی مریشك و گۆشتی سوورە، لەگەڵ سەوزە و میوە.
عەلی چاوگەیی، دوكاندارێكی بازاڕی سۆرانە، بە زاری كرمانجی گوت: لەم رەمەزانەدا نرخی كەلوپەلە خواردەمەنییەكان بە بەراورد بە پێش رەمەزان گۆڕانكاریان بەسەردا هاتووە و روویان لە دابەزین كردووە.
عەبدولباقی عزەدین، دەرچووی كۆلێژی ئابووری، بە زاری كرمانجی گوت: هۆكاری بەرزبوونەوەی نرخەكان پەیوەستە بە زیاتر دروستبوونی خواستی هاووڵاتییان، هەروەك ساڵانە لەكاتی هاتنی مانگی رەمەزان خواست زیاتر دەبێت، بەمەش زۆرجار بازرگان و خاوەن دوكان و فرۆشگاكان، بە دەرفەت دەزانن نرخی ئەو جۆرە شتانە بەرز بكەنەوە، لەگەڵ ئەوەشدا هەندێك جار گۆڕانكاری لە نرخی دراوەكان و سیستەمی بازرگانی جیهانی هۆكار دەبێت، كە گۆڕانكاری لە نرخی خۆراك و كاڵاكان بكرێت.
ئەو شارەزایەی بواری ئابووری ئاماژەی بەوەشدا: لە ئیدارەی شار و شارۆچكەكان و لێژنەكانی تایبەت بە كۆنتڕۆڵكردنی بازاڕ كاریگەری باشیان دەبێت، لەسەر رێگری كردن لەبەرزبوونەوەی نرخەكان و ساغكردنەوەی كاڵاو خۆراكەكان بە هاووڵاتییان، هەروەك دەبینین رۆژانە بەهۆی ئەو سەرپێچیانەوە كەسانێك رووبەڕووی لێپێچینەوەی یاسایی دەبنەوە.
مەنسوور محەمەد گەردی، لە راگەیاندنی قایمقامیەتی قەزای ناوەندی سۆران، بە زاری كرمانجی راگەیاند: رۆژانە لەلایەن لیژنەی ئابووری قایمقامیەتی قەزای ناوەندی سۆران، بە چاودێری راستەوخۆی قایمقام، سەردانی هەموو ئەو شوێنانە دەكرێت كە خواردن و خواردنەوەیان تێدا دەفرۆشرێن، لە پێناو رێگری كردن لە نرخی كاڵاو خۆراك و نەهێشتنی خواردەمەنی ماوەبەسەرچوو و نەشیاو.
ئاشكرای كرد: وەك لیژنەی ئابووری قایمقامیەتی قەزای ناوەندی سۆران، تەنها لەماوەی یەك مانگی رابردوو، لە بازاڕ و دوكان و ماركێتەكانی سنوورەكە، سەردانی زیاتر لە 105 شوێنمان كردووە، لە ماوەیەدا 17 پێبژاردن هەبووە، كە ئەمەش بەپێی شوێن جیاوازە، هەروەها 12 بەڵێنامەیان لێوەرگیراوە، ئەم بەڵێنامانەش بۆ ئەوەیە ئەگەر ئەم كارەیان دووبارە كردەوە سزا دەدرێن، لەگەڵ ئەوەی لەو ماوەیەدا دەست بەسەر كاڵاوخۆراكی ماوەبەسەرچوودا داگیراوە و كەسانێكیش بەهۆی پابەند نەبوون و سەرپێچیەوە رووبەڕووی سزا بوونەتەوە.
جومعە هەركی، ئەندامی لیژنەی ئابووری سۆران، بە زاری كرمانجی گوت: وەك لیژنەی ئابووری بەردەوام چاودێری بازاڕ دەكەین، بەهیچ شێوەیەك رێگە نادەین نرخی شتوومەك لە نرخی ئاسایی خۆی زیاتر بفرۆشرێت، هەر كاسبكار و دوكاندارێك بازاڕ قۆرخ بكات یان گران فرۆشی بكات، بە دڵنیاییەوە رووبەڕووی سزای توندیان دەكەینەوە.
لە بارەی بەرزبوونەوەی نرخی گۆشتیش، دەڵێت: یەكێك لە هۆكار سەرەكییەكانی بەرزبوونەوەی نرخی گۆشت، هەبوونی خواستی زۆرە لەسەر گۆشت، هەروەها بەرزی نرخی دۆلار و گرانی ئالیكی ئاژەڵ، هۆكارێكی دیكەیە، دەبێت هەموو گۆشتفرۆشانی سۆران پابەندبن بە رێنمایەكان و چیتر نرخی گۆشت جیاوازی نابێت و بەهەڕەمەكی بفرۆشرێت.
مامۆستا ئەحمەد عیسا، وتارخوێن و پێشنوێژ، رایگەیاند: مانگی ڕەمەزان مانگی خێر و خێراتە، مانگی ڕەحمەت و بەرەكەتە، پێویستە هەر هاووڵاتییەك لە بازاڕ، دڵی خەڵك خۆش بكات و بە هەرزانی كەلوپەل بفرۆشێت.
ئەو وتارخوێنە، روونیشیكردەوە: هەر كەسێك كەلوپەل ڕابگرێت، بۆ ئەوەی بەگرانی بفرۆشێتەوە، بەتایبەتی لە مانگی ڕەمەزانی پیرۆز ئەوە حەرامە و ئایینیی ئیسلام نەهی لەو كەسانە كردووە.
