“لە ئیدارەی سۆران گرنگە فڕۆكەیەكی ئاگر كوژێنەوە هەبێت”

پشتیوان كەریم – سۆران:

لە دیمانەیەكی تایبەتدا لەگەڵ زاری كرمانجی، كاروان میرئاودەلی، سەرۆكی رێكخراوی ئەكادیمای سەلامەتی كوردستان و راهێنەر و شارەزای دادی بەرگری شارستانی، باس لە پرسەكانی ئەكادیمیایی سەلامەتی دەكات، هەروەها رۆڵی رێكخراوی ئەكادیمیای سەلامەتی لە هەمبەر چۆنیەتی خۆپاراستن لە رووداوەكان و كۆنتڕۆڵكردنی رووداوەكان دەخاتەڕوو، هەروەها هۆكارەكانی زۆربوونی رووداوەكانی خنكان و سووتان، لەگەڵ تەواوی جۆرەكانی دیكە.
لە دەستپێكی قسەكانیدا، كاروان میرئاودەلی، سەرۆكی ئەكادیمایی سەلامەتی كوردستان، لەبارەی دامەزراندنی ئەكادیمیایی سەلامەتی لە هەرێمی كورستان و ئامانجەكانی، دەڵێت:” لە پاڵ ئەركی میری كە ئەركی پۆلیسی بەرگری شارستانییە، پێنج مانگ بەر لە ئێستا مۆڵەتی فەرمیمان وەرگرت بۆ رێكخراوی ئەكادیمیایی كوردستان، سێفتی ئەكادیمی و بارەگای سەرەكیمان لە هەولێرە، ئامانج لە دامەزراندنی ئەم رێكخراوە دوای ئەوە هات كە هەستمان كرد بە هەبوونی فەراغێكی زۆر لە كوردستان بۆ ئەم كارە، بۆیە هەوڵی دامەزراندماندا، لە رێكخراوەكەدا كەسی شارەزا و ئەزمووندار بوونیان هەیە، پلانی تایبەتیشمان هەیە بۆ مەشق و راهێنان و پێگەیاندنی تاك لەناو كۆمەڵگە و لەبارەی پرسەكانی راوێژكاری و سەلامەتی گشتی و دڵنیایدان بە هەر سێ لە كەرتەكانی (تایبەت، گشتی، هاوبەش) هەوڵیش دەدەین بۆ فراوانكردنی بازنەی كارمان، لە كۆی هەشت بەرێوەبەرایەتی هەوڵی كاركردن دەدەین وەك ئەكادیمیا ئەو كاروچاڵاكییانەی كە میری نەتوانێت ئەنجامی بدات وەك رێكخراوی ئەكادیمیایی سەلامەتی ئەنجامی دەدەین، هەروەها بە كاری خۆبەخشیمان پاڵپشتییەكی باش دەبین بۆ ئەوەی كۆمەڵگە تاڕادەیەكی باش هۆشیاری هەبێ لە هەمبەر رووداوە كارەساتە نەخوازراوەكان، بۆ چۆنیەتی رووبەرووبوونەوەی رووداو و كۆنترۆڵكردن و خۆپاراستن لە رووداوەكان، دەمانەوێت بە كردەوەی كۆرسی تایبەت و كۆمەكی میری بكەین بە جۆرێك لە جۆرەكان خەڵكی خۆبەخشن ناوی تۆمار بكات، هاوكات لە ماوەی كردنەوەی ئەم رێكخراوە، خەڵكێكی زۆر بەژداری دەكەن بۆیە ئەكادیمیایی سەلامەتی بۆ هەموو چین و توێژێكە دوای ئەوە ناسنامەی تایبەتی پێدەدرێت و خاوەنی بڕوانامە و بێ بڕوانەمەش دەتوانێت وەك خۆبەخش لەگەڵمان كار بكەن، لە دەستپێكی دامەزراندنی ئەم رێكخراوەش شەش خول و سمینار و وۆركشۆپمان ئەنجام داوە.
كاروان میرئاودەلی، راهێنەر و شارەزای بەرگری شارستانی، لە بارەی هۆكاری سووتانی ئۆتۆمبێل، ئاشكرای دەكات:” ساڵی پار ژمارەیەكی زۆری رووداوی سووتانی ئۆتۆمبێل بوونیان هەبوو كە زیاتر لە 100 ئۆتۆمێل بوون، بەڵام بەداخەوە ئەمساڵ رێژەكە زیاتر بووە، ئەمەش بەهۆی نەبوونی هۆشیاری شۆفێرە كە وایكردووە رووداوەكان زیاتر و زۆرتر ببن، هەروەها خراپی كواڵێتی بەنزین كە كارلێكی راستەوخۆی هەیە لە دروستبوونی رووداوی ئاگر و دەستكاریكردنی فول پەمپی ئۆتۆمبێلیش هۆكارە بۆیە هەندێك رێنمای بەرگری شارستانی هەن كە شۆفێران پابەند نابن بۆیە وا پێویست دەكات كە شۆفێر لەگەڵ وەرگرتنی ناسنامەی مۆلەتی شوفێری بۆ رۆژێكیش بێت خولێك ببینیێت لەسەر بابەتەكانی كۆنتڕۆڵكردنی ئۆتۆمبێَل لە كاتی شۆفێری كردندا”.
میرئاودەلی، ئەوەش دەخاتەڕوو:” بەداخەوە رووداوەكانی خنكان ساڵ بە ساڵ روو لە هەڵكشانن، یەكێك لە ئەركەكانی بەرگری شارستانی ئەوەیە كە فریاد رەس و رزگاركەری هاووڵاتییان بێت لە رووداوی خنكان، بەداخەوە تەنها ئەمساڵ لە سنووری پارێزگای هەولێر تەنها لە ماوەی دوو مانگی رابردوو 17 كەس خنكاون، كەواتە ئەمساڵیش رێژەی رووداوی خنكان یەكجار زۆرە هۆكاری رووداوەكانیش كۆمەڵێك هۆكارن یەكەمیان نەبوونی وشیاری تەندروستییە كە هەمیشە كارمان لەسەر ئەوەكردووە رێژەی رووداوەكان دابەزێنین و قەبارەی رووداوەكان بەرەو نزمی ببەین وشیاری دروست بكەین لە تاكی كوردی و بەرو رێگایەك ببەین لەرووی سەلامەتی و شارەزای و توانستی كەسی بڕوات لە پڕۆسەی كاركردن و شێوازی دڵنیایدان و چۆنیەتی رووبەرووبوونەوە، هەروەها وەڵام دانەوەی رووداوە كارەساتەكان لە ئاستێكی زۆر بەرزدا بێت، بۆیە پێمان وایە هۆكارەكان نەبوونی وشیارییە.
لە كۆتایی دیدارەكەدا لە بارەی رووداوی سووتانی دارستانەكان، كاروان میرئاودەلی، راهێنەر و شارەزای بەرگری شارستانی، روونیكردەوە:” ئاگر جۆری زۆرە و جیاوازن، بە گشتی ئاگری داخراو كراوە بوونی هەیە و ئاگرە كراوەكان دەچێتە لایەنی ئاگرە جەنگەڵەكان و ساڵانە لە سنووری ئیدارەی سۆران پێنج بۆ شەش رووداوی گەورە روودەدەن، هۆكارەكانیش بەهۆی پاشماوەی خەرمانی ناو جەنگەڵەكانە كە ساڵانە ئەم رووداوانە روودەدەن بە تایبەتی لە مانگی نۆ كە سووتانی پاشماوەی جەنگەڵەكانە زۆرێك لە هاووڵاتییان بە دەستی ئەنقەست دارستانەكان دەسووتێنن بە هۆكاری هێنانی دار، هەروەها جۆری ئاگری ماڵەكان كە ئاگری زیرەك و تەمبەڵیان هەیە، بەڵام بۆ ئەو ئاگرانەی كە پێویستمان بە فرۆكە دەبێت ئەو ئاگرانەن كە ناوچەكان سەختن گواستنەوەی هاووڵاتی و چوونی تیم بۆ شوێنەكان سەختن لە ئێستادا سنووی پارێزگای هەولێر هەشت فڕۆكەی ئاگر كوژێنەوەی هەیە، چواریان تایبەت كراون بۆ بەرگری شارستانی و سوودێكی زۆریان لێ بینیوە، بۆیە بەهۆی هەڵكەوتەی جوگرافیای سنووری ئیدارەی سۆران زۆر گرنگە كە فڕۆكەیەكی ئاگر كوژێنەوە لە ناوچەكە هەبێت بۆ رووداوی ئاگری گەورە لە چیاكانی ئیدارەی سۆران”.