بە ئیدارەبوونی سۆران قەزا و ناحیەكانی سنوورەكەی ئاوەدانتر كردۆتەوە

محەمەد هەسنانی- سۆران:
لە یەك ساڵی رابردوودا ئیدارەی سۆران پێشكەوتنێكی باشی بەخۆیەوە بینیوە، بەرپرسانی شارەكەش دەڵێن، لە داهاتوودا بە دەیان پڕۆژەی گرنگ و ستراتیژی لە ناوچەكە جێبەجێ دەكرێن و سنوورەكە زیاتر پێش دەكەوێت.
وەكو هاووڵاتییانی شار و شارۆچكەكانی ئیدارەی سەربەخۆی سۆران، بۆ زاری كرمانجی باسی لێوەدەكەن، ئەگەرچی ئیدارەی سەربەخۆی سۆران نوێیە و تازە ساڵێكە دەست بەكاربووە، كەچی قۆناغ بە قۆناغ كار و پڕۆژەكانی بەدیار دەكەون، دەشڵێن، ئومێد و هیوای زۆرمان بە پێشوەچوونەكانی ئەم ئیدارە هەیە، سەرەڕایی ئەو كەم و كوڕیانەی لە رووی میلاكاتەوە لە خودی ئیدارە هەیە، كەچی توانراوە بەو ستافە كەمەو بە هەماهەنگی دام و دەزگا پەیوەندیدارەكانی قەزا و ناحییەكان، بەپێی ئەو بودجەی لەبەردەستدایە خزمەتگوزاری جیا جیا لە بوارە جیاوازەكان پێشكەش بكرێت”.
رابەر ئەنوەر، هاووڵاتییەكی ئیدارەی سۆرانە، بە زاری كرمانجی راگەیاند:” ساڵێك لەمەوبەر سەرۆكی حكوومەتی هەرێمی كوردستان، بە راگەیاندنی ئیدارەی سەربەخۆی سۆران، خەڵكی دەڤەرەكەی دڵخۆش كرد و دەسكەوتێكی باش و زێڕین بوو لە كابینەی نۆیەمی حكوومەت بۆ ناوچەكە، هەروەها پاداشتێكیش بوو بۆ ئەو هەموو شەهید و قوربانی و دەربەدەری خەڵكی ناوچەكە، كە لە پێناو شۆڕش و كوردایەتی داویانە، لەگەڵ ئەوەشدا دەڤەری سۆران ناوەندێكی گرنگە بۆ پێكەوەژیانی سەرجەم نەتەوە و ئاین و ئاینزاكانە، بەمەش بڕیارێكی گرنگ و پێویست بوو”.
گووتیشی:” لەماوەی دەستبەكاربوونی ئیدارەی سەربەخۆی سۆران، وەك تێبینی كرابێت سەرەڕای كەمی میلاكات و هەندێك كێشە و گرفت لەم رووەوە، كەچی كۆڵیان نەداوە و بە هەماهەنگی ئیدارەی قەزاو ناحیەكانی دەڤەرەكە توانراوە بەپێی توانا پڕۆژە خزمەتگوزارییەكان پێشكەش بە هاووڵاتییان بكرێن، ئاسۆیەكی روونتر و گەشتریش هەیە و خەڵكی دەڤەرەكە خواست و تمووحی زیاتریان هەیە، هیوادارین لە ئایندەدا خزمەتگوزارییەكان لە بوارە جیاجیاكان زیاتر بكرێن و ئاوڕی زیاتر لە دەڤەرەكە بدرێتەوە”.
مەغدید عەریف ئەحمەد، قایمقامی قەزای ناوەندی سۆران، بە زاری كرمانجی گوت:” خەڵكی سنووری قەزا و ناحیەكانی ئیدارەی سەربەخۆی سۆران، لە سەردەمی رژێمە یەك لەدوایەكەكان شەهید و قوربانی زۆریان داوە و لە پێناو كوردایەتی تووشی دەربەدەری و ماڵوێرانی بوونەتەوە، ئەوەی جێگەی خۆشحاڵی بوو وەك پاداشتێك بۆ خەڵكی دەڤەركە ساڵێك لەمەوبەر لەلایەن مەسرور بارزانی، سەرۆكی حكوومەتی هەرێمی كوردستان، ئیدارەی سەربەخۆی سۆران راگەیەندرا، ئەمەش دەسكەوتێكی زێڕین بوو.
قایمقامی قەزای ناوەندی سۆران، گووتیشی:” ئیدارەی سەربەخۆی سۆران لە دوو لایەنی گرنگ خۆی دەبینێتەوە، یەكەم لە رووی كارگێڕی و نەهێشتنی رۆتینیات، كە راستەوخۆ دەستەڵاتی بەڕێوەبەرایەتییەكان فراوان بكرێت و لە بری سەنتەری پارێزگا ئیش و كارەكان لە ئیدارەی سەربەخۆی سۆران بۆیان رای دەكرێن، دووەم، لەرووی پێشكەشكردنی خزمەتگوزاری راستەوخۆ لە ئیدارەی سەربەخۆی سۆران، بوددجە بۆ پڕۆژەكان تەرخان بكرێت، ئەمەش هۆكارێك بووە كە پڕۆژەی زۆری خزمەتگوزاری لە بوارە جیاجیاكاندا لە سەنتەری شارو شارۆچكە و گوندەكان جێبەجێ بكرێن، هەروەها زیاتریش گەشبینین و ئاسۆیەكی روونترمان لە بەردەم دایە.
غەفوور ئەحمەد، قایمقامی قەزای مێرگەسۆر، بە زاری كرمانجی راگەیاند:” بە ئیدارەبوونی سۆران، گرنگیەكی زۆری هەبوو نەك تەنها بۆ مێرگەسۆر، بەڵكو بۆ هەر چوار قەزا بۆ راپەڕاندنی كارەكان، ئەوەش دیاریەكی گرنگی سەرۆكی حكوومەتی هەرێمی كوردستان بوو.
قایمقامی قەزای مێرگەسۆر، گوتیشی:” لەو ماوەیەدا مێرگەسۆر بووژانەوەیەكی زۆری بەخۆیەوە بینیوە لە رووی خزمەتگوزاریەوە دەست نیشانكردنی بودجەیەكی تایبەت بۆ قەزای مێرگەسۆر وای كرد كە چەندین پڕۆژە لە سنوورەكە جێبەجێ بكرێن”.