سەرۆكی شارەوانی سیدەكان : “بە ئیدارە كردنی سۆران، سیدەكانی بردە قۆناغێكی نوێی ئاوەدانی “
موڕشید برادۆستی – سیدەكان:
ئەمڕۆ چوارشەممە، ساڵێك بەسەر تەمەنی ئیدارەی سەربەخۆی سۆران تێدەپەڕێت، بەرپرسانی حكوومی و چین و توێژەكان لە زاری كرمانجی بۆچوونی خۆیان دەخەنەڕوو.
عەبدولقادر ئەكڕەم سەرۆكی شارەوانی سیدەكان، بە زاری كرمانجی راگەیاند:” یەكێك لە بڕیارە هەرە گرنگ و پێویستییەكانی كابینەی نۆیەمی حكوومەتی هەرێمی كوردستان، بە ئیدارە كردنی سۆران بوو، لە ئیش و كارەكانمان وەك سەرۆكایەتی شارەوانی سیدەكان، ئاسانكارییەكی یەكجار زۆرمان بۆ دروست بووە .
سەرۆكی شارەوانی سیدەكان، دەڵێت:” تایبەت بە پڕۆژە خزمەت گوزاریەكانیش، جیاوازی زۆری هەیە، لە گەڵ بوون بە ئیدارەی سۆران گرنگی زیاتر بە سیدەكان دراوە و چووەتە قۆناغێكی دیكەی ئاوەدانی، ئەمڕۆ بەردی بناغەی قیڕ كردنی رێگەی دۆڵی زەرزێ دانرا كە یەكێك لە گەورەترین پڕۆژەی رێگە و بان لە سیدەكان و لە داهاتووش پلانی ئیدارەی سۆران وایە گرنگی زیاتر بە رێگە و بانی گوندەكان و كۆڵانەكانی سەنتەری ناحیە بدرێت، هیوای سەركەوتن بۆ ئەو ئیدارەیە دەخوازین و داوا دەكەین گرنگی بە تەواوی كەرتەكان بدرێت”.
ساڵێك بەر لە ئێستا، لە رۆژێكی وەك ئەمڕۆدا، لە 14ی ئەیلوولی 2021، مەسرور بارزانی سەرۆكی حكوومەتی هەرێمی كوردستان، سۆرانی بە فەرمی وەك ئیدارەی سەربەخۆ راگەیاند و هەڵگۆرد شێخ نەجیب وەك سەرپەرشتیاری ئیدارە دیاری كرد .
