بەرێوبەری ناحیەی گۆرەتوو :”لەو كاتەی سۆران بۆتە ئیدارەی سەربەخۆ، پرۆژەی زۆر گرینگمان ئەنجامداوە”
مستەفا دۆلەمەری- زاری كرمانجی :
رێكەوتی 14 ـ 9 ـ 2021 لە مەراسیمێكدا لە قەزای سۆران بە ئامادەبوونی سەرۆكی حكوومەتی هەرێمی كوردستان، مەسرور بارزانی ئیدارەی سەربەخۆی سۆران راگەیەندرا و هەڵگورد شێخ نەجیب كە ئەو كات قایمقامی قەزای سۆران بوو وەك سەرپەرشتیاری ئیدارەی سەربەخۆی سۆران دیاركرا و لەلایەن سەرۆكی حكومەتەوە نامەی دەستبەكاربوونی پێ بەخشرا.
ئەمڕۆ ساڵێك تێپەڕ دەبێ بەسەر راگەیاندنی ئیدارەی سەربەخۆی سۆران، زاری كرمانجی وەك پیشەیی هەمیشەیی خۆی، رەیی تەواوی بەرپرسان و بەرێوەبەرانی فەرمانگە حكومییەكان و بەشێك لە دانیشتووانی سنووری ئیدارەكە وەردەگرێ لەسەر دەستكەوت و شێوازی كاركردن و داواكارییان لە ماوەی ساڵێكی تەمەنی.
فتاح شوكری بەرێوبەری ناحیەی گۆرەتوو بە زاری كرمانجی راگەیاند:” بوونی سۆران بە ئیدارەی سەربەخۆ، گرینگییەكی زۆری بۆ ئێمە هەبوو، چونكە پێشتر زۆربەی بەرێوبەرایەتیەكان لە دەرەوەی سۆران بوون، ئەمەش بۆ خەڵكی ناوچەكە كێشەبوو، نەیان دەتوانی سەردانی هەولێر بكەن بە هۆی دووری رێگاوە، بەڵام ئێستا كە سۆران بووە بە ئیدارەی سەربەخۆ كار ئاسانیەكی زۆر بۆ خەڵكی دەڤەرەكە كراوە، بۆ نموونە بوونی بەرێوبەرایەتی هاتووچۆ لە سۆران ئاسانكارییەكی زۆری بۆ هاووڵاتییان كردووە”،
گوتیشی:” چەندین پرۆژەی گرینگمان ئەنجامداوە لەو كاتەی سۆران بۆتە ئیدارەی سەربەخۆ، پرۆژەی رێگەی سەرەكی گوندی سەكۆ نۆژەنكراوەتەوەو درێژكردنەوەی تۆڕی ئاوی شێخان و چەندین پرۆژەی تر دەرخستەیان بۆ كراوە، تەنیا جێبەجێكردنیان ماوە، وەكو دروستكردنی دیواری پاڵپشت لە ناوەندی جادەی ناحیەی گۆرەتوو و قیرتاوكردنی ناو كۆلانی گوندی بنێبیا و دروستكردنی حەوزی ئاوی 200 هەزار لیتر ئاو بۆ گوندی لێرەبیر و دابینكردنی ئینارە روناككەرەوە بۆ رێگای سەرەكی ناحیەی گۆرەتوو”.
