هادی بالەیی
چاوەڕوانی خەڵك و حكومەت لە یەكێتی ئەوە بوو، بەتایبەت دوای خیانەتی شومی 16ـی ئۆكتۆبەری 2017 و هەوڵدانیان بۆ جیابوونەوەی سلێمانی لە هەرێمی كوردستان و رووداوەكانی 8ـی تەمووز، بەخۆیدا بچێتەوەو واز لە سیاسەتی چەوت و دزی و فزی و خۆسەپێنی و دەست تێكهەڵكردن لە گەڵ ئەو وڵات و ئەو حزب و ملیشیای دژ بە گەل و قەوارەی هەرێمی كوردستان بهێنێت و پشتی خەڵك و حكوومەتەكەی خۆی بگرێ، هەر وەك چۆن پارتی پشتی گەل و حكوومەتی گرتووە بۆ سەرخستنی بەرنامەكەی، شەوو ڕۆژی خستۆتە سەریەك بۆ پاراستنی ئەزمون و دەستكەوتەكانی هەرێمی كوردستان و بەهێزكردنی كابینەی نۆیەمی حكوومەتەكەمان لە پێناو سەقامگیری سیاسی و ئاسایش و خزمەتكردنی هاوەڵاتیانی هەرێمی كوردستان.
گومان لەوەدا نیە، هەڵسوكەوتی ناسیاسی و كارەنەشیاوەكانی یەكێتی كاریگەریی نەرێنیی لە سەر خودی نێوەخۆی خۆیان و دەنگەكانیشیان بووەو زیاتریش دەیبێت، ئەگەر واز لەو سیاسەتە غەڵەتە نەهێنێت و داهاتەكانی نێوەخۆی ئیدارەو خاڵە سنووریەكان و گوتارو مامەڵەكانیان نەخەنەوە خزمەتی خەڵكی كوردستان لە چوارچێوەی كارنامەو ئەجێندای كابینەی نۆی حكوومەتی هەرێمی كوردستان.
هەڵپەرستی و تاكڕەوی ئەو حزبە بەدرێژایی مێژووی دروست بوونی، بەتایبەت لە دەیەی دواییدا بیانووی جیاجیای یەكێتی بۆ دادۆشینی داهاتی سنورەكە و پێشێل كردنی مافەكانی خەڵكی كوردستان بە گشتی و پارێزگای سلێمانی تایبەتترو بردنی پارەی خانەنشینان لە بانكەكان بەبەرچاوی ڕای گشتی و نەهاتنەپێش بۆ یەكخستنەوەی هێزی پێشمەرگە و لەمپەردرووست كردن بۆ كابینەی چاكسازی نۆی حكوومەت و بێباكیان لە كابینەكە: دەریخستووە كە پێشی بە گەشەی دیپلۆماسی و ئاسایش و ئابوری و كەلتوری و هێزی كوردستان گرتووەو بەو هۆیەوە چەندان دەستكەوتی مەزن و هەلی زێڕینی نیشتیمانی لەدەستدراوە و گەلی كوردستان زەڕبەی گەورەی سیاسی و دیپلۆماسی بەركەوتووە.
ڕاستی حاشاهەڵنەگر ئەوە؛ خەڵكی كوردستان لە مێژوو و بیرەوەرییان لە گەڵ یەكێتی نیشتیمانی جیا لە چەواشەكاری و ستەمی سیاسی و دەستتێكهەڵكردن لەگەڵ نەیارانی گەلی كوردستان شتێكی تر جێگەی نابێتەوە. لە هەمووی سەرنج ڕاكێشتر ئەوە؛ پارتی دیموكراتی كوردستان هەموو جار بە مافی زۆر كەم لە استعقاقی خۆی لە هەڵبژاردنەكان ڕازی بووە لە پێناو نەهێشتنی ئاشوب و نەهامەتی، هەروەها لە پێناو بەرقڕاری سیاسی و سەقامگیری ئاسایش و خۆشگوزەرانی خەڵكی كوردستان و بەشداری و شەڕاكەتی تەواوی لایەنە سیاسیەكان لە حكوومڕانی و بەڕیوەبردنی وڵاتدا .
دواجار دەبێت رێڕەوی چەوتی حوكمڕانی خۆی بۆ ئیدارەدانی سلێمانی و سییاسەتكردن لەپێناو خزمەتی ئەجێندای ئەم وڵات و ئەو حزب راستبكاتەوە و دوور لە فاسدی سیاسی و ئیداری حزبی كوردستانی بێت، نەك ملیشیایی شیعی ئێرانی و فاسدی عەقڵی سیاسی بێت. و سیاسەتەكانی بخاتە خزمەت كچی ئەوان و كوری خۆشی بكات بە قوربانی. ئاخر دوای بەردەوامی هەموو ئەو ساڵانەی چوویی لە سیاسەتی بئ مانا و نەرێنی، ئێستا لە هەموو كاتێك زیاتر ئەو پرسیارە دێتە پێش كە تا كەی یەكێتی بەردەوام دەبێت و دەیەوئ بگات بە كوئ و چی بەدەست بێنێت..؟
