زاری كرمانجی-سۆران:
تەحسین سەعدولڵا، بەڕێوەبەری ئاوی قەزای ناوەندی سۆران، بە زاری كرمانجی راگەیاند: “لەسەر داوای وەزارەتی شارەوانی و گەشتوگوزار و لەبەر بەرژەوەندیی هاووڵاتيیان، ئەنجوومەنی وەزیرانی هەرێمی كوردستان ڕەزامەندی نیشانداوە بۆ كاتێكی دیاریكراو لەسەر نوێكردنەوەی بڕیاری لێخۆشبوونی بەشێكی كرێی بەستنی پێوەری ئاو بۆ ئەو هاوبەشانەی تا ئێستا پێوەریان نەبەستووە، بۆ ئەو مەبەستەش لە پێشوازیی هاوبەشانی ئاودا دەبین بۆ جێبەجێكردنی مامەڵەی بەستنی پێوەری ئاو و كار ئاسانی كردن بۆیان”.
ئاماژەی بەوەشدا ” بەپێی ئەو بڕیارەی ئێستای وەزارەتی شارەوانی و گەشتوگوزار، ئەوانەی قەرزی ئاویان لەسەرە بە بەستنی پێوەری ئاو لە سەنتەری شارە گەورەكان مانگانە لە 80 هەزارەوە كراوەتە 20 هەزار دینار، هەروەها بەستنی پێوەر لە قەزا و ناحیە و كۆمەڵگەكانی دەرەوەی شارەكان لە 80 هەزارەوە كراوەتە تەنیا 10 هەزار دینار، هەروەك فەرمانگەكانی تایبەتمەند بە بەستنی پێوەری ئاو، بە هەموو شێوەیەك ئاسانكاری بۆ هاوبەشانی ئاو دەكەن بۆ ئەوەی ئەو ماوەیەی نوێكراوەتەوە لێی سوودمەندبن”.
ئەوەشی خستەڕوو: ” پێویستە ئەو هاوبەشانەی پێوەریان نەبەستووە تاكوو 21/4/2023 مامەڵەی بەستنی پێوەر بكەن، ئەگینا دوای ئەو ماوەیەی دیاریكراوە، ناتوانن لە داشكاندنەكەی حكوومەت سوودمەند بن، بڕیارەكە چەند جارێكی تر لەبەر بەرژەوەندیی هاووڵاتییان نوێكراوەتەوە و لە دوای ئەو ڕێكەوتە ناتوانرێت چیتر نوێ ناكرێتەوە.
ئاشكراشی دەكات ” لە سنووری قەزای ناوەندی سۆران و ناحیەكانی زیاتر لە 32 هەزار هاوبەشی ئاومان هەیە، لەوانە زیاتر لە 27 هەزار هاوبەشی ئاو پێوەریان بەستووە، رۆژانەش بۆ ئەم مەبەستە هاووڵاتییان سەردانمان دەكەن، هەروەك بەستنی پێوەری ئاو لەبەرژەوەندی گشتی هاووڵاتیانەوەیە، هەم مانگانە پارەیەكی زۆریان بۆ ناگەڕێتەوە هەمیش دەبێتە هۆی پاراستن و بەفیڕۆ نەچوونی ئاو.
