بە ئیدارەكردنی سۆران هەنگاوێكی گرنگی كابینەی نۆیەم بوو

موڕشید برادۆستی – سۆران:
ساڵێك بەر لە ئێستا لە رێوڕەسمێكدا بە ئامادەبوونی مەسرور بارزانی، سەرۆكی حكوومەتی هەرێمی كوردستان، بە فەرمی قەزای سۆران بووە ئیدارەی سەربەخۆ و هەڵگۆرد شێخ نەجیب وەك سەرپەرشتیاری ئیدارەكە دیاری كرا، بەرپرسانی ناوچەكەش دەڵێن، سۆران پێشكەوتن و ئاوەدانی باشی بەخۆیەوە بینیوە و هیچ كات نەبووە ئەو هەموو پڕۆژەیە بەیەكەوە جێبەجێ بكرێن.
سەعدوون مستەفا، بەرپرسی فەرمانگەی كارەبای دیانا، بە زاری كرمانجی گووت:” بە ئیدارە كردنی سۆران بڕیارێكی زۆر پێویست بوو كە لە لایەن كابینەی نۆیەمەوە درا، خەڵكی دەڤەری سۆران بۆ پارێزگاری لە كوردستان، شەهید و قوربانی زۆریانداوە و لە هەموو شۆڕشەكان خزمەت و خەباتیان هەیە، حكوومەتی هەرێمی كوردستانیش بە مەبەستی شۆڕكردنەوەی دەسەڵات بۆ قەزا و ناحیەكان و كارئاسانی بۆ هاووڵاتییان و زووتر رای كردنی مامەڵەكانیان و نەهێشتنی رۆتین، ئیدارەی سۆرانی هێنایە كایەوە .
بەگووتەی سەعدوون مستەفا، بەهۆی بە ئیدارەكردنی سۆران توانراوە خزمەتی زیاتر پێشكەشی هاووڵاتییان و دانیشتووانان بكرێت لە هەموو كەرتەكان، دەڵێ:” هەر پڕۆژەیەك زۆرینەی خەڵك لێی سوودمەند بن، لە لایەن سەرپەرشتیاری ئیدارەی سۆران رەزامەندی لەسەر دەدرێت و هەوڵی جێبەجێ كردنی دەدرێت، لە بواری كارەبای نیشتمانی پاڵپشتێكی بەهێزی ئێمەیە و لە هەموو قەزا و ناحیەكانی سنوورەكە هەڵمەتێكی باشی دەست پێ كرد و هەموویانی رووناككردەوە، بەشێوەیەكی گشتی سەرپەرشتیاری ئیدارە پیاوێكی سادە و دڵسۆز لە كارەكەیی و ساڵانێكە دەڤەری سۆران پێویستی بە بەرپرسێكی وا هەیە”.
ئەندازیار خوسرەت سادق، بەڕێوەبەری چاككردنەوە و پاراستنی رێگەوبانی ئیدارەی سۆران، بە زاری كرمانجی گووت:” لەگەڵ دروست بوونی ئیدارەی سەربەخۆ، بە دڵنیایەوە سۆران پێشكەوتن و ئاوەدانی باشی بەخۆیەوە بینیوە و دەبینێت، ئێستا ئیدارەی سۆران خاوەن بودجەیەكی باشە و بەشێوەی یەكسانی بۆ شار و شارۆچكەكانی سنوورەكە تەرخان دەكرێت، كۆمەڵێك پڕۆژە لە واری جێبەجێ كردندان و پڕۆژەی گەورە و ستراتیژیش لە داهاتوو جێبەجێ دەكرێن”.
بەڕێوەبەری چاككردنەوە و پاراستنی رێگەوبانی ئیدارەی سۆران، دەڵێت:” ئەگەر بەڕێوەبەرایەتی ئێمە بكرێتە نموونە، تەنها لەو مانگەدا نزیكەی 10 پڕۆژەی رێگەوبانمان جێبەجێ كردووە كە زۆرینەی پڕۆژەكان لەسەر بوددجەی ئیدارەی سەربەخۆی سۆرانە، لەماوەی ساڵانی رابردوو هیچ كات نەبووە لەیەك كاتدا ئەو هەموو پڕۆژەیە بەیەكەوە جێبەجێ بكەین .
ئەوەشی خستەڕوو:” هەڵگۆرد شێخ نەجیب، بۆ دەڤەری سۆان و خزمەت كردن، بیرۆكەی جوانی ئیش كردنی پێیە، هەموو هەوڵیش دەدات ئەو بیرۆكانە لە پڕۆژەدا بۆ خزمەتی خەڵك رەنگ بداتەوە و جێبەجێ بكرێن، لەنزیكەوە ئاگادارم لە ماوەی دەستبەكاربوونی هەرگیز بەدوای شتێكەوە نەبووە كە بۆ بەرژەوەندی تاكەكەسی خۆی سوودی هەبێت، هەمیشە بۆ بەرژەوەندی گشتی هەوڵیداوە و بەدڵ حەزی لێیە خزمەت بكات و خەمخۆرە”.
ئاواز شێرزاد، كچە چالاكوانێكی سنووری ئیدارەی سۆرانە، دەڵێت:” بێگومان بڕیاری بە ئیدارەكردنی سۆران هەنگاوێكی گرنگی كابینەی نۆیەمی حكوومەتی هەرێمی كوردستان بوو، بڕیارێك لە ئاست چاوەڕوانی خەڵكی دەڤەرەكە بوو، هەربەم هۆیەوە سۆران لە رووی كارگێڕی و ئاوەدانییەوە قۆناخی باشی بڕیوە، تمووحی زیاتریشمان هەیە، چونكە سنوورێكی جوگرافیای بەرفراوانی هەیە، بەڵام لەئێستادا بودجەی تایبەت بەخۆی هەیە ئەوەش خاڵێكی زۆر گرنگی بە ئیدارە بوونە كە دەكرێت لەڕووی ئاوەدانییەوە زیاتر گرینگی پێ بدرێت.
ئاواز، دووپاتی كردەوە:” هیوادارم كاروانی ئاوەدانی بەتایبەت رێگەوبان كە بە پلە یەك داواكاری خەڵكە بەبێ جیاوازی بگاتە سەرجەم قەزاو ناحیە و گەڕەك و شوێنەكان، لەڕووی كارگێڕیشەوە پێویستە چەند قەزاو ناحیەیەكی تر زیاد بكرێن، هەروەها كردنەوەی دەروازەیەكی سنووریش كە كاریگەری ئەرێنی ئەبێت لە رووی ئابووری و رەخساندنی هەلی كار بۆ دانیشتووانی ناوچەكە، هەموو ئەم هەنگاوانە تەواوكەری ئیدارەیەكی جوان و پڕ خزمەتن كە دەكرێت لە داهاتوودا زیاتر هەوڵی جێ بەجێ كردنی بدرێت.
بارزان محەمەد، بەڕێوەبەری گەشتوگوزاری ئیدارەی سۆران، بە زاری كرمانجی گووت:” بە دڵنیاییەوە هێنانە كایەی ئیدارەی سۆران گرنگە بۆ هەموو چین و توێژەكانی دەڤەرەكە، تیمەكانی ئیدارە لە نزیكەوە سەردانی شوێنەكان دەكەن و ئەوەی پێویست بێ جێبەجێی دەكەن و چاودێری دەكەن، پێشتر بۆ مامەڵەیەكی كەم پێویست بوو سەردانی فەرمانگەكانی هەولێر بكەن، ئێستا خۆشبەختانە هەموو كارەكان لێرە رای دەكرێن و رۆتینیات كەم بۆتەوە و كار ئاسانی زۆر بۆ خەڵك و فەرمانگەكانی حكوومەتیش دروست بووە، بۆیە دەتوانین باشتر بپڕژێینە سەر پڕۆژە جۆراوجۆرەكان و ئیدارەدانێكی جوانی دەڤەرەكەمان بكەین.
بەڕێوەبەری گەشتوگوزاری ئیدارەی سۆران، دەڵێت:” پێشتر داهاتەكان دەگەڕایەوە هەولێر، بەڵام ئێستا زۆربەی زۆری داهاتەكان بۆ گەنجینەی حكوومەت لە سۆران دەگەڕێتەوە، پڕۆژەیەكی یەكجار زۆر لە سۆران و قەزا و ناحیەكانی دەوروبەری لە واری جێبەجێ كردندان و لە داهاتووشدا پڕۆژەی باشتر ئەنجام دەدرێن، كە خەڵكێكی زۆر لێی سوودمەند ئەبن، ئەمەش هەنگاوێكی دڵخۆشكەرە، لە داهاتووش وەبەرهێنەری ناوخۆ و بیانی لە ئیدارەی سۆران كاری وەبەرهێنان ئەنجام دەدەن، ئەم ئاوەدانی و جێبەجێكردنی پڕۆژە جیاوازەكان، متمانەی خەڵكی بە ئیدارە و سەرپەرشتیارەكەی دروستبووە و ئومێد دەكەین كاری باشتر و گەورەتر بۆ سۆران ئەنجام بدرێت”.
ئیدارەی سەربەخۆی سۆران، لە هەر چوار قەزاكانی ناوەندی سۆران، رواندز، چۆمان، مێرگەسۆر پێكهاتووە، 13 ناحیە و 797 گوند لە سنوورەكە هەن، ژمارەی دانیشتووانانی لە 350 هەزار كەس پێكهاتووە و رووبەری جوگرافیای 5473 كیلۆمەتر چوار گۆشەیە”.