محیەدین بادلی
لە ساڵانی ڕابردوو، بەهۆی نەیاری بەشێك لە نەتەوەپەرستانی بەغدا كە هەمیشە كاریانكردووە بۆ زیانگەیاندن و خستنی قەوارەی كورد، بەگەماڕۆدانی ئابووری و بڕینی بودجەو قوتی خەڵك، بۆیە حكومەتی هەرێمی كوردستان پەنای بردە بەر ڕێگەچارەی خۆژینی و دەرهێنانی سامانی ژێر زەوی و پرسی ئابووری سەربەخۆ، كە ئەوەش لە دەستووری عێڕاقی فیدراڵ ڕێگەپێدراوە و مافێكی ڕەوای گەڵی كوردستانە.
ئەو هەنگاوەی كورد، بووە جێگای هەڵچوون و كاردانەوەی نەیاران، كە هەمیشە بەرامبەر بە دەستكەوت و ویستەكانی خەڵكی كوردستان وەستاونەتەوە و تێڕامان و جوولەی نەرێنی و دژكارانەیان هەبووە. هەندێ لە كەس و حزبەناوخۆییەكانی ئێمەش چۆن لە ڕابردوودا دژی ڕیفراندۆم و سەربەخۆی كوردستان وەستانەوە، هەمان هەڵوێست و كردارو ڕفتارو گوفتاری چەواشەكارانەیان نواند بۆ گێڕانەوەی سەری پەتەكە بۆ دەستی بەغداو هەوڵدانی هاوبەش بۆ داڕماندنی ئابووری سەربەخۆو كێشكردنی هەرێم بۆ چاولەدەستی نەمرەو نەژی عێڕاق، ئەوەش بۆیان بە خیانەت و لێدان لە دەسكەوتی كورد تۆماردەكرێت.
دوای ڕاگرتنی نەوت و بڕینی سەرچاوەی داهاتی خەڵكی كوردستان، باشترین بژاردە و ڕێگەچارە لە ئێستادا رێككەوتنە لەگەڵ عێڕاق، ئەو هەنگاوەی مەسروور بارزانی سەرۆكی حكومەت لەكاتێكی دروست و لە جێی خۆیدا بووە، هەرچەندە من ئومێدی تەواوم پێی نیە، چونكە لە ڕابردوودا دەیان ڕێكەوتن و بەڵێنی تر لەگەڵ بەغدا كراوەو لەدوایدا لێی پاشەگەز بوونەتەوەو ئیفلیج كراون، دیارە ناحەزان و نەیاران ناپڕژێنە سەر جێبەجێكردنی هیچ ڕێكەوتنێك كە بەرژەوەندی و سوودی خەڵكی كوردستانی لێبكەوێتەوە.
