خۆراگری و كوردایەتی سەركەوت بە سەر زێهینەتی خۆرادەستكردن

رێبوار حەمەلاو شوانی
دوژمنانی كوردوكوردستان دوای بێ‌ ئومێدبوونیان لە بەكارهێنانی هەر چی چەكی كۆمەڵكوژ و قەدەغەكراو دژ بە رێبازی بارزانی و قوتابخانەی كوردایەتیی ، جۆرێك ڤایرۆسی كوشندەیان بە ناوی جاشایەتی و بەكرێگیراویی بەكارهێنا كە هەر شوێنك بۆنی بیروباوەری كوردایەتیی، ئاڵایی كوردستان وسەربەستی و ئازادیخوازی لێ بێت ،ئەوا پەڵامارێكی كوشندانەی بكرێتەسەر.
بەڵگەی هەر حاشاهەڵنەگر ئەو راستییە كە لە دوێنی هیچ شۆڕش و بەرخودان ئەو ڤایرۆسە بەكارهێنرا لە پێناو ناوچەگەرێتی و لێكترازان و تیرۆر بۆ دروستكردنی كۆسپ و بەربەست لەبەردەم كاروانی خەبات بۆ گەیشتن بە مافەرەواكانمان ، هەر چەندە زیانی گەورەی لێكەوتەوە بەڵام ئەو كاتەش بیروباوەری پتەویی كوردایەتیی وەك ڤاكسینێكی بەهێز خەونی ناحەزانی كوردو كوردستانی شكست پێهێنا.
بۆ قۆناغی دوای راپەڕین و حكوومرانی هەرێمی كوردستانیش هەمدیسان دوژمنانی گەلەمان جارێكی تر ڤایرۆسی كوشندەی بەكرێگیراویی و جاشایەتییان بە تام و بۆن و زمان و بەرگی كوردیی بە دروشمی بریقەدار و سیناریۆ و پاساویی جۆراجۆر و شەڕفرۆشی و ئاژاوەگێری پڕچەككراو و میدیا و تابووری پێنجەم ماوەی سێ دەیەیە ، پەڵاماری دەستكەوتەكان و مێژوو و سەروەرییەكان و بیروباوەرە كوردایەتیی و ئاڵا و پیرۆزییەكانی كورد وكوردستان دەدرێت .
ئامانجی ئەو ڤایرۆسە كوشندە یەك ئامانج بووە ئەویش سستكردن و رووخاندن و نەهێشتنی بیروباوەری كوردبوون و كوردایەتیی و قەوارەی هەرێمی كوردستان و ئینجا پاشكۆكردن و لاوازكردن و بێ متمانەیی بووە لە نێو هەموو تاكێكی ئەم كوردستانە ، رێگریكردن بووە لە گەشەسەندن و پێشكەوتنەكانی هەرێمی كوردستان ، پاشكۆكردن و بێگانەپەرستی و خۆ بەكەم زانی بەرامبەر دوژمنان و داگیركەرانی كوردستان .
هەر بۆیە، ئەو ڤایرۆسە كوشندەیە كە ناویی جاشایەتیی وبەكرێگیراوییە ، بە پیلان و قورمیشی ناحەزان دروستكراوە ، هەنگاو بەهەنگاو كاری لە سەر دەستبردن و پەڵاماردانی شوێنە هەستیارەكان كە پەیوەستن بە ئاسایشی نەتەوەیی و نیشمانی كردووە،
یەكەم ، سەرەتا بڕینی بەشە بوودجە و مووچەی كوردستان
دووەم ، ئاژاوەگێری ناوخۆیی و بەڕێگەی سیناریۆ و پاساویی ئامادەكراو
سێیەم، تابووری پێنجەم و هێرش و پەڵاماردانی میدیایی ئاراستەكراو
چوارەم ، سووكایەتی و پەڵاماردانی سیمبول و رەمزە پیرۆزەكانی كوردستان و مێژوو پرشانازی گەلی كورد
پێنجەم ، پیلانی ناوچەگەرێتی بەناوی زوونی زەرد و سەوز كە لە بنەڕەتدا ئەو پیلانی لاوازكردنی قەوارەی هەرێمی كوردستانە .
شەشەم ، گۆڕینی ئاڕاستەی رێكخراویی تیرۆریستی داعش بەرەو كوردستان بەئامانجی لاوازكردن و بێهێزكردنی
حەوتەم ، پیلانگێری دەستبەسەرداگرتنی نیوەی خاكی كوردستان لە پێناو شكاندنی شكۆ و ئیرادەی پێشمەرگە و هەموو سەركەوتنەكانی كە لەماوەی رابردوو بەدەست هێنرا بوون .
هەشتەم ، دەستبردن بۆ ئابووری و وزەی كوردستان لە پێناو لاوازكردنی گەشەسەندن و پێشكەوتنەكانی كوردستان و بەكارهێنانی دادگا ودادەوەری بۆ رێگریكردن لە هەناردەكردنی نەوتی هەرێمی كوردستان .
نۆیەم، ئەنجامدانی كاری تیرۆریستی و تاڵانكاری و سیخوری و بەكارهێنانی كەسانێك بەناوی رۆژنامە نووس لە ناوخۆ و دەرەوە ،بەمەبەستی ناشیرین كردنی و لاوازكردنی سەنگ و پێگەی هەرێمی كوردستان لە سەر ئاستی ناوچەیی و نێودەوڵەتیی.
دەیەم ، تاڵانكاری و دەستبەبردن بە سەروەت و سامانی گشتی و مووچە و قووتی خەڵكی دەڤەری سلێمانی و دەوروبەری لە پێناو لەكەداركردنی حكوومەتی هەرێمی كوردستان و دروستكردنی درز وناكۆكیی و زونگەرایی ئەوەش بۆ لاوازكردنی پێگەی كوردستان .
یانزدەیەم ، هێنانی میلیشاو گروپی تیرۆریستی لە ناخۆ و دەرەوەی سنوورەكانی كوردستان بۆ پەڵاماردانی پارتی و حكوومەتی هەرێمی كوردستان و كە مەرام تێییدا كۆتایی هێنابوو بە قەوارەی هەرێمی كوردستان .
لە هەموو ئەو پیلانگێریی و پەڵاماردانانەی ناحەزانی كوردستان بە رێگەی ڤایرۆسە كوشندەكان كە بەكرێگیراوەكانیان بوو،لە بەرامبەردا ئیرادەیبەهێزی كوردایەتی و پارتی توانیی شكست بە هەموو هەوڵەكان بێنێت كە مەرام تێیدا لاوازكردنی سەنگ وپێگەی قەوارەی هەرێم و یانیش نەهێشتنی بوو . بەڵام دوژمنان و بەكرێگیراوەكانیان باش لەو راستییە گەیشتن كە ئەم قەوارە و دەستكەوتانە هەروەها بە ئاسانی نەهاتوونەتەدی ، بەڵكو لە ئەنجامی خەبات و قوربانیدانی دەیان ساڵەیە و ڕەشە باو پیلانگێری و دوژمنان و ناحەزان ناڵەرزێت..