ئەمڕۆ سێشەممە 4ی نیسانی 2023، سەرۆكی حكومەتی هەرێمی كوردستان مەسرور بارزانی، لە بەغدا لەگەڵ سەرۆك وەزیرانی فیدراڵ محەمەد شیاع سوودانی كۆ بووەوە.
لە كۆبوونەوەكەدا گفتوگۆ لەبارەی چارەسەركردنی كێشەكانی نێوان هەرێمی كوردستان و حكومەتی فیدراڵ كرا، هەروەها ڕێككەوتن لەسەر دەستپێكردنەوەی هەناردەكردنی نەوتی هەرێمی کوردستان کرا كە رێككەوتنێكی كاتییە تا پەسەندكردنی یاسای بودجەی گشتیی فیدراڵ، یان یاسای نەوت و غاز.
لە كۆبوونەوەكەدا، سەرۆكی حكومەتی هەرێمی كوردستان، جەختی لە جێبەجێكردنی ڕێككەوتنەكە وەك خۆی و لە نزیكترین دەرفەتدا کردەوە تاوەكوو ببێتە بنەمایەك لەپێناو پتەوكردنی گیانی هاوبەشی و قووڵكردنەوەی متمانە لە نێوان هەردوو لادا.
سەرۆك وەزیرانی فیدراڵ، هیوای خواست كە ڕێككەوتنەكە ببێتە سەرەتایەك بۆ چارەسەركردنی تەواوی كێشەكان و گوتی: ”بەرژەوەندیمان لە جێبەجێكردنی دەستوور و پاراستنی بەرژەوەندیی سەرجەم عێراقییەكانە“.
هەروەها ڕوونی كردەوە كە ئەم ڕێككەوتنە، دەبێتە بنەمایەك بۆ جێبەجێكردنی هەردوو یاسای بودجەی گشتیی فیدراڵ و یاسای نەوت و غازی فیدراڵ بە گیانێكی هاوبەش، پاش پەسندکردنیان.
دواتر بە ئامادەبوونی سەرۆكی حكوومەتی هەرێمی كوردستان و سەرۆک وەزیرانی فیدراڵ، لە ڕێوڕەسمێکدا ، ڕێككەوتنی دەستپێكردنەوەی هەناردەكردنی نەوتی هەرێمی كوردستان بە شێوەیەكی هاوبەش واژۆ کرا .
پاشان هەردوولا کۆنفرانسێکی ڕۆژنامەوانیی هاوبەشیان ئەنجام دا و تێیدا باسیان لە وردەكاریی ڕێككەوتنەكە كرد و وەڵامی پرسیاری ژمارەیەك لە ڕۆژنامەنووسانیشیان دایەوە.
بڕیارە بەپێی ڕێککەوتنەکە، هەناردەکردنی نەوتی هەرێمی کوردستان لە ڕێگەی بەندەری جەیهانی تورکییەوە دەست پێ بکاتەوە.
