شەهیدانی شەڕی داعش لە وەرگرتنی زەوی سوودمەند دەبن

شەهلا رەشید- سۆران:
ئەشقی مەلا، بەڕێوەبەری شەهیدان و ئەنفالكراوانی سۆران، لە دیدارێكدا لەگەڵ رادیۆی زاری كرمانجی، دەڵێ:” بە بڕیاری سەرۆكی حكوومەتی هەرێم شەهیدانی شەڕی داعش لە وەرگرتنی زەوی سوودمەند دەبن. دەشڵێ:” خانووە زێدەڕۆیەكانی شەهیدان و ئەنفالكراوان بێ بەرامبەر تاپۆ دەكرێن.
بەڕێوەبەری شەهیدان و ئەنفالكراوانی سۆران، ئاماژە بە چەند خاڵێك دەكات سەبارەت بە تاپۆكردنی خانووە زێدەڕۆیەكانی كەسوكاری شەهیدان و ئەنفالكراوان، هەروەها رۆڵی بەرپرسی ئیدارەی سۆرانیش بۆ كەسوكاری شەهیدان و ئەنفالكراوان دەخاتەروو، پێش ئەوەی حكوومەت بڕیاری تۆماركردنی خانووە زێدەڕۆكان بدات، زۆرێك لە كەسوكاری شەهیدان و ئەنفالكراوان سەردانیان كردین و داوایان كرد كە رەچاوی بارودۆخیان بكرێت، ئێمەش داواكارییەكانمان ئاڕاستەی ئیدارەی سۆران كردوو و بڕیاردرا كارئاسانی تەواویان بۆ بكرێت، هەروەها ئەوەی گرنگە هەڵگورد شێخ نەجیب، سەرپەرشتیاری ئیدارەی سەربەخۆی سۆران بایەخێكی زۆر بە كەسوكاری شەهیدان و ئەنفالكراوان دەدات، لە هەر دانیشتنێك لەگەڵ سەرپەشتیاری ئیدارەی سەربەخۆی سۆران پێشنیار و داواكاریمان ئاڕاستە كرد بێت لەو كار و خزمەتانەی لەم دەڤەرە دەكرێت رەچاوی كەسوكاری شەهیدان بكرێت، سەرپەرشتیاری ئیدارەی سۆران لە كۆبوونەوەكانیدا لەگەڵ وەزارەتی شارەوانی و ئەنجوومەنی وەزیران گفتوگۆ لەسەر ئەوە كراوە كە هەوڵبدرێت بۆ كەسوكاری شەهیدان و ئەنفالكراوان لەم دەڤەرە بۆ تۆماركردنی خانووە زێدڕۆكان لێخۆشبوون بكرێت، ئەمەش لە ئێستادا كەوتووتە بواری جێبەجێكردن، ئێمەش وەك بەڕێوەبەرایەتی شەهیدان و ئەنفالكراوانی سۆران، لەگەڵ سەرۆكایەتی شارەوانی سۆران هەماهەنگیمان هەیە كە رۆژانە كەسوكاری شەهیدان سەردانمان دەكەن بۆ تاپۆكردنی خانووەكانیان بە نووسراوێك ئاڕاستەیان دەكەین و ئاماژە بە كەسوكاری شەهیدان دەدەین بۆ ئەوەی كار ئاسانیان بۆ بكرێت.
سەبارەت بە بوونی بەڕێوەبەرایەتی گشتی شەهیدان و ئەنفالكراوان، ئەو بەڕێوەبەرە روونیكردەوە” ئەمە جێگەی دڵخۆشییە بۆ ئەم دەڤەرە، چونكە بۆ زیاتر خزمەتكردنی كەسوكاری شەهیدان و ئەنفالكراوانە، لە ئێستادا حكوومەتی هەرێم، ئیدارەی سەربەخۆی سۆران و وەزارەتی كاروباری شەهیدان و ئەنفالكراوان سەرقاڵی چەند پلان و بەرنامەیەكن، تەنها هەندێك رێكاری یاسایی ماون كە ئەوانیش بەم زووانە جێبەجێ دەكرێن، هەروەها تا ئێستاش هیچ ناوێك یاخود كەسێك یەكلای نەبۆتەوە كە وەك بەڕێوەبەری گشتی شەهیدان دەست بەكاربێت.
بەڕێوەبەری شەهیدان و ئەنفالكراوانی سۆران، ئاشكراشی كرد” تا ئێستا حەفتەمین قۆناغی دابەشكردنی زەویی بەسەر كەسوكاری شەهیدان و ئەنفالكراواندا دابەشكراوە، ئەوانەی لە قۆناغی یەكەم تا هەفتەیەك لە هەولێر بوونە، دەتوانین بڵێین 75% كەسوكاری شەهیدان لە هەر چوار قەزای سنووری ئیدارەی سۆران لە وەرگرتنی زەوی سوودمەند بوونە، ئەوانەی كە لە وەرگرتنی زەوی بێبەش بوونە نزیكەی 600 كەس دەبن، لەگەڵ كەسوكاری شەهیدانی شەڕی داعش، هەر لە سەرەتای دەستپێكی شەڕی داعش، حكوومەتی هەرێم بە گشتی و ئیدارەی سەربەخۆی سۆران هەموو هەوڵێكیان داوە بۆ خزمەتكردنی كەسوكاری شەهیدانی شەڕی داعش، لەگەڵ هەموو دەزگاكانی ئەم سنوورە ئەوەی پێویست بێت لە بواری تەندروستی، پەروەردە، زەوی و زارەوە بۆیان بكرێت، بڕیارە شەهیدانی شەڕی داعشیش لە وەرگرتنی زەوی سوودمەند بن، ئێستاش بە بڕیاری سەرۆكی حكوومەتی هەرێم قۆناغی هەشتەمین هەر لە پارێزگای هەولێر زۆرترین كەسوكاری شەهیدانی ئیدارەی سۆران لە وەرگرتنی زەوی سوودمەند دەبن.
ئەشقی مەلا، لەبارەی پڕۆسەی خوێندنەوە، ئەوەشی خستەروو” ئێمە لە بەڕێوەبەرایەتی شەهیدان و ئەنفالكراوانی سۆران، بەشی پەروەردە و خوێندنمان هەیە ساڵانە لەگەڵ بەڕێوەبەرایەتی پەروەردەیی سۆران و قەزاكان، هەماهەنگی ئەوەمان كردووە كە چۆن خزمەتی خوێندكارانی كەسوكاری شەهیدان بكەین، بۆ ئەم ساڵیش پلانمان داناوە و بە بەرنامەیەكی چڕەوە كە پێویستە چی بكرێت بۆیان، یەكێك لە هەنگاوەكانمان ئەوەیە كە حكوومەت وەك ساڵانی رابردوو لە باخچەی ساوایان تا دەگاتە زانكۆ و پەیمانگەكان، ماستەر و دكتۆراش، بۆ كەس و كاری شەهیدان بێ بەرامبەر بێت، حكوومەتی هەرێم خەرجی خوێندنەكەیان دەگرێتە ئەستۆ.
لە كۆتا قسەكانیدا لەسەر زیندانیانی سیاسی، ئەشقی مەلا، بەڕێوەبەری شەهیدان و ئەنفالكراوانی سۆران، گوتی” ئەوانیش بەشێكن لە وەزارەتی كاروباری شەهیدان و ئەنفالكراوان، بەڕێوەبەرایەتیەكی تایبەتیان هەیە لە پارێزگای هەولێر كە بەڕێوەبەرایەتی زیندانی سیاسییەكانە، ئەوانیش وەك كەسوكاری شەهیدان لەرووی خوێندن و هەموو بوارەكانی دیكە خزمەتیان دەكرێت، بەڵام جیاوازییەكەی ئەوەیە كە بۆ خێزانی شەهیدان چەند خوشك و برا بن هەموویان دەتوانن درێژە بە خوێندن بدەن، بەڵام لە زیندانیانی سیاسی تەنها یەك كەسیان دەتوانن لەسەر ئەركی حكوومەت بخوێنن”.