چەند پڕۆژەیەكی ستراتیژی جێبەجێ‌ دەكرێن

محەمەد هەسنانی- سۆران:
لە شار و شارۆچكە و گوند و ناوچەكانی ئیدارەی سۆران، هەڵمەتێكی فراوانی پڕۆژە خزمەتگوزارییەكان دەستی پێكردووە، ئەوەش بۆتە جێگەی دڵخۆشی دانیشتووانی ناوچەكە، سەرپەرشتیاری ئیدارەی سۆرانیش، دەڵێت، كابینەی نۆیەم ئامانجی خزمەتكردنی زیاترە بە هاووڵاتییان.
سەباح قادر، هاووڵاتییەكی دانیشتووی ناحیەی دیانایە، بە زاری كرمانجی راگەیاند:” دڵخۆشین بەوەی كە لە زۆربەی گەڕەك و كۆڵان و شوێنەكانی شار و شارۆچكە و گوندەكانی ئیدارەی سەربەخۆی سۆران، پڕۆژەی خزمەتگوزاری لە بوارە جیا جیاكاندا لە واری جێبەجێكردنن، ئەوەش بە دەسكەوتی بە ئیدارەبوونی سۆران لە لایەن سەرۆكی حكوومەتی هەرێمی كوردستانەوە دەزانین، كە لەو ئیدارەیەدا كاروانی خزمەتگوزاری بەر فراوان دەستی پێ كردووە.
ئەو هاووڵاتییە داواكاریشە لە لایەنە پەیوەندیدارەكان، لەكاتی ئەنجامدانی پڕۆژە خزمەتگوزارییەكان چاودێری زیاتر بخەنە سەر پڕۆژەكان لەرووی باشی كواڵێت و شێوازی جێبەجێكردنیان، چونكە هەر پڕۆژەیەك گوژمە و خەرجی زۆری پێویستە و ئەركە بەسەركەوتووی ئەنجام بدرێن، لەگەڵ ئەوەشدا جێگەی دڵخۆشییە كە سەرپەرشتیاری ئیدارەی سۆران لە نزیكەوە بەدواداچوون بۆ كارو پڕۆژەكان دەكات، ئەمەش كاریگەری باشی دەبێت.
محەمەد عەلی، شۆفێری تاكسییە لە ئیدارەی سەربەخۆی سۆران، بە زاری كرمانجی گووت:”بەهۆی بڕینی بودجەی هەرێم لەلایەن بەغداو هاتنی داعش و دواتریش بڵاوبوونەوەی نەخۆشی كۆرۆنا، چەند ساڵێكە راستەوخۆ كاریگەری كردبووە سەر وەستانی پڕۆژە خزمەتگوزارییەكان، ئەمەش وایكرد كە زۆربەی شەقامەكان وێران ببن و پڕبن لە قۆرت و تاسە، هەروەها ئەو گەڕەكانەی كە تازە دروستبوونە و نوێنە پێویستیان بە خزمەتگوزاری هەیە”.
ئاماژەی بەوەشكرد:” لە كابینەی نۆیەم هەڵمەتێكی بەر فراوانی پڕۆژە خزمەتگوزارییەكان لە سەنتەری قەزای سۆران و شارو شارۆچكەكانی دیكەی ئیدارەی سۆران دەستی پێكردووە، ئەوەش ئومێد و هیوای زۆری بۆ شۆفێران و هاووڵاتییان دروست كردووە، بە هیوای بەردەوام بوون و خزمەتگوزاری زیاتر”.
هەڵگورد شێخ نەجیب، سەرپەرشتیاری ئیدارەی سەربەخۆی سۆران، لە پرێسكۆنفڕانسێكی رۆژنامەوانیدا رایگەیاند:” سەرەڕای ئەو هەموو قەیرانە دارایانەی كە هەن، حكوومەتی هەرێمی كوردستان توانیویەتی هەم پارەی مووچە هەم بۆ پڕۆژە خزمەتگوزارییەكان تەرخان بكات، ئەوەش جێگەی خۆشحاڵی ئێمە و هاووڵاتییانە، لای خۆمان بەو پەڕی تواناوە هەوڵدەدەین زۆرترین پڕۆژەی خزمەتگوزاری لە سنووری ئیدارەی سەربەخۆی سۆران جێ‌ بەجێ‌ بكەین”.
سەرپەرشتیاری ئیدارەی سەربەخۆی سۆران، گووتیشی:” پێشتر پڕۆژە خزمەتگوزارییەكان لە پارێزگای هەولێر دەچوونە واری جێبەجێ‌ كردن، بەڵام دوای بوونی سۆران بە ئیدارەی سەربەخۆ، بوودجەی تایبەت بە خۆمان هەیە و دەتوانین بە شێوەیەكی خێراتر كار لەسەر جێبەجێ‌ كردنی ئەو پڕۆژانە بكەین، هەروەها خۆشمان چاودێری زیاتری پڕۆژەكان بكەین، داواكاریشین لە هاووڵاتییان هاوكارمان و پشو درێژبن لەگەڵمان لەكاتی جێبەجێ‌ كردنی پڕۆژە خزمەتگوزارییەكان، بەتایبەت ئەو پڕۆژانەی ئاستەنگی هاتووچۆیان لە ئێستادا دروست كردووە، چونكە ماوەیەكی كورتمان لەبەردەستدایە و چەندین پڕۆژەشمان دەست پێكردووە، كە پێش ئەوەی وەرزی زستان بێت هەوڵدەدەین زۆرترین پڕۆژە جێبەجێ‌ بكەین”.
هەڵگورد شێخ نەجیب، ئاماژەی بەوەشكرد:” ئەنجامدانی پڕۆژە خزمەتگوزارییەكان بە مافی هاووڵاتییانی شارۆچكە و گوند و ناوچەكانی سنوورەكەمان دەزانین و بەپێی ئەو بودجەیەی لەبەردەستماندایە پڕۆژەكان قۆناغ بە قۆناغ ئەنجامیان دەدەین، ئەو شوێنانەش كە ماون لەبەرنامە و پلاندان بۆ ساڵی داهاتوو دەست بەجێ بەجێ كردنیان بكەین و داواكاری خەڵكە جێبەجێ‌ بكەین، هەر بەڵێندەرێكیش لە پڕۆژەكان كەمتەرخەمی بكات، رووبەڕووی لێپێچینەوەی یاسایی دەبێتەوە، ئەگەر پابەند نەبێت پڕۆژەكەی لێوەردەگیرێتەوە”.
سەرپەرشتیاری ئیدارەی سەربەخۆی سۆران، ئاشكراشی دەكات:” پڕۆژە خزمەتگوزارییەكانمان لە بوارە جیا جیاكان خۆیان دەبینەوە، لە چاككردنی شەقام و رێگاو كۆڵان و ئاو و ئاوەڕۆ و كارەباو چەندین پڕۆژەی دیكە لە سەنتەری قەزا و شار و شارۆچكە و گوندەكانی ئیدارەی سەربەخۆی سۆران جێبەجێ دەكرێن، هەروەها چەند پڕۆژەیەكی ستراتیژی لە بەرنامە و پلاندان لە ئایندەیەكی نزیك دەست بە جێ‌ بەجێكردنیان دەكەین و رایان دەگەیەنین، بە پاڵپشتی سەرۆكی حكوومەت موژدەی خۆشمان پێیە بۆ جێبەجێكردنی چەند پڕۆژەیەكی گەورە و بەرچاو لە ئیدارەی سۆران”.
هەڵگورد شێخ نەجیب، سەرپەرشتیاری ئیدارەی سەربەخۆی سۆران، دەشڵێت:” ئەو پڕۆژانە دابەشكردنیان بەسەر قەزا و ناحیە و گوندەكان بەشێوەیەكی زۆرباش و دادپەروەرانە بووە، بە یەك چاویش سەیری ئەو شوێنانە دەكەین و هاووڵاتییان دڵنیا دەكەینەوە كە خزمەتگوزاری زۆر و بەر فراوان ئەنجام دەدەین”.