د. ئەیوب عەبدولحەمە، پزیشكی پسپۆڕی نەخۆشییەكانی پێست و جوانكاری
چارەسەری پلازما، بریتیە لە بەكارهێنانی پلازمای دەوڵەمەند بە خەپلەكانی خوێن، بۆ هاندانی گەشەی شانە و خانەكانی پێست، ئەمەش وا دەكات پێست نوێ بێتەوە و رونتر و گەنجتر دەربكەوێت.
لەوبارەوە د. ئەیوب عەبدولحەمە، پسپۆری نەخۆشییەكانی پێست و جوانكاری و لەیزەر روونی دەكاتەوە و دەڵێت” خوێن پێكدێ لەخڕۆكەی سپی و سور، پلازما، خەپلەكانی خوێن، بۆ ئەم چارەسەرە ئێمە خوێنی نەخۆشەكە وەردەگرین و ئەیكەینە تیوبێكی تایبەتی كە ماددەی دژەمەین و فاكتەری گەشەی تێدایە، پاشان ئەخرێتە نێو ئامێری سێنتێرفیوج بۆ ماوەی 8 بۆ 10 خولەك بە مەبەستی جیاكردنەوەی خانەكانی خوێن و پلازما و خەپلەكانی خوێن، پاش سڕكردنی روخسار بە كرێمێكی تایبەت، پلازمای دەوڵەمەند بە خەپلەكانی خوێن لە رێی سرنجی ئینسۆلین و ئامێری دێرما پێن-Dermapen، لە پێست دەدرێت، ئەمەش هانی گەشەی كۆلاجین و نوێ بوونەوەی خانەكانی پێستی روخسار دەدات.
دەربارەی زیان و مەترسییەكانی ئەم پزیشكە پسپۆڕە دەڵێت” لەبەر ئەوەی چارەسەری پلازما بەكارهێنانەوەی خوێنی سروشتی خۆتە، بێ زیان و مەترسییە، مرۆڤ كاتێ دەگاتە تەمەنی 30 ساڵ پێستی روخساری ماندوو دەبێ و تێكدەچێت، لە رێی چارەسەری پلازماوە دەتوانرێ تا ئاستێك رەنگی پێست یەك بخرێتەوە و روخسار توند ببێتەوە، هەروەها بۆ ئەم مەبەستانەش بەكاردێت جوانكاری پێستی روخسار، لابردنی ئاسەواری زیپكە و سوتاوی، لابردنی پەڵە و كونیلەكانی سەر پێست و بۆ چارەسەری هەڵوەرینی قژ و بەهێزكردنەوەی.
د.ئەیوب عەبدولحەمە، جەختیشیكردەوە” ئەوەی چارەسەر بە بۆتۆكس و فیلەر لەگەڵ پلازما جیا دەكاتەوە ئەوەیە راستەوخۆ دوای بەكارهێنانی فیلەر بۆ بۆڵدكردنی لێو یا پڕكردنەوەی خەت و چاڵی روخسار، مرۆڤ هەست بە گۆڕانكاری دەكات، یان چەند رۆژێك دوای بەكارهێنانی بۆتۆكسەكە هەست بە گۆڕانكاری دەكات، بەڵام پلازما پێویستی بە كات هەیە بۆ ئەوەی ئەنجامەكانی دەربكەوێت و پێویستە لە ماوەی یەك ساڵدا وەكو مانەوەی چارەسەر Maintenance therapy دوو جار پلازما بۆ پێست بكرێت و دەتوانرێت ئەم چارەسەرە بۆ پیاوان و خانمان بەكاربهێنرێت، ئەنجامی كۆتایی ئەم رێگە جوانكارییە لە دوای 4 بۆ 5 مانگ دەردەكەوێت و بە تێپەڕینی كات زیاتر دەبێت، بۆ دەستكەوتنی ئەنجامێكی باشیش پێویستە سێ جەلەسە ئەم چارەسەرە دووبارە بكرێتەوە، ماوەی نێوان جەلسەكان 3 بۆ 4 هەفتەیە، بەڵام بۆ هەڵوەرینی قژ نزكەی شەش جەلەسەی پێوستە و ماوەی نێوانیا 4 هەفتەیە.
سەرچاوە/ سایتی زانیاری
