پەری عومەر: بەتەنیا راگەیاندن ناتوانێت ببێتە سەرچاوەی بژێوی ژیان

ئا/ محەمەد هەسنانی
ئافرەتە راگەیاندكار وەرگێڕ و نوسەر، لە دیدارێكی زاری كرمانجی دەڵێت: ” سەرەڕای ئەركی ماڵەوە توانیوومە لەسەر كاری رۆژنامەوانی و وەرگێڕان و نووسینی دەقی ئەدەبی بەردەوام بم.
لە بەردەوامی قسەكانیدا پەری عومەر ئەسعەد، بەزاری كرمانجی راگەیاند ” هەرچەندە بنەماڵەكەمان (خەیلانین) بەڵام لە زووەوە باپیرانم زێدی خۆیان جێهێشتووە، لە هەولێر جێگیر بووینە و منیش لەوێ‌ لەدایكبوومە، هاوسەرگیریم كردووە، لە خێزانێكی شەش كەسی دوو كوڕ و دوو كچ و باوكیان.
گووتیشی: “كولێژی زمان بەشی عەرەبیم تەواو كردووە، زیاتر لە 14 ساڵە كاری نووسین و رۆژنامەگەری و وەرگێڕان دەكەم، سەرەتا لە گۆڤاری هەرێم، یادی بەخێر ماموستا شێرزاد عەبدوڵرەحمان سەرنووسەر بوو، بابەتەكانم بڵاو دەكردەوە، دواتر لەرۆژنامەی خەبات دەستبەكاربووم، تا ئێستاش بەردەوامم و بابەتم لەچەند شوێنێكی تریش بڵاو كردووەتەوە، بەتایبەت لە رۆژنامەی هەولێر، كاتێك كە قوتابی بووم لە زانكۆی سۆران، ماوەی دووساڵ چاڵاكییە رۆشنبیری و راگەیاندنەكانم گواستنەوە بۆ سۆران، هەرگیز چاكەی مامۆستا سەلام عەبدوڵڵا، سەرنووسەری رۆژنامەی خەبات، لەیاد ناكەم كە ماوەیەكە بەهۆی چارەسەری پزیشكی، لەدەرەوەی كوردستانە بە هیوای سەلامەتی، زۆر هاوكار و هاندەر و پشتیوانم بووە‌‌، مامۆستا دڵشاد وەسانیش، كە بەرێوەبەری نووسینە پشتیوانێكی دیكەی باشی من بووە لەگەڵ هاوكارانی دیكەی رۆژنامە، بۆ ئەوەی دانەبڕێم و بەگوێرەی كات راپۆرت و چاڵاكییەكانم لە سۆرانەوە بنێرم بۆ رۆژنامە، رێزیشم هەیە بۆ تەواوی خەڵكی سۆران بەتایبەت زانكۆی سۆران، چونكە دووساڵ تێیدا قوتابی بوومە، هەمیشە سۆران بە شاری ئومێد ناو دەبەم، ئێستاش هاوڕێیەتی هاوپۆل و ماموستا بەرێزەكانم ماوە، ئەگەر ژیان دەرفەت بدات رۆژێك بە چەپكێك شیعر و پەخشان وەك وەفادارییەك ببمە میوانیان”.
دەشڵێت ” زیاتر بابەتی ئەدەبی و رەخنەیی دەنووسم، حەزم لە ئەدەبی بەراوردكاری هەروەها ئەدەبی هاوتایییە، لەداهاتووێكی نزیك بە پشتیوانی خوا كاریان بۆ دەكەم، كومەڵێك شیعر و پەخشانیشم نووسیووە، لە پاڵ كاری رۆژنامەیی وردە وردە بڵاویان دەكەمەوە، بۆ كار و نووسینەكانیشم، خانەوادە و كەسە بەرێزەكانم بەتایبەت برای ئازیزم هەمیشە هەوڵیداوە لەپشتم بێت و سەرم بخات، هەرچەندە لەخۆم بچووكتریشە بەڵام راوێژو سەرنجەكانی بۆمن گرنگن”.
ئەوەش دەخاتەڕوو: ” لەوڵاتان راگەیاندن وەك هەر پیشەیەكی دیكە سەرچاوەی دابینكردنی بژێوی ژیانە، نموونەی ئەوانەشی بوونەتە ژمارە لە پێشڤەچوونی ژیانیان بە گشتی زۆرن، لەوانە وەفا ئەلگەیلانی كە پێشكەشكارێكی دیاری جیهانی راگەیاندنی عەرەبیە، هەروەها ئۆپێرا كە بەهێزترین كاراكتەری راگەیاندنە توانیویەتی لەرێی راگەیاندن نەك هەر بژێو بەڵكو بەسەر كومەڵێك كێشەی خۆیدا زاڵبێت، كەچی لێرە راگەیاندن بەتەنیا ناتوانێت ببێتە سەرچاوەی بژێوی ژیان، لەهەردوو حاڵەتە ناوخۆیی و جیهانیەكەش من راگەیاندن بە حەزو ئارەزوو دەبینم و مومارەسە كردنی خولیاێكی پیروزە، چونكە زورجار تۆ دەبیتە گەیەنەری راستیەكان و ژانی خەڵك، بیرمە گۆڕەپانێكی خۆلی سیاجكراو هەبوو لەسەر ئەو رێگایەی من لێیەوە تێدەپەڕیم بۆ دەوام، وردە وردە ببووە جێی خاشاكی ماڵان لەكاتێكدا لەپلانی حكوومەت ئەو شوێنە دەبوو پاركی گەڕەك بوایە، دواجار راپۆرتێكم لەبارەیەوە كرد لە رۆژنامەی خەبات بڵاو بووەوە، هێندەی نەبرد بووە پاركێكی قەشەنگی گەڕەكی زانكۆ”.
زۆرجار دەوترێت كاری راگەیاندن بۆ رەگەزی مێیینە ئاستەمە، لەوبارەیەوە پەریخان دەڵێ: ” هیچ كارێك یا شتێكی نوێ كەتۆ دەست بۆ ببەی لەهەموو لایەكەوە سەپۆرت ناكرێیت، هەر بەتەنها بۆ ئافرەت نییە، نا بیستوومە كوڕێك حەزیكردووە بچێتە بوارێك ماڵەوە رێگر بوونە، خزمێك هەیە كوڕەكەیان بێ ویستی خۆی ناردە سلكێكی پزیشكی، ساڵی دووەمی خوێندنی فەشەلی هێنا و تووشی دۆخێكی خراپی دەروونی هات، دوای كومەڵێك ژان ئێستا ئینگلیزی دەخوێنێت، ئافرەتیش هەروا بەتایبەت گەر ئەو كارە راگەیاندن بێت، كۆمەڵی ئێمەش وابەستەی شتانێكی نەریتیی چڕو تایبەتن، ئەمە ویست و ئیرادەیەكی بەهێزی پێویستە، هەر بۆیە زاڵبوونم بەسەر لەمپەرەكان پەیوەندی بەویست و ئارەزووی خۆمەوە هەبووە”.
دەشڵێت: ” خۆشترین كاتەكانم لە راگەیاندن ئەو كاتانەیە كەبابەتێكم بڵاو دەبێتەوە، جا چ دەقی ئەدەبی و زانستی یاخود رۆژنامەوانی بێت، هەروەها بە چاپ گەیاندنی ئەو چەند كتێبەی كارم بۆ كردوون، لەگەڵ تەواوكردنی خوێندن تا دوا ئاست كە دەمەوێ چاپیان بكەم لەدەرفەتێكدا”.