ئەمساڵ خواست لەسەر كڕینی جلوبەرگی كوردی زیادیكردووە

مستەفا دۆلەمەری- سۆران:

ساڵانە لەگەڵ هاتنی وەرزی بەهار و نەورۆز، بازاڕی جلوبەرگی كوردی گەرموگوڕتر دەبێت و هاووڵاتییان بۆ سەیران و گەشت كردن زیاتر مەیلی پۆشینی دەكەن، بۆ ئەوەش مانگێك پێش نەورۆز بە دوای قوماش و دیزایین و دروومانێكی باشدا دەگەڕێن.
زەینەل موراد، ناسراو بە زەینەل خەیات، بە زاری كرمانجی راگەیاند: جلوبەرگی كوردی هەموو وەرزێك داواكاری خۆی هەیە بەتایبەتی لە وەرزی بەهار، ئەم ساڵ زیاتر لە هەموو ساڵیك خواستی لەسەرە و ئەوانەی زیاتر داوای جلی كوردی دەكەن زیاتر گەنجن، راستە پێشتر زیاتر كەسانی بە تەمەن جلی كوردیان لەبەر دەكرد، بەڵام لە ئێستادا گەنجان زۆرتر روویان لە پۆشینی جلی كوردی كردووە، پێشتر كاتێك كەسێك هاوسەرگیری دەكرد، زۆر بە كەمی جلی كوردی لەبەر دەكرد، بەڵام ئێستا زۆربەی زاواكان جلی كوردی لەبەر دەكەن.
زەینەل خەیات، دەشڵێ: قوماشی ئیتالی، توركی و سینی، هەمانە، بەڵام زیاتر ئیتالی خواستی لەسەرە و لە دوای ئەویش قوماشی سینی، لە هەموو پارێزگاكانی هەرێم داواكاری هەیە و لە دەرەوەی وڵاتیش داوا دەكەن بەتایبەتی بۆ ئاهەنگ لە دەرەوە داواكاری هەیە.
گوتیشی: لە نەورۆز جلی كوردی خواستی زیاتر دەبێت، كورد شانازی بە نەورۆز دەكات و بۆ دەرخستنی كوردایەتی روو دەكەنە بازاڕ بۆ كڕینی جلی كوردی و یەكێكە لە نەریتە جوانەكانی كوردەواری و كلتوری خۆیان لەم رۆژە دەپارێزن، ئێمەش هیوا خوازین، زیاتر گرنگی بە جلی كوردی بدرێت، تاوەكو نەوەی نوێ و نەوەكانی داهاتوو، بە جلی ڕەسەنی كوردەواری و باوانیان ئاشنابن.
محەمەد جادر، هاووڵاتییەكی شاری سۆرانە، دەڵێ: هەموو كاتێك جلی كوردیم لە بەردایە و شانازی پێوەدەكەم، وەكو رەمزێكی نەتەوەی كوردە، بۆیە پێم باشە لەبەری بكەم و هەموو شێوازەكانیشم هەنە، زۆر جار دەبینم ئەگەر بۆنەیەك نەبێت جلی كوردی زۆر لەبەر ناكرێت، رۆژانی دیكە ئەگەر كەسێك جلی كوردی لەبەر بكات لێی دەپرسن بۆچی ئەمڕۆ جلی كوردیت لەبەر كردووە، هەندێك هۆكار دەهێنەوە، بۆ نموونە دەڵێن، ناتوانین بە جلی كوردی كاربكەین یا چەندین هۆكاری تر دەبینەوە، لە كاتێكدا لە رابردوو كارەكان قورستربوون، بەڵام بە شانازیەوە لەبەریان دەكرد.
حاجی خەیات، ئەویش لەناو بازاڕی سۆران جلوبەرگی كوردی دەدوورێت بە زاری كرمانجی گوت: ئەمساڵ بۆ یادی كۆچی دوایی بارزانی نەمر زۆرترین خواست لەسەر جلی كوردی هەبوو، هیچ ساڵێكیش وەكو ئەم ساڵ خواست لەسەر جلی كوردی نەبوو، ئەوەی داوای جلی كوردی دەكرد گەنج بوونە، جلی كوردیش جۆری زۆرە و نرخەكەشی لە 150 هەزار دینارەوە دەست پێ دەكات تا دەگاتە 300 هەزار دینار.
ئەو خەیاتە، دەشڵێ: پۆشینی جلی كوردی هەستی نەتەوەیی و بیری خۆشەویستیی زیاتر دەكات، هەموو گەلێك بە كلتوور و فەرهەنگ و زمانیەوە دەناسرێتەوە و لە گەل و نەتەوەكانی دیكە جیا دەكرێتەوە، ئێمەش گەلێكین پێویستە لەسەر هەموو تاكێكمان كلتوور و جلەكانمان بپارێزین، سەرەڕای ئەوەی چەندین جار لەسەر جلوبەرگی كوردی وەكو گەلی كورد، چەوساوینەتەوە و زیندەبەچاڵ كراوین، بۆیە دەبێ وەك چیاكان راوەستین و بیسەلمێنین كە گەلێكین جڵەوی خۆمان نادەین بە دەست هیچ ناحەزێك و شانازی بە كلتووری خۆمانەوە دەكەین”.