جەبار عهبدولڵا عەزیز
سەردانی محەمەد شیاع سودانی سەرۆك وەزیرانی عێراق، لە 14-3-2023 بۆ هەرێمی كوردستان، گرنكی ئەو بەروارە لەوەدایە كە باوكی ڕوحی كورد جەنڕاڵی چیاكان تیادا لەدایك بووە، بەمەش سەردانەكەی سەرۆك وەزیرانی عێراق بەروارەكەی گرنگتر كردوو بۆ جەنابیان ئاشكرابوو كە پارتی پێگەی یەكەمی هەیە لە عێراق و كوردستان، هەرچەندە بەشێكی زۆری حیزبە سیاسییەكان لەعێراق بەڕوخسار دۆستی پارتین، بەڵام لەژێرەوە هەوڵی لاوازكردنی پێگەی ئەو حزبە دەدەن،، دەكرێت ئەویش یەكێك بێت لەوانەی كە روخسارو دڵی وەك یەك نەبێت بەرامبەر بە حزبێكی كوردی كە پارتی دیموكراتی كوردستانە، بەڵام ئەوەی گرنگە سەردانەكەی تایبەت بووە بۆ لای بەرپرسانی پارتی، هەرچەندە سەردانی لاینەكانی تری كردووە لەهەمان كات، بەڵام پارتی بۆ ئەو لەهەمویان گرنگترە و چارەسەری كێشەكانی نێوان عێراق و هەرێم لای پارتییە بۆیە گفتوگۆكان زیاتر لە گۆڕەپانی ئەو حزبەن.
لەلایەكی تر گەڕانەوە بۆ لای كورد بۆ بەدەستهێنانی متمانەی زیاتر و پاڵپشتی كردنی كابینەكەیەتی و خۆنزیك كردنەوە لە حزبێكی وەك پارتی بەئەگەرێكی زۆرەوە كابینەكەی سەركەوتوو دەبێت و پاڵپشتیێكی ناوخۆیی و دەرەكی بەدەست دەهێنێت، ئەم سەردانە دەبێتە هۆی گەڕانەوەی متمانە لەنێوان حكوومەتی هەرێمی كوردستان و حكومەتی عێراق، هەروها ڕێگا خۆشكەر دەبێت بۆ گفتوگۆ و دیالۆگ لەنێوان هەردوولا، بۆ كابینەی سودانی ئەوە گرنگە نەگەڕێتەوە سەر سیاسەتی كابینەكانی تر كە لەلایەن چەند كەسێكی سیاسەت شۆڤێنی ئیدارەدانی بۆ دەكرا و بەهەموو شێوەیەك لەدژی هەرێمی كوردستان وتاریان دەدا و تۆمەتیان بۆ كورد هەڵدەبەست، لەلایەكی تر بەكەیفی خۆیان بنەماكانی دەستووریان پێشێل دەكردوو كوردیان بێ بەش دەكرد لە مافەڕەوكانیان، وەك بڕینی شایستە داراییەكان و بڕینی بودجەو مووچەی فەرمانبەران، بەڵام پێدەچێت كەسایەتی سودانی پێشتر ئەو تەجڕوبەی وەرگرتبێت لەوانەی پێش خۆێ كەخۆی بەدوور بگرێت لەو جۆرە دژایەتییە بەرامبەر بەكورد.
سودانی بەسیاسەتێكی جیاواز كاردەكات بەبەراورد بەئەوانەی پێش خۆیان لەلایەك بەجدی دەیەوێت لەگەڵ هەرێمی كوردستان كێشەكان چارەسەربكات، كە لەبەرژەوەندی هەردوولادا بێت، لەلایەكی تر دەیەوێت عێراق دووربخاتەوە لەسیاسەتی شیعەگەری بەتایبەتی سیاسەتی ئێران، ئەگەر ئەم كارانە بكاتە بنەمای سەرەكی لەكابینەكەی ئەوە سەركەوتنی محەمەد شیاع سودانی سەركەوتوو دەبێت و بواری بۆ دەرەخسێت لەچوارساڵی داهاتووش كاندیدی بەهێزبێت بۆسەرۆكایەتی حكومەت، هەڵومەرجی سەركەوتنی كورد لێرە دەسپێدەكات كەپێویستە لاینەكان بەتەواوی یەكگرتووبن ئەوە قسەی سەرۆك وەزیرانی عێراق بوو بۆ كورد، هەروها تەئكیدی لەوەش كردەوە كە بەهێزبوونی هەرێمی كوردستان بەهێزبوونی سەرتاپای عێراقە، لەمەو دوا پێویستە لاینە سیاسییەكان كۆبونەوە هاوبەشەكانیان دەستپێ بكەن بۆ دۆزینەوەی ڕێگایەك بۆچارەسەركردنی كێشەكان و هەڵبژاردنی تیمێكی بەهێز لەناو حكوومەت، بۆ گفتوگۆ كردن لەگەڵ حكوومەتی عێراق و بەدەستهێنانی مافەڕەواكان و گێڕانەوەی مادەی ۱٤۰ و شایستە داراییەكان.
