“تێناگەم بۆچى بەرپرسی یانەكان دەستیان دەچێتە قووتدانی سەرەتایترین مافی یاریزان كە مووچەیە”
سەردار قازی ـ رواندز:
لەقۆناخی یەكەمی خولی یانە پلە یەكەكانی كوردستان، تاكە هیوای رواندزییەكان بوو، ئاخر گەر ئەو نەبوایە بۆنا حاڵی یانە زەرد پۆشەكەكەی پایتەختی میرنشینی سۆران لەوەی بوو خراپتر تۆمار دەكرا.
نیوەی یەكەمی خولی یانە پلە یەكەكان كەس خۆزگەی بەدۆخی یانەی رواندز نەدەخواست، بەشێوازێك بڕستی هیوا لەقورگی هاوسۆزانی پچڕابوو دڵەكوتەی ئەوەیان بوو كە چۆن دوای حەیامێك چاوەوڕوانی لەخولی یانە پلە دووەكانەوە سەركەوتوون بۆ پلە یەك ئاواهیش دەگەڕێنەوە شوێنی خۆیان.
بوونی سەركردەیەكی بەجەرگ لەهێڵی بەرگری یانەكە، كە ئامادەبوو خوێنی لێ بچۆڕێ لەتاو پاراستنی گۆڵی رواندز، ورە و هێزێكی نەبڕاوە بوو بۆ ئەوەی لەقۆناخی دووەمی ركابەیدا هەناسەیەكی ئارام هەڵمژن.
مەڕوان جەواد ئەحمەد، لەدایكبووی ساڵی ١٩٩٢ ـی شاری كفری دەڤەری گەرمیانە، ماوەی ١٥ ساڵە یاریی تۆپی پێ دەكات و لەئێستادا بەرگریكاری یانەی رواندزە.
سەرەتای یاریكردنی دەگەرێتەوە بۆ ساڵی ٢٠٠٨ كە لە تیپی میللی یەلدرم خۆری مەڕوان وەنەوزی دا و دواتر بۆ تیپی میللی رزگاری یاریی كردووە، پاشان لە ساڵی ٢٠١٢ پەیوەندی بە یانەی كفرییەوە دەكات و ئەزموونی یاریكردنی لەو یانەیە گەشە دەكات.
لەپاڵ خولەكانی كوردستان، بینەرێكی باشی پرێمەرلیگە، هاندەری یانەی مانچێستەر سیتی و هەڵبژاردەی ئارجێنتینایە.
وەفاداری وەزیری بەرگری رواندز، لەئاستێكدایە، ناوی سەرجەم ئەو راهێنەرانە دەهێنێت بۆ باشترین، كە یاریی بۆ كردوون.
مەڕوان، دەڵێت: “فازڵ عەباس، دارا محەمەد، محەمەد فاتح، دڵشاد محەمەد، نیهاد موراد، نیهاد جاسم و سۆران نامیق. باشترین راهێنەرن بەبڕوای من.”
بەرگریكارەكەی یانەی رواندز ئەوەش دەڵێت: “لە كوردستان زەمینەسازی نەكراوە و ناكرێت بۆ ئەوەی بەئاسانی لەنێو وەرزشدا گەشە بكەیت، بەڵام سەرەڕای ئەوەش ئاستی وەرزش بەردەوام هەڵدەكشێت.”
پێشی وایە، “هاندانی یاریزانانی تازەپێگەیشتوو ئەركێكی گرنگە و بە بوونیاتی كۆمەڵگە و یانەكان ناویان دەبات.”
بەراورد بە رابردوو وەرزشوانی لێهاتوو كەمی كردووە، مەڕوان جەواد هۆكارەكەی باس دەكات: “چونكە یانەكان وەك پێویست مافی دارایی بە یاریزان نادەن، وەك چۆن تۆپی پێ واتای ڕیز و خۆشەویستییە، لەهەمان كاتدا حەز و ئارەزوو و سەرچاوەی داهاتیشە. نازانم چۆن بەرپرسی یانەكان دەستیان دەچێتە قووتدانی سەرەتایترین مافی یاریزان كە مووچەیە.”
سەرباری ئەوەش هیوابڕوا نییە و هیوادارە تۆپی پێی كوردستان بۆ ئاراستەی پزەتیڤتر هەنگاو بنێت و یاریزانی ئاست بەرز ببینرێن لە خولەكانی كوردستان كە ئامانجییان یاریی كردن بۆ هەڵبژاردەی كوردستان و عێراق بێت.
لە پەراوێزی پەیڤەكانیدا مەڕوان جەواد نهێنییەك بۆ زاری كرمانجی دەخاتەڕوو: “تەنها چەند یارییەكی كەمم لەگەڵ یانەی رواندز ئەنجامدابوو، دەیان یانەی یانەی دیاری كوردستان هاتنە سەرهێڵ، تەنانەت دوای تەواو بوونی قۆناخی یەكەم و كرانەوەی دەرگای ئاڵوگۆڕی بەرپرسی یانە هەبوو فشاری خستووەتە سەرم تا مافی دەستبەرداربوون لەیانەی رواندز وەرگرم، بەڵام ئەو بیرۆكەیەم رەتكردەوە و بەردەوام بووم.”
ئەوەش دەڵێت: “لەرواندز واهەستەكەم لەكفری ـم، خوم بەو شارەوە گرتووە خەڵكانێكی زۆر نایابی لێن، كە گیانی هاوكاری و میواندارییان لەترۆپكدایە وەك رۆڵەی خۆیان سەیرمان دەكەن. هاندەران بەجۆرێك سەپۆڕتم دەكەن وەك ئەوی ساڵانێكی زۆربێت لەم یانەیە خزمەت بكەم، ئەمانە وزەیەكی خۆڕسك بۆم دروستەكەن تا بەتینتر لەپێناو رواندز بجەنگم.”
