زاری كرمانجی :
مەكتەبی سیاسیی پارتی دیموكراتی كوردستان بە بۆنەی 31 ەمین ساڵیادی راپەرێنەوە راگەیەنراوێكی بڵاوكردەوە و ئومێدەوارە تەواوی هێز و لایەنە سیاسییەكان لەسەر ئاستی هەرێم، هەماهەنگی زیاتر بكەن و نەخشەڕێگایەكی گونجاو دابڕێژن بۆ چارەسەركردنی پرس و كێشە هەنووكەییەكان و هەوكات داواكارە لەسەر ئاستی عێراقی فیدراڵیش تاكوو جارێكی دیكە كێشە و قەیرانەكان دووبارە نەبنەوە، دانوستان لەگەڵ حكومەتی فیدراڵ رێچكەی راستی خۆی بگرێ بۆ چارەسەركردنی بابەتە گرنگەكانی ئەمڕۆ لە ئارادان وەك پرسی بودجە و شایستە داراییەكانی هەرێم و بابەتی نەوت و پرسە هەڵواسراوەكانی دیكە.
دەقی پەیامی مەكتەبی سیاسیی پارتی دیموكراتی كوردستان:
(5)ی ئادار، ڕۆژێكی پڕ واتا و گرنگە لە بزاڤی ڕزگاریخوازیی گەلەكەمان و سەرجەم كوردستانیانی بەوەفا و خۆڕاگر و، وەرچەرخانێكی دیكەی بوو زنجیرەی خەباتی نەسرەوتووی گەلەكەمان بە هەموو چین و توێژ و پێكهاتەكانیەوە.
ئەو راپەڕینە، كە هەمیشە مایەی شانازییە بۆ مێژووی بزووتنەوەی ڕزگاریخوازیی كورد بۆ گەیشتن بە ئامانجە رەواكانمان و بەدیهێنانی مافە زەوتكراو و پێشێلكراوەكانمان، بەرهەمی تێكۆشان و خوێنی ڕۆڵەكانی گەلەكەمان و پێشمەرگە دلێرەكان بوو.
راپەڕینە شكۆدارەكەی (5ـی ئادار) بە بڕیاری بەرەی كوردستانی و سەركردایەتی سیاسی و هێز و لایەنە سیاسییەكانی كوردستان و بە بەشداری جەماوەری دڵسۆز بەرنامەی بۆ داڕێژراو، لە (5ـی ئاداری 1991) لە شاری رانیەی دەروازەی راپەڕین لە چەخماخەی دا و دواتر سەرجەم شار و شارۆچكەكانی كوردستانی گرتەوە بە كەركوكی دڵی كوردستانیشەوە.
راپەڕین، زەروورەتێكی مێژوویی و هەنگاوێكی بوێرانە و رەوای گەلەكەمان بوو، پاش ساڵەهای ساڵ لە خەبات و قوربانیدان ئەو سەركەوتنە مەزنە بەدەست هات و، كوردستانیان سەلماندیان كە دواجار بە بیروباوەڕی راستەقینەی نیشتیمانپەروەی و خۆڕاگری و گیانی شۆڕشگێڕیانە گەلی ستەمدیدە هەر بە ئامانجەكانی خۆی دەگات.
لە دەستكەوتە هەرە گرنگە سیاسییەكانی راپەڕین بونیاتنانی ئەزموونێكی نوێی فەرمانڕەوایی بوو، كە بڕیاردان بوو لەسەر سیستەمی سیاسی فیدراڵیی، هەروەها لە (19ـی5ـی1992) ئەنجوومەنی نیشتیمانیی كوردستان هەڵبژێردرا و حكومەتی كوردستان پێكهات بۆ بەڕێوەبردن و هەڵسووڕاندنی كاروبارەكانی هەرێم.
بەدرێژایی ئەو ئەزموونەی هەرێمی كوردستان كە شەرعیەتی یاسایی خۆی هەیە، ئامانجەكانی گەلەكەمان و كوردستانییان لەو هەرێمەدا بە پێی كارنامەی كابینەكانی حكومەت دەهاتە دی لە رێگەی پڕۆژە گرنگ و ستراتیژییەكان بۆ بونیاتنانەوەی ژێرخانی ئاوەدانی و بونیاتنانەوە و بژێوی هاووڵاتیان، هەروەها تێكڕای بوارەكانی ئاسایش و پیشەسازی و تەندروستی وكشتوكاڵ و پەروەردە و گەشتیاری و پڕۆژە خزمەتگوزارییەكانی دیكە.
هاووڵاتییانی بەڕێز..
ئەمڕۆ هەلومەرجی سیاسی كوردستان و عێراق و ناوچەكە لەبەردەم كۆمەڵێك گۆڕانكاری ئەوتۆ دایە، كە چارەنووسی هەرێم و هاووڵاتیانی پێوە بەندە، بۆیە زیاتر پێویستمان بە هەماهەنگی و هاودەنگییە بۆ ئەوەی رۆڵی گرنگی خۆمان ببینین و پێگەی سیاسی و دیپلۆماسیانەی هەرێم بەهێزتر بكەین.
لەسەر ئاستی هەرێم ئومێدەرارین هەموو هێز و لایەنە سیاسییەكان هەماهەنگی زیاتر بكەن و نەخشەڕێگایەكی گونجاو دابڕێژن بۆ چارەسەركردنی پرس و كێشە هەنووكەییەكان، لەسەر ئاستی عێراقی فیدراڵیش تاكوو جارێكی دیكە كێشە و قەیرانەكان دووبارە نەبنەوە، دانوستان لەگەڵ حكومەتی فیدراڵ رێچكەی راستی خۆی بگرێ بۆ چارەسەركردنی بابەتە گرنگەكانی ئەمڕۆ لە ئارادان وەك پرسی بودجە و شایستە داراییەكانی هەرێم و بابەتی نەوت و پرسە هەڵواسراوەكانی دیكە.
لەو یادە شكۆمەندەدا، ئێمە لە پارتی دیموكراتی كوردستان، وەك هەمیشە لە سەر هەمان پرەنسیپ و پەیامی راست و دروستی پارتەكەمان جەخت لەسەر رێكخستنی نێو ماڵی نێوخۆیی كوردستان دەكەینەوە و داوادەكەین بە هەموو لایەك هەوڵ و كۆششمان یەك بخەین و بەرپرسانە كاربكەین بۆ ئەوەی بەرژەوەندی باڵای گەلەكەمان و ئامانجە نزیك و درێژخایەنەكانمان لە ئەولەویەتی بەرنامە و كارنامەكانمان بێت.
بۆ ئەوەی رۆژی (5ـی ئادار) وەك یادێكی ئاسایی و تەنیا بۆنەیەكی مێژووی رەت نەبێ، بەڵكو هەمیشە مایەی شانازیمان بێت، پێویستە دەرهاویشتە و وانەو و دەرەنجام و دەستكەوتەكانی هەمیشە هاندەر و رێنیشاندەرمان بن بۆ یەكڕیزی و هەماهەنگی زیاتر و بنەما ئەرێنییەكانی پەیڕەوبكرێن بۆ بەدیهاتنی مافەكانمان و لە خزمەت بەرژەوەندیی گشتی دابن.
بەو بۆنەیەوە جارێكی دیكە بە دڵنیاییەوە بەڵێن دەدەین و پێدادەگرین لەسەر بەرژەوەندییە باڵاكانی گەلەكەمان و بەردەوام بوون لەسەر كار و ئەركە نەتەوەیی و نیشتیمانییەكانمان بۆ داكۆكیكردن لە بنەما راست و دروستەكانی دیموكراسییەت و هەمەڕەنگی و هەمەلایەنی بیروباوەڕی سیاسی و بەرفراوانكردنی پانتایی بەشداریكردنی سیاسی، هەروەها چاكتركردنی باری ئابووری و هەلومەرجی بژێوی رۆژانەی هاووڵاتییان.
لە یادی ڕاپەڕینە شكۆدارەكەی (5ـی ئادار) سەری ڕێز و نەوازش بۆ شەهیدانی كورد و كوردستان سەروەریان بارزانیی نەمر و كاك ئیدریسی هەمیشە لەیاد دادەنوێنین.
سڵاو بۆ جەماوەری خۆڕاگری كوردستان و پێشمەرگە دلێرەكان كە هەوێنی سەركەوتنی ڕاپەڕین بوون..
دروود بۆ شەهیدانی ڕاپەڕینە شكۆدارەكەی (5ـی ئادار).
سڵاو بۆ شەهیدانی بزووتنەوەی ڕزگاریخوازیی كورد و كوردستان.
هەر مەزن و شكۆدار بێت هێزی لەبننەهاتووی جەماوەر و بیرەوەری (5ـی ئاداری1991).
مەكتەبی سیاسیی
پارتی دیموكراتی كوردستان
4ـی3ـی2023
