دیدار- شەهلا رەشید
لەسنووری ئیدارەی سەربەخۆی سۆران ژمارەیەكی بەرچاو لە خۆبەخشان، وەك ئەركێكی مرۆڤانە خوێن بێبەرامبەر دەبەخشن و ئامادەن هەركەس پێویستی بەخوێن بێت بۆی دابین بكەن.
شاسوار رەمەزان شیخە، هاووڵاتییەكی دانیشتووی شاری سۆران، بۆ زاری كرمانجی دەڵێت، ماوەی 10 ساڵە بێ بەرامبەر خوێن دەبەخشم، تەمەنم 43 ساڵە و پێشمەرگەمە، گروپی خوێنم O- ئەندامی رێكخراوی بەخشینی خوێن و ژیانم و تا ئێستا زیاتر لە 13 بوتڵ خوێنم بەخشیوە، ئامانجی من تەنها كاری خێرخوازییە بۆ ئەو كەسانەی كە پێویستیان بە خوێنی من هەیە، كاتێ خوێن دەبەخشم هەست بە ئارامی دەكەم و دڵ و دەروونم ئاسوودە دەبێت، دەمەوێ هەر بەردەوامیش بم و دەستخۆشی لەو كەسانە دەكەم كە خوێن دەبەخشن”.
ئەم خوێن بەخشە داواكارە لەو كەسانەی لە توانایاندا هەیە خوێن ببەخشن، چونكە لەو كاتەدا تۆ ژیانی كەسێك لە مردن رزگار دەكەی و هەناسەی پێدەبەخشییەوە، كارمەندانی تەندروستیش شایستەی ئەو پەڕی رێزن كە لەكاتی بەخشینی خوێن ئاسانكاریمان بۆ دەكەن و پێشوازیمان لێدەكەن”.
شاسوار رەمەزان، داواكاریشە لە رێكخراوی بەخشینی خوێن و ژیان، جار بەجار ئەندامانی كۆبكاتەوە لە شارو شارۆچكەكان و قسەو گفتووگۆ لەسەر ئەم كارە مرۆڤ دۆستانە بكەن و رێنمایش بە خوێن بەخشان بدرێت.
