پێویستە لایەنەكان ئاستەنگ بۆ بەڕێوەچوونی هەڵبژاردن دروست نەكەن
با سندووقەكانی دەنگدان دادوەر بن
زاری كرمانجی – بارزان:
بەهرام عەریف یاسین ئەندامی كۆمیتەی ناوەندی پارتی و بەرپرسی لقی 10ی سۆران، رایگەیاند:” ئێمە وەك پارتی لەگەڵ ئەنجامدانی هەڵبژاردنین، لە داهاتوویەكی زۆر نزیكیشدا سەرۆكی هەرێمی كوردستان كاتەكەی دیاری دەكات، پێمان باشە سندووقەكانی دەنگدان دادوەربن و رێگە بدرێت خەڵكی ئێمە ئیڕادە و خواستی خۆیان بۆ چۆنیەتی ئیدارەدان و حكومڕانی ئەو هەرێمە لە داهاتوودا دیار بكەن و رێز لە ئیڕادەی خەڵكی هەرێمی كوردستان بگیرێت، پێویستە هەموو هێز و لایەنەكان راچاوی دۆخی هەرێم بكەن و هیچ بیانووەك و بەربەست نەیەخنە بەردەم ئەنجامدانی هەڵبژاردن، رێز بگرین لە خواستی تێكڕای خەڵكی هەرێمی كوردستان .
بەهرام عەریف یاسین، لە چوارچێوەی سەردانی بۆ مەزاری نەمران لە بارزان، وتارێكی پێشكەش كرد گووتی:” ئەمڕۆ لە بارزانی مەڵبەندی كوردایەتین، لەگەڵ ئەندام و لایەنگرانی سنووری لقی 10ی پارتیمان، بەرپرسانی دام و دەزگاحكوومی و حزبی و سەربازییەكان، پیاوانی ئاینی، مامۆستا و قوتابییان و سەرجەم چین و توێژەكانی ئیدارەی سۆران هاتووین دووپاتی دڵسۆزی و وەفاداری خۆمان بكەینەوە بۆ رێبازی پیرۆزی بارزانی ئەو رێبازەی ” بارزانی نەمر ” و كاك ئیدریسی هەمیشە لە یاد، هەموو ژیانی خۆیان بۆ كوردایەتی و گەشە سەندن و بەردەوامی رێبازی كوردایەتی بەخت كرد.
بەرپرسی لقی 10ی پارتی لە سۆران، دووپاتی لەوە كردەوە، رێبازی بارزانی ئەمڕۆ لە هەموو كات بەهێزترە، بۆ چارەسەر كردنی كێشەكانی نێوخۆی و تەنانەت كۆمەڵگەی نێودەوڵەتیش بۆچوون و رای سەرۆك بارزانی بەهەند وەردەگرێت و هەمیشە فریاد رەسی كێشەكان بووە، لە كاتە هەستیارەكادا بەردەوام هەمووانی لەسەر مێزی گفتووگۆ كۆكردۆتەوە و نەیهێشتووە وڵات بەرەو لێكترازان بچێت، هەر لەو رێبازەیە، سەرۆكی هەرێم و سەرۆكی حكومەتی هەرێمی كوردستان بەو پەڕی توانایانەوە هەوڵ دەدەن خزمەتی كوردستان و دانیشتوانانی بكەن، بە شێوەیەكی پێویستە ئاڕاستەی هەموو لایەكمان بۆ ئەو ئامانجانە بێت، كە رێبازی پیرۆزی بارزانی و پارتی دیموكراتی كوردستان لەپێناویدا دامەزراوە .
بەهرام عەریف یاسین ئەندامی كۆمیتەی ناوەندی پارتی و بەرپرسی لقی 10ی سۆران، گووتیشی:” ئێمە بە هەموو شێوەیەك پشتگیری حكومەتی هەرێمی كوردستانین، ئاسانكاریان بۆ دەكەین تا لە كارەكانیان سەركەوتووبن تا بتوانن لە رێگەی تیمەكانیان باشترین خزمەت بە خەڵكی كوردستان بكەن، هیوادارین شاندی دانوستاندكاری كوردستان لە گەڵ حكومەتی عێراق بگەنە رێكەوتنی كۆنكرێتی و كۆتایی، تا بتوانرێت سەرجەم كێشەكان لە گەڵ حكومەتی ناوەندی كۆتای پێ بهێندرێت بە تایبەت پرسی نەوت و گاز، بوددجە، ناوچە دابڕێندراوەكانی دەرەوی ئیدارەی كوردستان و كێشەكانی دیكەش لە رێگەی گفتووگۆوە چارەسەر بكرێن و ئەم وڵاتە بەرەو كەنارێكی ئارامترببەین”.
