كوردانی پارچەكانی دیكە سوپاسی سەرۆك بارزانی دەكەن كە هەردەم لە رۆژانی تەنگانەدا بە دەم بانگەوازیی ئەوان چووە
محەمەد هەسنانی- سۆران:
هاووڵاتییانی باكوور و رۆژئاوای كوردستان، هەڵوێستی مرۆڤدۆستانەی حكوومەتی هەرێَم بەرزدەنرخێنن، لە بەهاناوەچوون و پێشكەشكردنی كۆمەك و هاوكارییەكان بە لێقەوماوانی بوومەلەرزەكەی باكوور و رۆژئاوای كوردستان، سوپاسی سەرۆك بارزانی دەكەن كە هەردەم لە رۆژانی تەنگانە بە دەم بانگەوازیی ئەوانەوە چووە.
محەمەد رەئوف سیراجەدین، چالاكوانی مەدەنی و خەڵكی باكووری كوردستان، بە زاری كرمانجی راگەیاند: دڵخۆشین بەم هەڵوێستە مرۆڤدۆستانەی خەڵكی هەرێمی كوردستان، كە لەسەر فەرمانی مەسرور بارزانی، سەرۆكی حكوومەتی هەرێمی كوردستان، لە شار و شارۆچكەكانی كوردستان دەست كرا بە كۆكردنەوەی كۆمەك و هاوكاریی بۆ لێقەوماوانی بوومەلەرزەكەی باكوور و رۆژئاوای كوردستان، لە ئیدارەی سۆرانیش لە ژێر چاودێری سەرپەرشتیاری ئیدارەی سەربەخۆی سۆران، هەڵمەتێكی فراوان دەستی پێكرد، خەڵكی مرۆڤدۆست و خێرخواز دەستیان كرد بە بەخشینی كۆمەك بۆ لێقەوماوان و خوشك و براكانیان لە باكوور و رۆژئاوا.
گوتیشی: زۆربەی دانیشتووانی باكووری كوردستان جگە لە زیانی زۆری ماددی و ماڵوێرانی بوومەلەرزەكە خزم و كەس و كاریان بوونەتە قوربانی لە رۆژئاواش بە هەمانشێوە، رۆژبەرۆژ ئاماری قوربانیان روو لە زیاد بوونە، تەنانەت لە باكووری كوردستان 12 كەس لە خزم و خانەوادەی ئێمە بوونەتە قوربانی.
دەشڵێت: خەڵكی هەرێمی كوردستان مرۆڤدۆست بوونە و هەمیشە باوەشیان كراوە بووە، بۆ بەهاناوەچوون و پێشوازی كردن لە ئاوارە و پەنابەران، ئەگەر سنووری ئیدارەی سۆران بە نموونە بهێنینەوە، بە سەدان خێزانی پارچەكانی دیكەی كوردستان روویان تێكردووە و هاوشێوەی خەڵكی دەڤەرەكە ژیان و گوزەرانیان هەیە، لە شۆڕش و راپەڕینەكانیشدا پێشەنگ بووە، بۆیە پێویستە هەمووان تایبەتمەندی هەرێمی كوردستان لەبەرچاو بگرن و پشتگیری و پشتیوانی لێبكەن، كە ماڵ چەترێكە بۆ پارێزگاری كردن لە دانیشتووانی هەر چوار پارچەی كوردستان.
مەمەد عەبدوڵڵا، چالاكوانی مەدەنی رۆژئاوای كوردستان، بە زاری كرمانجی گووت: لە بوومەلەرزەكەی ئەمجارەی باكوور و باشوری كوردستان، حكوومەتی هەرێمی كوردستان بە كردار سەلماندی كە چەند مرۆڤ دۆست و پەرۆشە بۆ بەهاناوەچوونی لێقەوماوان، هەروەك یەكەم تیم و كاروانی كۆمەك و هاوكارییەكان بەسەرپەرشتی سەرۆك بارزانی و حكوومەتی هەرێمی كوردستان بۆ لێقەوماوانی ئەم رووداوە گەورەیە رەوانە كرا، لەگەڵ ئەوەشدا كەمپینی كۆمەك و هاوكارییەكان لە زۆربەی شارو شارۆچكە و ناوچەكانی حكوومەتی هەرێم راگەیەندرا، ئەمانە هەموویان شایستەی رێز و ستایشن.
ئەوەش دەخاتەڕوو: ئەم كۆمەك و هاوكاری و بەهاناوەچوونی سەرۆك بارزانی، حكوومەتی هەرێمی كوردستان و دەزگای خێرخوازیی بارزانی، وەڵامێك بوو بۆ ئەو حیزب و كەسانەی كە ویستوویانە هەمیشە ناوی هەرێمی كوردستان لە كەدار بكەن، چونكە خەڵك ئیتر لەوە تێدەگەن كە هەرێمی كوردستان چەند دڵسۆز و مرۆڤ دۆستە بۆ بەهاناوەچوونی خەڵكی ماڵوێران و لێقەوماو، بۆیە تا ماوین سوپاسی سەرۆك بارزانی و حكوومەتی هەرێم دەكەین.
نوری بریمۆ، ئەندامی كۆمیتەی ناوەندی پارتی دیموكراتی كوردستانی سووریا، بۆ زاری كرمانجی دەڵێ: لە كاتی تەنگانەدا هەر دەم سەرۆك بارزانی و هەرێمی كوردستان بە هانای رۆژئاوای كوردستان چووە، ئەگەر لەبەر هەرێمی كوردستان نەبوایە ماوەیەكی زۆر دەبوو شتێك نەمابایە بەناوی رۆژئاوا، ئەو خەڵكەی پەنابەریش بووە نەیان دەزانی روو لەكام شوێن بكەن، بۆیە خەڵكی رۆژئاوا تا ماون سوپاسی سەرۆك بارزانی دەكەن و هەڵوێستەكانی بەرز دەنرخێنن.
عەباس ئەمیر، بەڕێوەبەری كۆچ و كۆچبەران و قەیرانەكان لە ئیدارەی سۆران، بە زاری كرمانجی گوت: دوای راپەڕینی 1991 و ئازادكردنی شار و شارۆچكەكانی كوردستان، دەرفەتی زیاتر بە خەڵكی پارچەكانی دیكەی كوردستان درا و هەرێمی كوردستان بووە پەناگەیەك وەك ماڵی خۆیان سەیری بكەن و تیادا نیشتەجێبن.
بەڕێوەبەری كۆچ و كۆچبەران و قەیرانەكان لە ئیدارەی سۆران، گوتیشی: ئەگەر سنووری ئیدارەی سەربەخۆی سۆران وەك نموونە بهێنینەوە چەندین خێزانی پارچەكانی دیكەی كوردستان تیادا نیشتەجێن، لە ئێستاشدا زیاتر لە 300 خێزانی رۆژئاوای كوردستان و سەدان خێزانی باكووری كوردستان و چەندین خێزانی رۆژهەڵاتی كوردستان لە دەڤەری سۆران ماون و ژیان و گوزەرانی خۆیان بەڕێدەكەن و خواستی گەڕانەوە ناكەن، ئێرە بە ماڵی خۆیان دەزانن كاتێك دەبینن رێزیان دەگیرێت و پارێزگاری لەسەر و ماڵیان دەكرێت.
عەباس ئەمیر، ئاماژەی بەوەشدا: لە كاتی روودانی هەر رووداوێكی سرووشتی بەهانای خەڵكی وڵاتان و لێقەوماوانی پارچەكانی دیكەی كوردستان چووە، هەروەك دوای رووداوی بوومەلەرزەكەی باكوور و رۆژئاوا، لەسەر راسپاردەی سەرۆكی حكوومەتی هەرێمی كوردستان دەستكرا بە كۆكردنەوەی كۆمەك و هاوكارییەكان بۆ لێقەوماوان و ئەم جۆرە كارە مرۆڤدۆستانەش بەردەوامیان دەبێت”.
