یانەی وەرزشی رواندز “لەگەڵ دەستبەكاربوونی ئیدارەی سەربەخۆ وەرزشوانان هەستیان بە بوونی خۆیان كرد”
سەردار قازی – رواندز:
رێكەوتی 14 ـ 9 ـ 2021 لە مەراسیمێكدا لە قەزای سۆران بە ئامادەبوونی سەرۆكی حكوومەتی هەرێمی كوردستان، مەسرور بارزانی ئیدارەی سەربەخۆی سۆران راگەیەندرا و هەڵگورد شێخ نەجیب كە ئەو كات قایمقامی قەزای سۆران بوو وەك سەرپەرشتیاری ئیدارەی سەربەخۆی سۆران دیاركرا و لەلایەن سەرۆكی حكومەتەوە نامەی دەستبەكاربوونی پێ بەخشرا.
دوای دوو رۆژی تر ساڵێك تێپەڕ دەبێ بەسەر راگەیاندنی ئیدارەی سەربەخۆی سۆران، زاری كرمانجی وەك پیشەیی هەمیشەیی رەیی تەواوی بەرپرسان و بەرێوەبەرانی فەرمانگە حكومییەكان و بەشێك لە دانیشتووانی سنووری ئیدارەكە وەردەگرێ لەسەر دەستكەوت و شێوازی كاركردنی ئیدارەكە لە ماوەی ساڵێكی تەمەنی.
یانەی ڕواندز، یەكێكە لە نوێنەرەكانی ئیدارەی سەربەخۆی سۆران لە خولی یانە پلە یەكەكانی كوردستان، ئەوان پێیان وایە بنیاتنانی ئیدارەی سەربەخۆی سۆران، پاڵنەرێكی گرنگ بوو بۆ ئەكتیڤبوونەوەی جووڵەی وەرزشی.
هیمداد نەسرەدین، گوتەبێژی یانەی وەرزشی ڕواندز بۆ زاری كرمانجی باسی گرنگییەكان دەكات:” لە ماوەی ئەو ساڵەدا وەرزشوانان و دامەزراوە وەرزشییەكان، هەستیان بە بوونی خۆیان كرد، بەوەی كەسێكی وەك شێخ هەڵگورد، خاوەن عەقڵێكی كراوە و هەڵگری كۆمەڵێك پرەنسیپ ی ئیدارە دان و دەوڵەتداری وەك نمایندەی بەڕێز سەرۆكی حكومەت بەدەم خواست و ویست و داواكانیان دێت. لە ماوەی ئەو ساڵەدا هاوكاری و پاڵپشتی پێشكەش بە گشت یانەكان كرد، چونكە لەنزیكەوە ئاگادارم كە چ پرۆژەیەكی گرنگ و زانستی باشی هەیە بۆ ئەوەی یانە وەرزشییەكان لە داهاتوودا لە ڕووی دارایی و توانای مرۆیی لەسەر پێی خۆیان بوەستن.”
درێژەی پێ دەدات:” پلانی ئیدارەی سەربەخۆی رەهەندێكی گرنگی لەخۆگرتووە بەوەی یانەكان بتوانن لە ڕووی دارایی پشت بە خۆیان ببەستن و لە بنەڕەتدا كێشە وەرزشییەكان لەو دەڤەرە نەمێنێت، ئێمەش دەبێت بە هەموو لایەك هاوكار و پاڵپشت بین بۆ ئەوەی لەداهاتوودا وەرزشی ئەو دەڤەرە بگەینە ترۆپكی سەركەوتن و خۆمان و نەوەكانی داهاتووش شانازی پێوە بكەن”.
