“هجوم خۆبەخشانە بەكەڵكی هەمووان هاتووە، بەڵام ئێستا هیچیان ئامادەنین، ئەجری بەشێك لەو ماندوو بوونەی بدەنەوە”
سەردار قازی– رواندز :
دوای بەدواداچوون و بەسەركردنەوەی هجوم ئیلیاس، گۆڕ هەڵكەنە خۆبەخشەكەی سنووری قەزای رواندز لەلایەن زاری كرمانجی ـەوە، ئەفسەرێكی وەزارەتی پێشمەرگە ئامادەگی نیشانداوە هاوكاری دارایی بكات بەمەبەستی كڕینی ئوتومبێلێكی شایستەتر بۆ گواستنەوەی كەل و پەلەكانی بۆ گۆڕستانەكان.
سێبوور موستەفا، دانیشتوویەكی قەزای رواندزە، لەرۆژانی رابردوو لەسۆشیال میدیا هەڵوێستی لەمەڕ ئەو پرسەی هجوم ئیلیاس نواند و راگەیاند، كە ئامادەیە بڕێك پارە ببەخشێتە ئەو گۆڕهەڵكەنە خۆبەخشە.
هجوم، ماوەی 40 ساڵە خۆبەخشانە و بێ بەرانبەر كاری گۆڕ هەڵكەنی دەكات، ئەوەندە گۆڕی هەڵكەندووە نازانێت ژمارەی ئەو گۆڕانەی لێداوە چەندن، بەڵام باس لەوە دەكات كە گۆڕی بۆ سەرووی 70 % ئەوانە لێداوە كە لە ماوەی رابردوودا لەسنووری قەزاكە ژیانئاواییان كردووە.
دەقی هەڵوێستەكەی سێبوور موستەفا، بۆ ئەو گۆڕهەڵكەنە بەم شێوەیە بوو: “داواكارم لەخەڵكی رواندز با بەهەموومان هاوكاربین خۆم زیاتر لە هەزار دۆلار دادەنێم. وەك وەفایەك بۆ كاك هجوم تا بتوانین “پیكاب مەرزیە”یەكی بۆ بكڕین بۆئەوەی كەلوپەلی گۆڕ هەڵكەندن پێ بگوازێتەوە، چونكە كەس نییە ئازیزەكی بەقۆڵی ئەم پیاوە بەخاك نەسپاردرابێت، هەركەسەی حەزەكات بەشدار بێت با بەپێی توانای خۆی بڕی پارەكەی دیاری بكات لەگەڵ ژمارە تەلەفۆنی، ئینجا لیژنەیەك پێكبهێنین، بەمەبەستی كۆكردنەوە و پێدانی پارەكە بەو خۆبەخشە.
قسەم لەگەڵ سێبوور كرد، لێم پرسی چی وایلێكردیت ئامادەبێت ئەو بڕە بەجارێك ببەخشیتە هجوم ئیلیاس لەوەڵامدا گووتی:”هجوم، سەرەڕای بەجێگەیاندنی ئەركێكی ئەخلاقی و ئایینی، پیاوێكی ژێهاتی و مەردە، هەڵوێستی بەرزی هەن كە جێگەی پێزانین. كاتێك نەنكم كۆچی دوایی كرد، تیا مابووم كە چۆن و بەكێ بڵێم بۆ ئامادەكردنی گۆڕ، ئینجا ئەو پیاوەم هاتە خەیاڵ پەیوەندیم پێیەوەكرد، بەماوەیەكی كەم خەمی ئێمە كەم كردەوە و گۆڕەكەی ئامادەكرد.”
سێبوور، درێژەی پێدەدات: “هەڵوێستی ئەو پیاوە یەك و دووان و سەدان نین، تەمەنێكی درێژە بێ بەرانبەر بەكەل و پەل و لەسەر ئەركی خۆی لەهەموو گۆڕستانێك ئامادەیە، بەڵام داخەكەم كە دانیشتووانی ئەم سنوورە هەڵوێستیان نەبوو و تا ئەم ساتە هیچ كەسێك بەدەم ئەو بانگەوازەی من نەهاتووە، لەكاتێكدا هجوم خۆبەخشێكە موڵكی هەمووانە و كەم خانەوادە هەیە خزمەتی نەكردبێت.”
پێم گووت، بەروونی پێم بڵێ دەتەوێ چی بۆ هجوم بكەیت.
سێبوور، ئاماژەی بەوەدا: “دەمەوێ ئوتومبێلێكی جۆری “توێتا هیلۆكس” ـی بۆ بكڕم بەیارمەتی خوا پێداوان و خێرخوازان، چونكە ئوتومبێلی ئێستای ناڕێكە و ناگات بەهەموو گۆڕستانێك، وەك روونیشە ئێرە ناوچەیەكی شاخاوییە و پڕە لەهەوراز و نشێو.”
ئەوەشی دەرخست: “گەر 100 كەس ئامادەبێت لەپاڵ مندا دەسگیرۆیی ئەو پیاوە ماندوو نەناسە بكەن، هەر یەكەی 200 دۆلار دابنێت. ئەوا بەئاسانی دەتوانین ئەجری بەشێكی كەم لەو خزمەتەی بدەینەوە. خۆیش ئامادەیم تێدایە تا 1.500 دۆلار بگرە زیاتری دابنێم بۆ ئەوە ئەم ئەركە مرۆییە.”
هجوم ئیلیاس، بەجۆرێك ئەشقی ئەو گیانی خۆبەخشیەی بووە كە پێشووتر بە زاری كرمانجی گووت، “سەرەڕای ئازاری بەردەوامی پشتم بیرم لەوە نەكردووەتەوە واز لە كارەكە بهێنم، چونكە ئاسوودەیی بە ویژدانم دەبەخشێت و لەگەڵ ئەوەشە كارێكی گەورە و پڕ لە خێرە، جگە لەوەش دەمەوێت لەو رێگەیەوە دوا هاوكاری خۆم پێشكەش بە هەر كەسێك بكەم كە ژیانئاوایمان لێ دەكات.
ئەفسەرەكەی وەزارەتی پێشمەرگە، لەدوا پەیڤەكانیدا، تیشكی خستەسەر ئەوەی، كە لەبەشێكی شار و شارۆچكهكان، هاووڵاتیان لەسەر ئەركی خۆیان حەفارە یان پێداویستی دیكەیان دابینكردووە بۆ گۆڕ هەڵكەنەكان، بەڵام لێرە ئامادەنین ئوتومبێلێك بۆ خۆبەخشێك بگۆڕن.
