زاری كرمانجی-سۆران
چالاكوانێكی كۆمەڵی مەدەنی، هەڵوێستی سەرۆكی حكوومەتی هەرێمی كوردستان بەرزدەنرخێنێت لە بە هاناوەچوونی لێقەوماوانی باكوورو رۆژئاوای كوردستان.
محەمەد رەئوف مهاجيرسیراجەدین، چالاكوانی مەدەنی دانیشتووی شاری سۆران، بە زاری كرمانجی راگەیاند : ” دڵخۆشین بەم هەڵوێستە مرۆڤ دۆستانەی خەڵكی باشووری كوردستان، كە لەسەر فەرمانی مەسرور بارزانی سەرۆكی حكومەتی هەرێمی كوردستان، لە زۆربەی هەرە زۆری شارو شارۆچكەكان دەست كرا بە كۆكردنەوەی كۆمەك و هاوكارییەكان بۆ لێقەوماوانی بومەلەرزەكەی توركياو سوريا، هەروەك لە ئیدارەی سۆرانیش لە ژێر چاودێری سەرپەرشتیاری ئیدارەی سەربەخۆی سۆران، هەڵمەتێكی فراوان دەستی پێكردوو خەڵكی مرۆڤ دۆست و خێرخواز دەستیان كرد بە بەخشینی كۆمەك بۆ لێقەوماوان و خوشك و براكانیان لە باكووری توركیا و رۆژئاوای سوریا، هەروەك حكوومەتی هەرێمی كوردستان هەموو ئاسانكارییەكی كرد بوو، بۆ كۆكردنەوەی كۆمەك و هاوكارییەكان و شێوازی گەیاندن بە لێقەوماوان”.
ناوبراو ئاشكراشی كرد: ” زۆربەی دانیشتووانی باكووری كوردستانى توركيا جگە لە زیانی زۆری ماددی و ماڵوێرانی بومەلەرزەكە خزم و كەس و كاریان بوونەتە قوربانی لە رۆژئاوای سوریاش بە هەمانشێوە، هەروەك رۆژ بە رۆژ ئاماری قوربانیان روو لە زیاد بوون دەكات، تەنانەت لە باكووری كوردستان 12 كەس لە خزم و خانەوادەی ئێمە بوونەتە قوربانی”.
دەشڵێت: ” خەڵكی باشووری كوردستان مرۆڤ دۆست بونەو بە گشتی هەمیشە باوەشیان كراوە بووە، بۆ بەهاناوەچوون و پێشوازی كردن لە ئاوارەو پەنابەران، ئەگەر سنووری ئیدارەی سۆران بە نموونە بهێنینەوە، بە سەدان خێزانی پارچەكانی دیكەی كوردستان روویان تێكردووە و هاوشێوەی خەڵكی دەڤەرەكە ژیان و گوزەران بەڕێدەكەن، لە شۆڕش و راپەڕینەكانیشدا پێشەنگ بووە، بۆیە ئەركە هەمووان ئەم هەرێمی كوردستان لەبەرچاو بگرن و پشتگیری و پشتیوانی لێبكەن، كە ماڵ و چەترێكە بۆ پارێزگاری كردن لە دانیشتووانی هەرچوار پارچەی كوردستان”.
