شۆڕش میران: ئەمساڵ كۆنگرەی قوتابییان دەبەسترێت

سۆران سرێشمەیی- سۆران:
لە دیمانەیەكی هەفتەنامەی زاری كرمانجیدا، شۆڕش میران بەرپرسی لقی سۆرانی یەكێتی قوتابییانی كوردستان، باس لە رەوشی قوتابییان و خستنەڕووی كاروچاڵاكی و بەرنامە و پلانی داهاتوویان دەكات.
لە دەستپێكی قسەكانیدا، شۆڕش میران، بۆ زاری كرمانجی، گووتی:” یەكێتی قوتابییانی كوردستان رێكخراوێكە بۆ خزمەتكردنی قوتابییان دامەزراوە، لەو سۆنگەیەوە لە شەش ساڵی رابردوو وەك لقی سۆرانی یەكێتی قوتابییانی كوردستان كۆمەڵێك كار وچالاكی ئەنجامداوە و بەشێوەكی كرداری هاوكاری و پاڵپشتی ئەو قوتابییانەشمان كردووە كە توانا و بەهرەی جیاوازیان هەبووە، بە تایبەت قوتابی بەهرەدار.
زیاتر گوتی:” یەكێتی قوتابییان بە دروشمی هەمیشەیی كە (زانست، خەبات، داهێنان)ـە، جگە لەوەی هەوڵی تەواومان داوە بۆ پێشخستنی توانای زانستی قوتابییان لە رێگەی پێشبڕكێی زانستی و خوێندنەوەی كتێب..تاد..، هەروەها خۆمان بە داكۆكی كاری سەرسەختی ماف و داواكاری قوتابیان دەزانین كە زنجیرەی پەیوەندی نێوان قوتابییان و راگرایەتی كۆلێژەكان بین، بەدواداچوون بۆ كێشە و گرفتەكانیان بكەین هەر لەژێر رۆشنایی ئەركی سەرەكی خۆمان، چەندین جار لە رێگەی مەكتەبی سكرتارییەتەوە یاداشت و داواكاریمان بۆ پرسی گەڕانەوەی دەرماڵەی قوتابییان داوەتە وەزارەت و لایەنی پەیوەندارەكان، بەڵام دیارە بەهۆكاری گرفتی دارایی تا ئێستا نەتوانراوە ئەو بابەتە چارەسەر بكرێت.
دەربارەی گەڕانەوەی ئەو قوتابییانەی بەهۆكاری جیاواز وازیان لە خوێندن هێناوە، بەرپرسی لقی سۆرانی یەكێتی قوتابیانی كوردستان، روونی كردەوە:” ئەگەرچی شاراوە نییە دانەمەزراندن هۆكارە بۆ پاشڤەچوونی ئاستی زانستی قوتابییان، بەڵام ئێمە هەمیشە داوامان كردووە لایەنی كەم، سێ یەكەمەكان دابمەزرێن، چونكە پێمان وایە، بەدامەزراندنیان جۆرە كەشێك دێتە ئارا كە قوتابی ناچار دەكات بۆ بەدەستهێنانی نمرەی بەرز تێبكۆشێت، بەو جۆرە ئاستی زانستیش بەرەو هەڵكشان دەچێت، بەڵام ئەمە بابەتێكە پەیوەندی بە حكومەتەوە هەیە، خۆشبەختانە لە ساڵانی رابردوو سێ یەكەمەكان دامەزرێندراون و داواكارین ئەو پڕۆسەیە بەردەوامی هەبێت، جگە لەمە بە هاوكاری دەزگای خێرخوازی بارزانی و وەزارەتەكانی پەروەردە و خوێندنی باڵا، هەوڵی دابینكردنی پێداویستی و تەرخانكردنی كرێی هاتووچۆ بۆ ئەو قوتابیانەی وازیان لە خوێندن هێنابوو، لە چوارچێوەی پڕۆژەیەك توانرا ئەم گرفتە چارەسەر بكرێت.”
سەبارەت گرفتی بەشە ناوەخۆییەكانیش، شۆڕش میران ئاماژەی بەوەدا:” دۆخی بەشە ناوەخۆییەكان لە زانكۆی سۆران و سنووری لقی سۆرانی یەكێتی قوتابیانی كوردستان، بە بەراورد بە شوێنەكانی دیكە، لە رووی سكیورتی و خزمەتگوزارییەكانی تر لە ئاستێكی زۆر باشدایە.”
بەرپرسی لقی سۆرانی یەكێتی قوتابیان، كات و ساتی ئەنجامدانی كۆنگرەی قوتابییان ئاشكرادەكات و دەڵێ:” بە ئەگەری زۆر، ئەمساڵ كۆنگرەی قوتابییان دەبەسترێت و جگە لەوەی خوێنی تازە بەبەر هەرسێ رێكخراوی لاوان، قوتابیان وئافرەتاندا دەكرێتەوە، هەروەها لە ڕووی ناوەرۆكیشەوە دەستكاری پەیڕە و پڕۆگرامی ئەو رێكخراوانە دەكرێت، كە گونجاو بێت لەگەڵ دیدی نوێ و سەردەمی ئێستا”.