ئەندازیار فەیسەڵ حوسێن: زیاتر لە 500 میگاوات خواست لەسەر تۆڕی كارەبا بە بەراورد بە وەرزەكانی دیكە زیاد بووە

عاسم مستەفا – چۆمان:

لەگەڵ هاتنی وەرزی زستان خواست لەسەر كارەبای نیشتیمانی زیادی كردووە، ئەمەش وای كردووە كارەبای نیشتیمانی بەشێوەیەكی بەرچاو لە قەزای چۆمانی سەر بە ئیدارەی سەربەخۆی سۆران كەم ببێتەوە، بەو هۆیەوە هاووڵاتییان نیگەرانی دەردەبڕن و داوایی پێدانی زیاتری كارەبا دەكەن.
بەهۆی نەبوونی مۆلیدەی ئەهلی لە گوندەكان و سڕ و سەرمای زستان و شاخاوی بوونی ناوچەكان، گرفتێكی دیكەی بۆیان دروست بووە، گوندنشینان داوا دەكەن، كاتی پێدانی كارەبای نیشتیمانی بە گوندەكان زیاتر بكرێت بە بەراورد بە سەنتەری شارەكان .
لەو بارەیەوە، ئەندازیار رەفعەت عەلی بەرپرسی فەرمانگەی كارەبای چۆمان، بە زاری كرمانجی راگەیاند:” بەهۆی كەمی ڤۆڵتییە و نەبوونی كارەبای پێویست، رۆژانە نزیكەی هەشت كاتژمێر كارەبا هەیە، بەلام هاووڵاتییان لەو بڕە كارەبابەش بە تەواوی سودمەند نابن .
بەرپرسی فەرمانگەی كارەبای چۆمان، ئاشكراشی كرد:” ئەو بڕە كارەبای ئێستا هەیە تەنها هەشت كاتژمێرە، بەڵام لە توانامان دا نییە ئەو هەشت كاتژمێرەش بەتەواوی بە خەڵك بدەین، چونكە چۆمان شوێنێكی دوورە دەستە و تا كارەباكە دەگاتە چۆمان ڤۆڵتەیەكە كەم دەبێتەوە، لەلایەكی دیكەش، خواستی زۆری لەسەرە، هاووڵاتییانیش زیاتر كارەبا بۆ مەبەستی خۆ گەرمكردنەوە بە كاردەهێنن، بۆیە ئەو بڕە كارەبای هەیە ئەویش ناتوانرێ وەك پێویست دابەش بكرێت.
لەبارەی پرسی گەڕانەوەی پارەی زۆر بۆ هاوبەشانی كارەبا، بەرپرسی فەرمانگەی كارەبای چۆمان، روونی كردەوە، ئەوانەی ئەم كێشەییان هەییە پێویستی سەردانی فەرمانگە بكەن بۆ ئەوە پێورەكەیان پشكنینی بۆ بكرێت، تا بزانین چ كێشەیەكی هەیە، بەهۆی هەبوونی شۆرت و هەندێ جاریش بە هۆی كەمی ڤۆڵتی كارەباوە پێەوەرەكە زیاد لە پێویستی خۆی دەخولێتەوە.
گووتیشی:” ئەو پڕۆژانەی كە پێشكەشمان كردووە وە ئەوانەشی كە لە بەر دەستمان داییە لە ئێستادا كاری لە سەر دەكەین، بۆ ئەوەییە كە لە ئایندەیەكی نزیكدا چارەسەری ئەم كێشانە بكەین كە پەیوەندی چۆمانەوە هەییە.
لای خۆیەوە، ئەندازیار فەیسەڵ حوسێن بەڕێوەبەری دابەش كردنی كارەبای ئیدارەی سۆران، بە زاری كرمانجی راگەیاند:” كەمبوونەوەی كارەبای نیشتیمانی بۆ چەند هۆكارێك دەگەڕێتەوە، لەوانە، زۆربوونی خواست لەم كاتەی ساڵ لە سەر كارەبای نیشتیمانی، بەكارهێنانی ئامێرەكانی خۆگەرمكردنەوە، بەهۆی دروست بوونی لۆدی زۆر لەسەر تۆڕەكانی كارەبا، بووەتە هۆی كەمبوونەوەی كاتەكانی كارەبا تا گەیشتۆتە 9 كاتژمێر و نیو، ئەمە لە كاتێكدایە، لە وەرزەكانی دیكەی ساڵ، كارەبای نیشتیمانی لە سنوورەكەمان نزیكەی 17 كاتژمێر كارەبا هەبووە.
بەڕێوەبەری كارەبای ئیدارەی سۆران، ئاشكراشی دەكات، لە وەرزی زستان زیاتر لە 500 میگاوات خواست لە سەر تۆڕی كارەبا بە بەراورد بە وەرزەكانی دیكە زیادی كردووە، نزیكەی 4 هەزار میگاوات كارەبا بوونی هەیە، لەگەڵ تێپەڕبوونی وەرزی زستان كاتژمێرەكانی كارەبای نیشتیمانیش زیاد دەبێت.
گووتیشی:” هەوڵمان داوە كارەبای نیشتیمانی بەشەوان بەو شوێنانە بدەین كە دەرەوەی شارن و مۆلیدەی ئەهلییان نییە، هاووڵاتییانیش دڵنیا دەكەینەوە، لەگەڵ تێپەڕبوونی ئەو مانگە و وەرزی سەرما و سۆڵە، كارەبای نیشتیمانی لە سنوورەكەمان زیاتر دەبێت”.