هونەرمەند مێڤان حەكیم: لە كوردستان پاڵپشتی هونەرمەندان ناكرێت

شەهلا سۆفی – سۆران:

خاوەنی دەنگێكی ئارامبەخش و كەسایەتیێك كە لاسایی كەس ناكاتەوە، گۆرانی هەر كەسێك بڵێتەوە بە ستایل و دەنگی خۆی دەڵێتەوە.
مێڤان حەكیم، گەنجێكی دانیشتووی سۆرانە، چەندین ساڵە گۆرانی دەڵێ، لەگەڵ ئەوەی یەكێك لە بەشداربووانی پڕۆگرامی خۆشترین دەنگ بوو و توانی تا قۆناغی كۆتایی بچێت، دەڵێ، من خەڵكی ناوچەی برادۆستم و دڵخۆشم بەوەی كە بە دەنگەكەم خزمەتی ناوچەكە و هەوادارانی خۆم دەكەم.
سەرەتای كاری گۆرانی گۆتنی دەگەڕێتەوە بۆ ساڵی 2008 كە لە ئاهەنگێك بەشدار بووە و هونەرمەند عەباس عاشق داوای لێكردووە گۆرانی بڵێت، لەو رۆژەوە دەستی بە گۆرانی گۆتن كردووە.
لە وەڵامی ئەوەی كێ پشتگیری كردووە؟ هونەرمەند مێڤان گوتی: سەرەتا باوكم ڕێگر بوو، بەڵام ئێستا باوكم، خانەوادە و هاوسەرەكەم تەواو پاڵشتیم دەكەن، بەڵام هەر لە سەرەتای كارە هونەرییەكەم هونەرمەند عەباس عاشق هاوكارم بووە و هەر ئەویش وای كرد باوكم ڕازی بێت گۆرانی بڵێم، بەڵام بەداخەوە لە كوردستان لەرووی داراییەوە پشتگیری گەنجان و هونەرمەندان ناكرێت، بۆیە بەشێك لە بەهرەمەندان هونەرەكەیان بە شاراوەیی دەمێنێتەوە، تا ئێستا چوار بەرهەمم بڵاو كردوونەتەوە كە یەكەم بەرهەمم لە ساڵی 2015 بەناوی ڕۆندك بوو لە هەشت تراك پێكهاتبوو، كۆتا بەرهەمیش لە ساڵی 2022 بوو كە گۆرانیێكی شاد بوو، مێڤان پێیوایە هەبوونی بەرنامەیەكی وەك خۆشترین دەنگ زۆر پێویستە بۆ دەرخستنی بەهرەكانیان و دەڵێت: دوای بەشداری كردنم لەو پڕۆگرامە هونەرم ناسی و زانیم هونەر واتای چییە، سەبارەت بە هۆكاری بەشداریكردنی لە ئاهەنگەكاندا مێڤان پێیوایە ئێستا گۆرانی گوتن ئاسانتر بووە، چونكە هەموو وشەیەك بەكاردێت لە تێكستەكان كەچی سەرەڕای ئەوەی دەبێت ئەوە بزانین لە ئاهەنگەكان چ جۆرە گۆرانییەك دەڵێین و پێویستە ڕەچاوی ئەوە بكەین كە ئافرەت و منداڵ لە ئاهەنگەكان هەن، بۆیە نابێت هەموو جۆرە تێكستێك بڵێینەوە، هۆكاری بەشداریكردنی هونەرمەندان لە ئاهەنگەكاندا بۆ خراپی باری دارایی هونەرمەندان دەگەڕێتەوە، ئەگەر بمانەوێت بەرهەممان هەبێت پێویستمان بە داهاتێكی باش هەیە، ئەو داهاتەش لەڕێگای ئاهەنگەكانەوە دەستمان دەكەوێت.
لە كۆتاییدا هونەرمەندی گەنج مێڤان حەكیم، باسی لەو بەرهەمە كرد كە ئێستا لەگەڵ چەند هونەرمەندێك كاری لەسەر دەكەن و گوتی: كار لەسەر دوو گۆرانی نوێ دەكەین یەكێكیان بە زاراوەی سۆرانی و ئەوی تر بە زاراوەی بادینی، كارەكان بەرەو كۆتایی دەچن و لە ماوەیەكی نزیكدا بڵاو دەكەینەوە”.