بە بۆنەی ساڵێك تێپەڕبوون بەسەر راگەیاندنی ئیدارەی سەربەخۆی سۆران

سدقی مەحموود سەرۆكی یانەی سۆران :”ئیدارەی سەربەخۆی سۆران رۆڵی باڵای لەپێشڤەچوونی وەرزشدا هەبووە”

سەردار قازی ـ ئیدارەی سۆران:

رێكەوتی 14 ـ 9 ـ 2021 لە مەراسیمێكدا لە قەزای سۆران بە ئامادەبوونی سەرۆكی حكوومەتی هەرێمی كوردستان، مەسرور بارزانی ئیدارەی سەربەخۆی سۆران راگەیەندرا و هەڵگورد شێخ نەجیب كە ئەو كات قایمقامی قەزای سۆران بوو وەك سەرپەرشتیاری ئیدارەی سەربەخۆی سۆران دیاركرا و لەلایەن سەرۆكی حكومەتەوە نامەی دەستبەكاربوونی پێ بەخشرا.
ئیدارەی سەربەخۆی سۆران 5 یانەی وەرزشی لەخۆ دەگرێت، سۆران نوێنەری ئیدارەكەیە لەنایاب، سەرۆكی یانەكە تیشك دەخاتە سەر ئەوەی، كە بەهەوڵ و كۆششی سەرپەرشتیاری ئیدارەی سەربەخۆی سۆران ئەوان توانیویانە جوڵەی وەرزشی خۆیان پەرە پێبدەن.
سدقی مەحموود، بۆ زاری كرمانجی گوتی:”وەرزش وەكو هەر بوارێكی تر بوژانەوەی بەخۆوە بینیوە، بەتایبەتیش خوێندنەوەی كاك هەڵگورد شێخ نەجیب وەكو سەرپەرشتیاری ئیدارەی سەربەخۆ بۆ وەرزش خوێندنەوەیەكی زانستیانە، كۆمەڵایەتی، ئینجا وەرزشی بووە. وەرزش وەكو خۆی لە تێگەیشتنی ئەودا هەیە، ئەمەش كاریگەری كردۆتە سەر پێشكەوتنی ئەم بوارە.”

سەرۆكی یانەی سۆران، روونتر دەدوێت:” وەك یانەی وەرزشی سۆران ئەتوانین بڵێین لەو ماوەیەی كە سۆران وەكو ئیدارەی سەربەخۆ ناسێنراوە پشتیوانییەكی مەزن بووە بۆ ئێمە تاكە سەرچاوەی ماددی و پشتیوانی بووە لەم دەڤەرە لەهەر كات و ساتێكدا لەدەرگای ئیدارەمان دابێ دەرگایان كراوەبووە بۆ ئێمە، هەمیشە بۆ داواكارییەكانی وەرزشوانان گوێی گرتووە. گومان لەوەدا نیە، كە لەو هەمو پڕۆژە بەرفراوانەی لەم سنورە جێبەجێدەكرێن كەرتی وەرزشی فەرامۆش نەكراوە و لە داهاتوشدا زیاتر بایەخی پێدەدرێت.
لەگەڵ هەموو ئەو پێشكەوتنانەش دیسان بە پێوست دەزانین داوای هاوكاری و پشتیوانی زیاتر لە ئیدارەی سەربەخۆ بكەین، چونكە لێرە لەم دەڤەرە توانایەكی لەڕادەبەدەری مرۆیی هەیە كە دەكرێت پشتیوانییان بۆ دابین بكرێت، بێگومان هەركات ئەم پشتیوانییە زیاتر بو ئەنجامی باشتری دەبێت.”
لەدرێژەی ئاخاوتنەكانیدا، سدقی داواكاری نوێی لەئیدارەی سەربەخۆی سۆران هەن و ئاماژە بۆ ئەوە دەكات:” خواستی ئێمە زیاترە دەكرێت بناخەی پڕۆژەی گەورەی وەرزشی لەم دەڤەرە دابنرێن، بە نموونە یاریگەی نێودەوڵەتی لەشێوەی زاخۆ، بونیاتنانی هۆڵێكی گەورەی وەرزشی كەزۆر پێویستە، دروستكردنی مەلەوانگەی ئۆڵۆمپی كە دەتوانرێت بەهۆیەوە گەشتیاری وەرزشی ڕابكێشرێت بۆ ئەم سنورە ئەویش بە پێدانی یاریگە و هۆڵ و مەلەوانگەكان بۆ مەبەستی یەكەی مەشق و ڕاهێنانیان(معسكر تدریبی). لەگەڵ ئەوانەشدا داوادەكەین كەموكوڕیەكانی یاریگەی یانەی وەرزشی سۆران چارەسەربكرێن كەخۆی لە دروستكردنی تڕاك و شوێنی دانیشتن دەبینێتەوە.”
لەدوایدا نیشانی ئەوەشی كرد:” نامەوێت ئەوەش لەبیربكەین كە توانیمان بە پشتیوانی ئیدارەی سەربەخۆ ئەكادیمیایەكی وەرزشی دروست بكەین كە باشترین هەنگاوبوو نامان بۆ دروستكردنی یاریزان لە دەڤەرەكەمان.”