پارێزەر لانە ئامانج
گێچەڵی سێكسی و ناشیرین و ناڕەوا بەرامبەر ئافرەت دەكرێت یەكێكە لە گرفتە كۆمەڵایەتییەكان و دیاردەیەكی بڵاوە، هۆكاری جیاجیای هەیە، بەبێ ئەوەی كە تا ئێستا چارەسەری ریشەیی هەبێت.
پێی داتاكانی ڕێكخراوی جیهانیی،٥٠٪ی ژنان ڕوو بە ڕووی گێچەڵی سێكسیی بوونەتەوە.
بە وتەی توێژەران لە هەرێمی كوردستانیش ڕێژەی گێچڵپێكردن ئەگەر لە ڕێژە جیهانییەكە زیاتر نەبێت، ئەوا كەمترنیە.
بەپێی رێككەوتنامەكانی مافی مرۆڤ و بەتایبەتیش ئەو پەیماننامانەی لە بارەی پارێزراوی ژنانەوە هاتون، گێچەڵی سێكسی بەیەكێك لە پێشێلكارییەكان بەرامبەر بەژنان و كچان دا نامۆنین
ئایا هۆكارەكانی چین؟
ئەگەر هۆكاری گێچەڵی سێكسی، نەخوێندەواری یە!؟
ئەی بۆچی مامۆستا، ئوستازی زانكۆ، پزیشك، رۆشنبیر، خوێندەوارەكان گێچەڵی سێكسی بەرامبەر ئافرەت دەكەن؟
ئەگەر هۆكاری گێچەڵی سێكسی هەژاری یە؟!
بۆچی، بازرگان، سەرمایەدار، خاوەن كۆمپانیا،هتد..، گێچەڵ بە بەرامبەرەكانیان دەكەن؟
ئەگەر هۆكاری گێچەڵی سێكسی، دواكەوتنی هاوسەرگیری یە، یاخود نەبونی توانایە بۆ هاوسەرگیری كردن لە تەمەنێكی گونجاودا؟!
ئەی بۆچی ئەوانەی هاوسەریان هەیە و منداڵیان هەیە، ئەوانەی خێزانیان هەیە، گێچەڵی سێكسی دەكەن؟
ئەگەر هۆكارەكە وەك دەگوترێ چەسپاندنی سێكسی یە و لە گەورەبوندا رەنگ دەداتەوە؟!
ئەی بۆچی هەرزەكار و منداڵی خوار 14 ساڵ گێچەڵی سێكسی دەكەن؟
ئەگەر هۆكارەكە دوركەوتنەوەیە لە ئایین؟!
ئەی بۆچی زانای ئایینی، كەسانی بڕوادار و موسوڵمان گێچەڵی سێكسی دەكەن؟!
ئەگەر هۆكارەكە پۆشاك پۆشینە و لەبەر كردنی جلوبەرگێكە كە جەستەی ژنی تێدا دەركەوێ؟!
ئەی بۆچی گێچەڵ بە ژنانی داپۆشراو و موحەجەبە و پەچەدار دەكرێت؟
ئەگەر هۆكار جەستەی ژن و بەژن و باڵا و لەشولاریەتی؟!
ئەی بۆچی گێچەڵ بە منداڵان دەكرێت؟ بۆچی گێچەڵ بە نێرینەكانیش دەكرێت؟
هۆكاری گێچەڵێ سێكسی هەموو ئەوانەیە و هیچكام لەوانەش نیە، بەڵكو كەموكوڕی یە لە پەروەردەی خێزان و پەروەردەی تاك و پێگەیاندنی منداڵ وەك مرۆڤ نەك وەك رەگەز مێ یان نێر.
ئەگەر بپرسین لە یاسادا چۆن باسی گێچەڵی سێكسی كراوە.؟
لە یاسای سزادانی عێراقی ژمارە/ ١١١ی ساڵی ١٩٦٩-دا، كە لە هەرێمی كوردستان-یش كاری پێدەكرێت، لە ماددەكانی (٤٠٠،٤٠١،٤٠٢)دا باسی گێچەڵی سێكسیی كراوە و سزا بۆ ئەنجامدەرانی دیارییكراوە، بەپێی یاساكەش “دەستبردن بۆ ژنێك یاخود قسەكردن یان ئیشارەتكردن بۆی، كە كار لە ئابڕووی بكات و لەسەری بكەوێت، بە گێچەڵی سێكسیی هەژمار دەكرێت”.
بەپێی یاساكە، ئەگەر كردەوەیەك بەرامبەر كەسێك ئەنجامدرا، كە كار لە ئابڕووی بكات، ئەوا ئەنجامدەری كردەوەكە بۆ ماوەی سێ مانگ سزادەدرێت، غەرامەكەشی لە ٢٠٠هەزار دینارەوە دەستپێدەكات تا ملیۆنێك دینار. ئەگەر هاتوو تاوانبار لەماوەی ساڵێكدا ئەم كارە دووبارە بكاتەوە، ئەوا سزاكەی دەبێت بە دوو هێندە”.
