مەهدی محەممەد – رواندز :
لوقمان حاجی ئیلیاس بە بێ پچڕان ماوەی 35 ساڵە لە نێو بازاری رواندز خواردنگەی گەس فرۆشی هەیە و یەكێكە لە خواردنگە كۆنەكانی ئەو شارە.
لە نێو خواردنگەكە تابلۆیەك هەڵواسراوە كە لێی نوسراوە (تكایە وێر نییە)، ئەو یاسایە ماوەی 22 ساڵە لەو خواردنگەیە پەیڕەو دەكرێت و بۆ هیچ كەسێك نییە پارە لە جیاتی یەكتر بدەن، لەمبارەیەوە لوقمان گەسفرۆش دەڵێ : “رواندز شارێكی بێ كارەو بەشی زۆری گەنجەكانیشی بەهەمان شێوەیە بێ كارن، بۆیە زۆرجار گەنجێك بۆ خواردنی گەسێك دەهاتە ئێرە كەچی پارەی چوار گەسی تری برادەرانی واسڵ دەكرد، ئەو جۆرە كارە بووەتە دیاردە لە نێو كۆمەڵگەی كوردەواری، بۆیە بڕیارم دا كە چیتر رێگە نەدەم كەس پارە لە جیاتی یەكتر بدات، ئەوە بوو تابلۆیەكم هەڵواسیی (تكایە وێر نییە)، سەرەتا سەخت بوو، بەڵام دواتر بووە شتێكی نۆرمال و 22 ساڵە ئەو یاسایە لە خواردنگەی ئێمەی پەیڕەو دەكرێت و كەسیش پێشێڵی نەكردووە، بەڵكوو بە پێچەوانەوە زۆر شوێنی تر هەیە هەمان یاسای لای ئێمە پەیڕەو دەكات.”
لوقمان گەسفرۆش جگە لە كاروكاسبی، یەكیك لە باشترین یاریزانەكانی تێنسی سەرمێز بووە لەسەر ئاستی باشووری كوردستان، ئەو ئێستا راهێنەری هەمان یارییە لە ناوەندی وەرزش و لاوانی رواندز و بە دەییان منداڵی شارەكە لەسەر دەستی ئەو فێری تێنس بوونە و لە خولەكانی كوردستان شوێن پەنجەیان دیاربووە، ئەو دەڵێ: “ساڵی 2005 تا 2015 یەكەمی سەر ئاستی كوردستان بووم لە تێنسی سەرمێز و لە چەندین پاڵەوانییەتیی ناوخۆ و لەسەر ئاستی هەردوو پارێزگای هەولێر و دەهۆك دەستكەوتی زۆر باشم بەدەستهێناوە.”
ركابەرەكانی لوقمان هەمیشە وتەی ئەو دووبارە دەكەنەوە كاتێ لەبەرامبەریدا شكست دەهێنن كە دەڵێگەر بە گۆچانیش بڕۆم لێ ناگەڕێم لێم ببەنەوە.
لوقمان حاجی ئیلیاس ی گەسفرۆش و وەرزشوانی دێرینی شار، لە وەرزی زستان و هاویندا تەنیا بە یەك قەمیس یان تیشێرتێك هاتوچۆ دەكات، ئەوەش بووەتە جێگەی سەرنجی هاوشارییان و هەمیشە لێ دەپرسن*لوقمان سەرمات نییە * لوقمان بە پێكەنینەوە دەڵێ: “پێكهاتەی جەستەم وایە ساردی زستان كاریگەری لەسەرم نابێ، بۆیە هەروەكوو چۆن بە هاوین بە تەنیا قەمیسێك دەگەڕێم، زستانانیش بە هەمان شێوە، لەو دوایانە لەبەر زۆری قسەی خەڵك هەندێ جار فانیلەیەكی بۆ زیاد دەكەم، هەر كاتێ گەیشتمە خواردنگە دایدەنێم.”
