سەرۆكی یانەی وەرزشی خەلیفان :ئەزموومێكی نوێ تاقیدەكەینەوە
سۆران سرێشمەیی ـ خەلیفان:
وەك ئاشكرایە لە كۆتاییەكانی ساڵی ڕابردوو دوای ماوەیەكی زۆر دووبارە وەرزشوانانی سنوری ناحیەی خەلیفان مۆڵەتی یانەی وەرزشیان بۆ گەڕایەوەو هەرزوو سەرۆك و ئەندام و ستافی راهێنەران دیاریكران، ئەم هەنگاوە بوو بە جێی دڵخۆشی وەرزشوان و هەوادارانی وەرزشی لەو ناوچەیە، دیارە یەكەم وێستگەشیان لەو وەرزە بەشداریكردنە لە خولی پلە دووەكانی كوردستان، كە تێیدا پەنجا یانە كێبڕكێ لەسەر پلەكانی پێشەوەی ریزبەندی ئەو خولە دەكەن و یانەی وەرزشی خەلیفانیش بۆ بەدیهاتنی خەونی چەند ساڵەیان بۆ یەكەمجارە بەشداری ئەو خولە دەكەن.
سەرۆك و راهێنەری یانەی وەرزشی خەلیفان، باس لە ئامادەكاری و ئامانجی یانە نوێیەكەیان و چۆنیەتی هەڵبژاردن و دیاری كردنی یاریزان و بەشداریكردنیان لە وەرزی نوێی خولی پلە دووەكانی كوردستان دەكەن.
سەیدۆ جەمال، سەرۆكی یانەی وەرزشی خەلیفان گوتی:”دوایی گەڕانەوەی یانەی وەرزشی خەلیفان، دەستمان كردووە بە ئامادەكاریەكان، بەتایبەت بۆ خولی پلە دووەكانی كوردستان، مەبەستمانە دوای ماوەیەكی زۆر دابڕان لە خول و پاڵەوانێتیەكان، بەشداربین بۆ ئەوەی ئەزموونێكی نوێ تاقیبكەینەوە، بۆ ئەم مەبەستە زیاتر لە دوو هەفتەیە دەستمان بە هەڵسەنگاندنی یاریزانان كردووە، بۆ ئەوەی یاریزانی لێهاتوو دیاری بكەین، هەوڵدەدەین بەشێكی زۆری یاریزانەكانی خەلیفان بەشداری پێبكەین هەروەها بەپێی پێویست لەدەرەوەی خەلیفان گرێبەست لەگەڵ یاریكەری پێویست ئەنجامدەدەین.”
ئاشكراشیكرد:” لە هەگبەماندایە كە دایە تیپی لاوان دروست بكەین بۆ ئەوەی ببێتە قوتابخانەی پێگەیاندنی یاریزانان بۆ ئایندەی ئەم یانەیە، لەبواری تۆپی بالەو بوارەكانی تری وەرزشی، هاوتەریب لەگەڵ ئەمە مەبەستمانە گرنگی بەهەموو سێكتەرەكانی تری وەرزشی بدەین، لە راستیدا ئامانجمان دروستكردنی بناخەیەكی بەهێزە بۆ ئەوەی یانەكە لەڕووی دارایی و سەرمایەیی مرۆیی بكەوێتە سەر پێی خۆی و بتوانێت لەداهاتوو بەشدارێكی كارا و چالاكی نێو پاڵەوانییەتیەكان بێت، گومانی تیدانیە ئەركێكی قورس لەسەر شانی ئێمەدایە، بەڵام هەوڵی ئێمە وەك ستافی یانەكە ئەوەیە كە بتوانین بە هاوكاری هەموو لایەك بزاڤی وەرزش لە ناحیەی خەلیفان بەرەو پێشەوە ببەین و ببین بە جێی دڵخوازی سەرجەم وەرزش دۆستان لەو ناوچەیە.”
لای خۆشیەوە گۆڤار خالید راهێنەری یانەی وەرزشی خەلیفان باس لە چۆنیەتی بەڕێوەچوونی ئامادەكارییەكان و هەڵبژاردنی یاریزانەكان دەكات و دەڵێت:”ئێمە وەكو دەستەی راهێنەران كە دەست نیشانكراوین، كۆمەڵێك ئامانجی گرنگمان هەیە، لەوانە دروستكردنی دروستكردنی تیمێكە كە تەژی بێت لە یاریزانی گەنج بۆ وەرزەكانی داهاتوو، هەروەها هەوڵدەدەین پشت بە توانای یاریزانانی دانیشتووی سنوری ناحیەی خەلیفان ببەستین تا بتوانرێت دۆخی وەرزشی لەو شارەدێیە پێشڤەچوونی زیاتر بەخۆوە ببینێت بە تایبەتیش وەرزشی تۆپی پێ، چونكە جگە لەوەی كە حەزێكی زۆر بۆ تۆپی پێ لای گەنجانی ئەو ناوچەیە هەیە، هەروەها ژمارەیەك یاریزانی ئاست بەرز لەو سنورە هەن، دەكرێ خەونی گەورە لەسەر ئاست و توانای ئەو یاریزانە گەنجانە هەڵبچنین بە مەرجێك پاڵپشتی ماددی و مەعنەوی هەبێت.”
ئەو ڕاهێنەرە ئاماژەی بەوەكرد:” ئیمە تا ئێستاش لە قۆناخی هەڵسەنگاندن و هەڵبژاردنی یاریزانەكانین، دوای ئەوە بە مەبەستی پێشكەشكردنی ئاستێكی باش خۆمان ئامادە دەكەین، ئەگەرچی دوای ماوەیەكی زۆر دابڕان لە خولی لەو جۆرە، بەڵام بە مۆڕاڵێكی بەرز دەچینە نێو ململانێ و كێبڕكێكان، بەو شێوەیە لەلایەك یاریزانەكان بەو خولە ئاشنا دەكەین لە لایەكی تریش، هەموو هەوڵی خۆمان دەخەین تا بتوانین ئەنجامێكی دڵخۆشكەر بۆ هەوادارانی وەرزش لە خەلیفان بەدەست بهێنین.”
