زاری كرمانجی – سۆران :
هەفتەی رابردوو بوومەلەرزەیەكی بەهێز هەردوو باكوور و رۆژئاواى كوردستان و توركیا و سووريا ى گرتەوە و بەپێی دواین ئامار زیاتر لە 30 هەزار كەس گیانیان لە دەستداوە و بە هەزاران هاووڵاتی تریش بریندار و چەندانی تریش تا ئێستا لە ژێر پاشماوەی باڵەخانە رووەخاوەكاندان و چاوەڕوانی رزگاركردنن.
چەقی بوومەلەرزەكە لە شارەكانی باكوور و رۆژئاوای كوردستان بوو، بۆیە بەشی زۆری قوربانییەكان كورد بوون.
دوای ئەو كارەساتە مرۆییە، حكوومەتی هەرێمی كوردستان و دەزگای خێرخوازی بارزانی وەك هەموو جارێك و خاوەنداریەتیی كردن لە كورد، ئامادەیی خۆی نیشاندا بە كۆمەك و هاوكاریكردن و بەهاناوەچوونی لێقەوماوان و رزگاركردنی ئەو كەسانەی لەژێر باڵەخانە رووخاوەكان گیریان خواردووە.
ئەنجوومەنی وەزیرانی هەرێمی كوردستان وێڕای دەربڕینی پرسە و هاوخەمی خۆی بۆ كەسوكاری قوربانیانی ئەو بوومەلەزەیە لە توركیا و سووریا و باكوور و رۆژئاوایی كوردستان، هاوكات بڕیاریدا كەمپینێكی بەرفراوانی گەیاندنی هاوكاری و كۆكردنەوەی كۆمەك بۆ زیانلێكەوتووانی كارەساتەكە رابگەیەنێت و پارێزگار و سەرپەرشتیاری ئیدارە سەربەخۆكان راسپێردران بۆ ئەم مەبەستە رێكاری پێویست بگرنەبەر.
هەوكات لەسەر راسپاردەی مەسروور بارزانی، سەرۆكوەزیرانی هەرێمی كوردستان، سێ تیمی فریاگوزاری كە پێكهاتبوون لە وەزارەتی ناوخۆ، وەزارەتی تەندروستی و دەزگایی خێرخوازی بارزانی رەوانەی توركیا كران، بۆ ئەوەی هاوكاری مرۆیی و فریاگوزاری پێشكەشی زیانلێكەوتووانی بوومەلەرزەكە بكەن.
هەر ئەو كات حكوومەتی هەرێمی كوردستان، لە راگەیاندراوێكدا رایگەیاند: حكوومەت بە ئەركی خۆی دەزانێت هاوكاری مرۆیی و فریاگوزاری پێشكەشی زیانلێكەوتووانی ڕووداو و كارەساتە سرووشتییەكانی وڵاتانی دراوسێ بكات، لە رۆژانی داهاتوودا هەنگاوەكانی هاوكاریكردنی زیانلێكەوتووان زیاتر دەبێت و ناوچەكانی سووریاش دەگرێتەوە.”
پشتیوانی حكوومەتی هەرێمی كوردستان و دەزگای خێرخوازی بارزانی و كاروانی ئۆتۆمبێلەكانی هاوكاری لە شەقامەكانی توركیا بە ئاڵای كوردستان و وێنەی بارزانی نەمر، كاردانەوەی زۆری بە دوای خۆیدا هێنا، بە تایبەت لە توڕە كۆمەڵایەتییەكان جگە لە كوردانی باكوور، هاووڵاتییانی توركیش پەسنی ئەو كارەی حكوومەتی هەرێمی كوردستان و دەزگای خێرخوازیی بارزانی یان كرد.
جومعە ئیچتەن ی پەرلەمانتاری تورك و ئەندامی پارتی ئایندە قسەیەكی ئەردۆغان بیر دەهێنێتەوە و بە تەنزەوە دەڵێ:« ئەوانەی بە تەما بووین شەوێك بەسەریان دابدەین، لە پڕێكا شەوێك بۆ فریاكەوتنمان هاتن».
يوتبهرێكى ناسراوى كوردى باكوور دهڵێ : دیمەنەكانی باوەش لێكدانی ئەندامانی تیمی فریاگوزاری بەرگری شارستانى كوردستان و توركیا دوای رزگاركردنی گیانی چەند كەسێك لە ژێر پاشماوەی باڵەخانە رووخاوەكان، زۆربەی شاشەكانی كەناڵەكانى توركیاى داگیركرد، ئەو شاشانەی نیشاندانی ئاڵای كوردستانی تێدا بڤەبوو، زۆربەی كات ئاڵای كوردستانی قۆڵی كارمەندانی فریاگوزاری هەرێمی كوردستان نیشاندەدا.
كوردانی باكوور و رۆژئاوای كوردستان بە گریانەوە سوپاسگوزاری خۆیان لە رێگەی تۆماری ڤیدیۆیی بۆ حكوومەتی هەرێمی كوردستان و دەزگای خێرخوازیی بارزانی دەنارد و باسیان لەوە دەكرد ئێوە خەمخۆر و دڵسۆزی كوردن.
هاوكات دوای ئەوەی یەپەگە رێگەی نەدا لە سنووری دەسەڵاتی ئەواندا هاوكاریی مرۆیی حكوومەتی هەرێمی كوردستان بڕوات بۆ زیانلێكەوتووانی بوومەلەرزە لە عەفرین، بۆیە بە ناچاری لە رێگەی دەروازەی سنووریی ئۆنجوپنارەوە لە كلیس سەر بە توركیا، لە دەروازەی سنووری بابوسەلامەوە لە سووریا چووە نێو عەزاز و دواتر ئەو 14 بارهەڵگرە كە خۆراك و پێداویستیی فریاگوزاریی سەرەتاییان هەڵگرتووە، گەیشتنە ناحیەی جندرێس سەر بە عەفرین ی كوردستان.
دوای ئەو هاوكارییە مرۆییە گەورەی حكوومەتی هەرێمی كوردستان، سەرۆك كۆماری توركیا سوپاسی سەرۆك بارزانی و هەرێمی كوردستانی كرد بۆ هاوخەمی و هاوسۆزییان لەگەڵ گەلی توركیا و خێزان و كەسوكاری قوربانیان و زیانلێكەوتووانی بوومەلەرزەكەی چەند ڕۆژی ڕابردووی توركیا.
