چوار مانگە یانەی سنوور لە ئامادەسازی بەردەوامە

تانیا سۆفی ـ سۆران:

لەپاڵ یانەكانی خەلیفان و چۆمان، یانەی سنوور سێیەمین نوێنەری ئیدارەی سەربەخۆی سۆرانە، چالاكترینی یانەكانە لەرووی كۆكردنەوەی تیم و ئەنجامدانی ئامادەسازی.
چوار مانگە نوێنەری قەزای سۆران، لە خولی یانە پلە دووەكانی كوردستان، ئامادەسازی دەكات و لەئێستاوە ئامادەییان بۆ خولەكە هەیە.
سنوور، هەفتانە یاریی دۆستانە ئەنجامدەدات دەیەوێت ئەمساڵ ئامانجەكەی بپێكێت. لەجامی كوردستان جەنگاوەرانی سنوور هەنگاوی گەورەیان ناوە و سەركەوتوون بۆ قۆناخی شازەی پاڵەوانێتییەكە.
سەرۆكی یانەی سنوور، وردەكاری ئامادەیی یانەكەی بۆ ركابەری خولی یانە پلە دووەكان دووپاتدەكاتەوە.
رەفیق ستوونی، بەزاری كرمانجی گووت: “ئامادەین بۆ بەشداری كردنی لەخولی یانە پلە دووەكانی كوردستان، بەڵام تا ئێستا هیچ یاریزانێكی پیشەگەرمان نەهێناوە، تیمەكەمان یاریزانەكانی سنووری ئیدارەی سۆران ـی لەخۆگرتووە و بەگوێرەی پێویستی هەوڵەدەین یاریزانی دەرەكی بگوازینەوە.”
باسی تیمی فوتساڵی یانەكە دەكات، كە لەساڵانی رابردوو خانمانی یانەكە دەسكەوتی گرنگیان هەبوو.
رەفیق دەڵێت، “و تا ئیستا خۆمان یەكلایی نەكردۆتەوە، كە بەشداری ركابەری فوتساڵی خانمان بكەین ئەگەر بڕیاریان دا بەشدار بین دەست بەئامادەكارییەكان، هەروەسا كاتی بەڕێوەچوونی خولەكەش دیاریی نەكراوە، لەداهاتوو بڕیار لەمەڕ ئەو پرسە دەدەین.”
نەبوونی داهاتێكی سەربەخۆ، هەنگاوەكانی یانەی سنوور ـی سست كردووە، هاوشێوەی یانەكانی دیكە لەلایەن سەرپەرشتیاری ئیدارەی سەربەخۆی سۆران ـەوە هاوكاری دەكرێن.
رەفیق ستونی ئەوەشی روونكردەوە: “مووچە و شایستە داراییەكانی تیمەكە لەلایەن ئیدارەی سەربەخۆی سۆران ـەوە دابیندەكرێن، ئامانجی گەورەمان هەیە و دەمانەوێ ئەمساڵ سەركەوین بۆ ریزی یانە پلە یەكەكان.”
رەفیق ستونی، جەخت لەوەش دەكاتەوە: “سنوور، جیاواز لەگەڵ هەموو یانەیەكانی ئەم دەڤەرە پشت بەزۆرترین یاریزانی ناوەخۆ دەبەستێت، هەوڵدەدەین یاریزانی نێوخۆیی پێبگەیێنین، كار لەسەر ئەوەش دەكەین ئەو بۆشاییانەی هەمانە بەیاریزانی پیشەگەر پڕكەینەوە”.
درێژەی پێدەدات: “بۆندی زیاتر لە 15 یاریزانمان نوێكردۆتەوە و، بۆ وەرزی نوێ سنورێكی جیاواز لە ساڵانی رابردوو دەبینن بە هاوكاری هەموو لایەك”.