دەزگای خێرخوازیی بارزانی داتای هاوکاریی بوومەلەرزەکەی تورکیا و سووریای بڵاو كردەوە

بەپێی ئەو داتایانەی دەزگای خێرخوازیی بارزانی لە راپۆرتێکیدا خستوویەتییە ڕوو، هاوکارییەکانی ئەو دەزگایە لە ماوەی ئەو چوار ڕۆژەدا، لە ئاستێکی بەرز و پێوانەییدا بووە، بە جۆرێک، بە چەند تیمێکی راهێنراو، هاوکارییەکانی پێشکەش بە لێقەوماوانی بوومەلەرزەکەی تورکیا کردووە.

هاوکارییەکانی دەزگای خێرخوازیی بارزانی، کە دەنگدانەوەی گەورەی لە ناوخۆیی تورکیادا دروست کردووە، لە ئاستێکدا بووە، کە جومعە ئیچتەن- ئەندامی پارتی ئایندەی داود ئۆغلو و ئەندامی پەرلەمانی تورکیا لە بازنەی دیاربەکر، لە تویتێکدا، کە وێنەیەکی بڵاو کردووەتەوە، کە لۆگۆی (دەزگای خێرخوازیی بارزانی)ی لەسەرە، دەڵێت: “لە پڕێکدا، شەوێک بۆ فریاکەوتنمان هاتن!”

قوربانییانی بوومەلەرزەکە

ئەمڕۆ هەینی، دوای چوار رۆژ لە روودانی بومەلەرزەکە لە باكوور و رۆژئاوای كوردستان لە توركیا و سووریا، بەپێی ئامارە فەرمییەکان، ژمارەی قوربانییەکانی ئەو بوومەلەرزەیە بەگشتی لە 100 هەزار کەس نزیك بووەتەوە.
لەمبارەوە، رەجەب تەیب ئەردۆغان، سەرکۆماری تورکیا، دوایین ئامارەکانی قوربانیانی بوومەلەرزەی وڵاتەکەی راگەیاند، کە تا ئێستا لە تورکیا و باکووری کوردستان 19 هەزار و 388 کەس بەهۆی بوومەلەرزەکە گیانیان لەدەستداوە و 77 هەزار و 711 کەس برینداربوون.

هەروەها دوێنێ شەو لەلایەن حكوومەتی سووریاوە، دوایین ئاماری قوربانییانی وڵاتەكە راگەیەندرا و ئاماژە بەوە كرا، كە زیاتر لە چوار هەزار كەس لە سووریا بەهۆی بوومەلەرزەوە گیانیان لەدەست داوە، زیاتر لە پێنج هەزار كەسیش بەم هۆیەوە بریندار بوون.

بەرەبەیانیی ڕۆژی دووشەممەی رابردوو، بوومەلەرزەیەك بە هێزی 7.7 بە پێوانەی رێختەر، باكووری كوردستان، رۆژئاوای كوردستان، توركیا و سووریای هەژاند، دوای چەند كاتژمێرێك، بوومەلەرزەیەكی دیكە بە هێزی 7.6 بە پێوەری رێختەر، ناوچەكەی هەژاندەوە، بەم هۆیەوە زیانێكی گەورەی گیانی و مادیی بە ناوچەكە گەیاند.

هەر لەدوای روودانی بوومەلەرزەکە، لەژێر رێنمایی مەسرور بارزانی، سەرۆکی حکوومەتی هەرێمی کوردستان و سەرۆکی دەستەی دامەزرێنەری دەزگای خێرخوازیی بارزانی، تیمەکانی رزگارکردنی دامەزراوەکە و کاروانەکانی فریاگوزاریی تەندروستیی حکوومەتی هەرێمی کوردستان، رۆژی دووشەممە، هەمان رۆژی بوومەلەرزەکە 6ی شوباتی 2023، بۆ یارمەتیدانی زیانلێکەوتووانی بوومەلەرزەکە بەرە و تورکیا بەڕێ کەوتن.

هاوکات، لەگەڵ تیمە تەندروستییەکان، تیمێکی راهێنراوی دەزگای خێرخوازیی بارزانی، لە بوارەکانی کاردانەوە فریاگوزارییەكاندا، کە بە هەموو پێداویستییە پزیشکییەکان تەیار کرابوون، بۆ هاوکاریکردنی زیانلێکەوتووانی بوومەلەرزە گەیشتنە تورکیا، کە کاروانی یەکەم پێکهاتبوو لە 15 ئۆتۆمبێل و 50 کارمەندی فریاگوزاری.

دەزگای خێرخوازیی بارزانی لە راپۆرتێکیدا تەواوی ئەو چالاکییانەی ئەو چەند رۆژەی تیمەکانی بە داتا خستووەتە ڕوو، بەشێوەیەک، ئەو تیمە پزیشکییەی کە رەوانەی تورکیایان کردووە، پێکهاتووە لە ستافی پزیشکی لە پسپۆڕییە جیاوازەکان و ئۆتۆمبێلی ئەمبوڵانس و پێداویستییە پزیشکییەکان لە داو و دەرمان، کە کاری رۆژانەیان بریتییە لە چارەسەرکردنی بریندارەکان و دابینکردنی دەرمان و پێداویستیی پزیشکی و گواستنەوەی بریندارەکان بۆ نەخۆشخانەکان بە ئەمبوڵانس.

هەروەها تیمێکی دیکەیشی ناردووە، کە کاریان دابەشکردن و رزگارکردن بووە، کە پێکهاتوون لە ستافی راهێنراوی دەزگا و هۆبەی هاوکارییەکان، کە راهێنانی پێویستیان لە بواری رزگارکردن و بەهاناوەچوون وەرگرتووە، کە ئەو تیمەیان پاڵپشتیی تیمی وەزارەتی ناوخۆی حکوومەتی هەرێمی کوردستانی کردووە لەو بوارە، هەروەها تیمی دابەشکردنی دەزگای خێرخوازیی بارزانی، کە کاری دابەشکردنی هاوکارییەکانە و بەردەوام لە شوێنی رووداوەکە ئامادەییان هەیە.

بەشێوەیەک تیمەكانی فریاگوزاریی دەزگای خێرخوازیی بارزانی لە رۆژانی 7 -8ی2ی2023 بەمجۆرە هەڵمەتی فریاگوزارییان ئەنجام داوە:

• لە شاری ئورفا 2 هەزار ژەمە خۆراكیان بەسەر زیانلێكەوتووانی بوومەلەرزەكاندا دابەش كردووە.
• لە نورداخ 5 هەزار بەتانییان دابەش كردووە.
• لە دیلۆک 426 کارتۆنی دەرمانیان پێشكەش كردووە.
• لە ئادیەمەن 2 هەزار ژەمە خۆراکیان دابەش كردووە.
• هەروەها هەزار سۆپای غاز و كارەبایی و 4 هەزار بەتانی و دۆشەك بە هاوكاریی كۆمپانیای كۆڕەك ئامادە كراوە، كە لە شارەكانی ئورفا و دیلۆك دابەش کراون، 10 بارهەڵگر ئاوی خواردنەوەش بە هاوكاریی كۆمپانیای UB ئەمادە كراوە، كە لە شارەكانی ئورفا و مەرەش دابەش دەكرێن.
• هەروەها بۆ ئەمڕۆ هەینی 10ی2ی2023، دەزگای خێرخوازیی بارزانی بڕێکی یەگجار زۆر هاوکارییەکانی بۆ دابەشکردن و پێشکەشکردنی بە لێقەوماوانی بوومەلەرزەکەی باکوور و رۆژئاوای کوردستان لە تورکیا و سووریا ئامادە کردووە، بەشێوەیەک، 14 بارهەڵگر لە زۆپا، کە لەلایەن مانگی سووری عێراقی- لقی هەولێر بەخشراوە و ئامادەیە بۆ دابەشکردن بەپێی پێویستیی شوێنەکان، لە تورکیا و سووریا، هەروەها دابینکردنی خواردنی گەرم لە ڕێگەی دوو چێشتخانەی گەڕۆک لە دیاربەکر و دابینکردنی خواردن لە ڕێگەی سێ بارهەڵگرەوە، کە کۆمپانیای ئاڵتونسا بەخشیویەتی، پێنچ بارهەڵگر ئاوی خواردنەوە، کە لەلایەن ئاوی سلێمانی بەخشراوە، هەروەها، هەزار و 114 بەتانی، 675 بالیف 100 زۆپا، دوو کارتۆن دژە باران، 350 پاکێج لە جلوبەرگ و 128 کارتۆن لە دەرمان بۆ تورکیا و 108 کارتۆنی دیکەش بۆ سووریا.

وابڕیارە ئەمڕۆ و رۆژانی داهاتوو، هاوکارییەکانی دەزگای خێرخوازیی بارزانی بگاتە هەموو ئەو شوێنانەی، بەهۆی بوومەلەرزەوە زیانیان بەر کەوتووە، هەر ئەمڕۆش بەپێی زانیارییەکانی (باسنیوز)، ئەو خزمەتگوزارییانەی کە ئامادەکراون، بەرەو رۆژئاوای کوردستان و سووریا سنووریان لەبەردەمدا کراوەتەوە.