محەمەد ئامۆكەیی – زاری كرمانجی:
دڵسۆز عەبدوڵڵا، راگەیاندكار و بێژەر و پێشكەشكار لە كەناڵی كوردستان تیڤی، بۆ زاری كرمانجی لاپەڕەی ژیانی خۆی هەڵدەداتەوە و دەڵێت:” لە دایكبووی شاری رانیەی دەروازەی راپەرینم، خاوەنی كچ و كوڕێكم بەناوی هێڤار و هەسێر هەمیشە لەپاڵ كارەكانم ئەركی دایكایەتیشم جێبەجێ كردووە، وێستگەی كاركردنم هەر لەم شارە جوانەوە سەرەتا لە رادیۆ و تەلەفزیۆنی ئازادی دەستم پێكرد، پاشان لەساڵی 2004 لە رادیۆ و تەلەفزیۆنی كوردستان دواتر ناوەكەی گۆڕا بۆ دەروازە وەك بێژەر و پێشكەشكاری چەندین بەرنامەی سیاسی، كۆمەڵایەتی، هونەری، بێژەری هەواڵەسیاسییەكان بۆ ماوەی هەشت ساڵ بەردەوام بووم، دواتر قۆناغێكی دیكەی كاركردنم لە تەلەفزیۆنی قەڵات بوو بۆ ماوەی 5 ساڵ پاشان لەساڵی2014 وەك بێژەر و پێشكەشكار لە كەناڵی ئاسمانی كوردستان تیڤی تا ئەمڕۆ بەردەوامم بێ دابڕان .
لەپاڵ كاری میدیایی، دڵسۆز وەك مامۆستای زمانی ئینگلیزی ماوەی 18ساڵە لەقوتابخانە وانە دەڵێتەوە و خزمەت بە پڕۆسەی پەروەردە و فێركردن دەكات، دووپاتی كردەوە، هەموو ئەو كارانەم بە پاڵپشتی و لەپاڵ هاوسەرەكەم بووە، كە خۆی نزیك بە بیست و حەوت ساڵە لەراگەیاندن كاردەكات .
جگە لەبەشداریم لەچەندین پانێڵ و سیمینارو كاری رێكخراویی و بواری ژینگە پارێزی بۆ خزمەتی قوتابییان و ئافرەتان ئەو جێگەیەی كەپێوویستی بەمن بووبێت هەوڵمداوە خزمەتێك بەكۆمەڵگە و دەوروبەرم بگەیەنم هەمیشە چاوم لەپێشكەوتنەكانی ئەم كوردستانەیە باوەڕم وایە كەدەبێ هەموو تاكێك بۆ خزمەتی كوردستان درێغی نەكات دواجار بگەین بەكەناری ئارامی”.
دڵسۆز عەبدوڵلا، لەبارەی رۆڵ و كاریگەری میدیای كوردی دەڵێت:” لەدونیای ئەمڕۆدا گۆڕانكاریەكان بەخێرایی ڕوودەدەن لێرەدا راگەیاندن لە هەرێمی كوردستان رۆڵ و كاریگەریی گۆڕاوە، چونكە زۆر هۆكار وادەكات متمانەی لای خەڵك لاوازتر بووە، هەروەها نەبوونی هۆشیاریی بەرپرسیارێتی لای بەشێكی زۆری میدیاكار دەبێتە هۆی ناڕوونی لەكاری میدیایدا دروستكردنی ناسەقامگیریی سیاسی، كێشەی كۆمەڵایەتی و پەروەردەیی دروستدەكەن، ئیتر لە چەندین ئاست و بەچەندین ئاڕاستە بنەماكانی كۆمەڵگەی تووشی لێكترازان كردووە، سۆشیال میدیا هەیە هەرچەند لەهەندێ رووەوە خزمەتی راگەیاندن و تاكی كوردیی كردووە، بەڵام لەچەند ڕوویەكەوە گورزی گەورەشی لە كەناڵەكانی میدیایی جەماوەریی وەشاندووە، بۆ نموونە ئەوە پلاتفۆرمەكانی سۆشیال میدیایە وەرگرێكی زۆری نێو كۆمەڵگەی بەلاڕێدا بردووە، بە بۆچوونی ئێمە دەبێ یاسا و رێسای دیارییكراو هەبێت بۆ كەناڵەكانی میدیا تا پابەندبن پێوەی، بێئەوەی ببێتە بەرتەسككردنەوەی ئازادییەكان، دەستەیەكی میدیایی هەبێت كە كەسانی خاوەن ئەزموونی میدیایی و ئەكادیمیی تایبەتمەند لەخۆبگرێت، بۆ رێكخستنی كاری میدیایی و چاودێرییكردنی كەناڵەكان، جگە لەوانەش گرنگە خوولی فێركردن و راهێنانی بەردەوام هەبێت لەناو دامەزراوە ئەكادیمییەكان بۆ رۆژنامەنووسان و میدیاكارانی سەرجەم كەناڵەكان بۆ زیاتر ئاشناكردنیان بە بەرپرسیاریەتی و ئیتیك و ئەركە میدیایی و نیشتمانییەكان”.
دڵسۆز، لەبەردەوامی قسەكانیدا باس لە ئامانج و رۆڵ و راگەیاندن دەكات و دەڵێ:” راگەیاندن دوو ڕۆڵ و ئامانجی سەرەكی هەیە یەكەم ڕۆڵی هۆشیاركردنەوە و رۆشنبیركردنی تاك ئامانج لێی بنیاتنانی تاك و دروستبوونی كۆمەڵگەیەكی هۆشیار و تەندروستە، كە پەنجە دەخاتە سەر تێكڕایی گیروگرفتەكانی كۆمەڵگە، بەدواداچوون بۆ ئەو كێشە و گیروگرفتانە دەكات كە بەرۆكی تاك بە تاكی كۆمەڵگە دەگرێت هۆكارەكانی سەرهەڵدان و زۆربوونی كێشەو گیروگرفت و تاوانەكان دەخاتە ڕوو بۆ لایەنی پەیوەندیدار، دواتر هەر لەرێگەی راگەیاندنەوە چارەسەریەكان بەشێوەیەكی زانستی پێشكەش دەكات .
دەشڵێت:” راگەیاندنی تەندروست دەبێت دەرمان بێت بۆ نەخۆشییەكانی كۆمەڵگە، بەم هۆیەوە وڵات بەرەو پێشەكەوتن و گەشەسەندن دەبات لەهەموو روویەكەوە، هەروەها هەوڵێكە بۆ تێگەیشتن بە شێوەیەكی تەندروست، بەڵام جۆری نــاتەندروست نەخۆشییە بۆ كۆمەڵگە، رێگرە لەبەرەو پێشچوون و گەشەسەندنی وڵات لە گشت سێكتەرەكان ئامانج لێی لەناوچوونی تاك و كۆمەڵگەیەكی ناتەندروست.
ئەو راگەیاندكارە تێبینی زۆریشی هەیە لەسەر بواری میدیایی لە هەرێمی كوردستان، وەك خۆی گووتی:” ڕگەیاندن لە هەر وڵاتێك چوارچێوەیەكی دیاریكراوی هەیە بەتایبەتی ئەو راگەیاندنانەی لە لایەن حكوومەتەوە رێگەپێدراون وا پێویست دەكات بایەخ بە پرسە نیشتمانییەكان بدات، بەڵام لە كوردستان بەشێكی زۆر لە میدیا لەجیاتی ئەوەی ببن بە پێگەیەك لە قسەی خێر و ڕاستی و دڵنیایی بوونەتە دەزگایێك لە دووبەرەكی بۆ تێكدانی كۆمەڵگە، ئەم سیاسەتەی ئەوان لە دەزگاكانیانەوە زیانی زۆری بە كۆمەڵگە و نیشتمانەكەمان گەیاندووە، لە پاڵ چاكسازییەكانی حكوومەتی هەرێمی كوردستان ئیدی كاتی ئەوەش هاتووە چاكسازی لە ڕاگەیاندن و ئەو كەناڵانەی كوردستان بكرێت و چیدی سنوورەكان واڵا نەكرێن بەجدی كار بۆ ئەوە بكرێت نەهێڵدرێت دەزگا میدیاییە فەرمی و نافەرمییەكان لە ژێر سایەی ئازادی و دیموكراسیدا پیرۆزییەكانی نیشتمان، جوانییەكان، مێژوو و فەرهەنگی كوردستان بشێوێنن.
