” هەر زەوییەك تاپۆی نەبێت رێگە نادەین بكرێتە خانوو”

پشتیوان كەریم – سۆران:

لە دیمانەیەكی هەفتەنامەی زاری كرمانجیدا، ئەندازیار سەلوا شۆڕۆ، سەرۆكی شارەوانی قەزای ناوەندی سۆران، باس لە پڕۆژە خزمەتگوزاریەكانی سنووری شارەوانی قەزاكە دەكات، هەروەها هۆكاری رێگەپێنەدانی هاووڵاتییان لە دروستكردنی خانوو ئاشكرا دەكات، پلان و پڕۆژەی ئەمساڵی شارەوانی سۆرانیش دەخاتەڕوو.
لە دەستپێكی قسەكانیدا، سەرۆكی شارەوانی قەزای ناوەندی سۆران، گوتی:” مۆڵەتدان بۆ دروستكردنی خانوو لە سنووری شارەوانی سۆران، پێشتر بە چەند جۆر و شێوازێك بووە، وەك موڵكەكانی تاپۆ، بڕیاری 804، نۆژەنكردنەوە، سنووری گوند، موڵكی كارت و بڕیارەكانی ئەنجوومەن بوونی هەبوو، كۆی ئەمانە لە ساڵانی رابردوو مۆڵەتیان پێدەدرا، بەڵام بەردەوام لەلایەن وەزیر و وەزارەت نوسراو هاتوون بەم هۆیەوە بەشێكیان راگیراون .
زیاتر گوتی:” لە ئێستادا هاووڵاتیان تەنها زەویە تاپۆكان دەتوانن خانووی لەسەر دروستبكەن، لەرابردوو نۆژەنكراوەكان و سنووری گوندەكان و ئەو زەویانەی كارتن سەرجەمیان وەستاون، هیچ كات مۆڵەت بۆ موڵكی بێ سەرەتا واتا تۆزوبا نادرێت كە بكرێتە خانوو، بەشێوەی گشتی تەنها ئەوەی مۆڵەتی پێدەدرێت موڵكە تاپۆكانن.
دووپاتی كردەوە:” جاری واهەیە موڵكە تاپۆكانیش، گرفتیان هەیە، چونكە نەخشەكان كۆنن پێویستییان بەڕاستكردنەوەیە هەیە كە لەگەڵ دۆخی ئێستا بگونجێن، بە تایبەتی نەخشەی 22 كە چەندین ساڵە گرفتی هەیە، بۆئەم پرسەش، هەڵگۆرد شێخ نەجیب سەرپەرشتیاری ئیدارەی سەربەخۆی سۆران، لەسەر هێڵە و بەدڵنیاییەوە بەدواداچوونی تەواو بۆ دەكرێت، لە ئایندەیەكی نزیكدا گرفتەكە چارەسەر دەبێت “.
سەرۆكی شارەوانی سۆران، ئاماژەشی بەوەدا:” تا ئێستا نزیكەی پێنج هەزار، داواكاری پێشكەش بە شارەوانی كراوە بە مەبەستی مامەڵە كردن و دروست كردنی خانوو لە زەوی سندوقی، هۆكاری سەرەكی كەمی رێژەی داوكاری بۆ ئەم مامەڵەیە، بەهۆی رێنمای ئەو خاڵانەیە كە دیاریكراون، ئەمەش رەنگە بە دڵی هاووڵاتییان نەبێت، یەكێك لە خاڵەكانیش هاتووە، ئەو هاوڵاتییانەی سوودمەندن كە خاوەنی زەویەكەیە، دەبێت لە حكوومەتیش بكڕێتەوە و دواتر سوودمەند دەبێت، هەروەها لیژنەی لاوەكی لە شارەوانی سەرپەرشتی كارەكە دەكات و موڵكەكانیش لە رووی نرخ شوێنیشەوە بە پێی شوێنەكان جیاوازیان هەیە و دەگۆڕێت.
ئەندازیار سەلوا شۆڕۆ، دەڵێت:” تاپۆكردنی خانوو وەك پێویست نییە، ئەمەش بۆ چەند هۆكارێك دەگەڕێتەوە، دیارترینیان هاووڵاتی رای لەو نرخە نییە كە بۆ تۆماركردن و تاپۆكردنەكە دیاری كراوە، بۆیە هاووڵاتییان كەم داوای تاپۆكردنی موڵكەكەیان دەكەن، هەروەها ژمارەیەكیش لەوانەی كە داوایان ئاڕاستەی شارەوانی كردبوو، بەشێك لە مانە كەشفیان بۆ كراوە، بەڵام بە هۆی ناتەواوی نەخشەكانەوە نەتوانراوە تاپۆیان پێبدرێت، زیاتر لە 4600 هاوڵاتی داواكاری داوە بۆ تاپۆكردن، لەو رێژەیە 1100 داواكاری كەشفی بۆ كراوە، 153 داوكاری تاپۆ پێوستی بە راستكردنەوەی رووبەر هەیە، 947یان پێویستی بە راستكردنەوەی نەخشە هەیە، كۆی ئەمانە گرفتن، بەڵام بە گشتی نرخی زۆری تاپۆكردن هۆكارێكە بۆ كەمی داوكار.
سەبارەت بە پرسی سەوزایی لە سۆان، ئەندازیار سەلوا شۆڕۆ، هێمای بۆ ئەوەكرد:” رێژەی سەوزایی لە ماستەر پلان و لە راستی جیاوازیان هەیە، ئەو رێژەیەی لە ماستەر پلان هەیە جیاوازە لەوەی كە لە راستیدا هەیە، چونكە پێشتر بەشێكی زۆری زێدەڕۆی كراوەتە سەر ئەو شوێنانەی كە بۆ سەوزایی دیاری كرابوو بۆیە وەك پێویست نەماوە، ئەوەی كە ماوە پلان مان هەیە بەكاری بهێنین بۆ ئەوەی سوودی لێ ببینین و بەزووترین كاتیش كاری لەسەر دەكەین، چاوەڕوانی وەبەرهێنین لە داهاتوویەكی نزیك دا دەست پێدەكرێت بەدڵنیاییەوە رێژەی سەوزایی لە سۆران باشتر دەكەین”.
سەرۆكی شارەوانی سۆران، ئاشكراشی كرد:” ساڵانی رابردوو حكوومەت لە سۆران موڵكی بە توێژەكان داوە و كەسانی شایستەش لێی سودمەندبوونە، وەك شارەوانی سۆران كار لەسەر ئەم بابەتە دەكەین و هەوڵ دەدەین لە داهاتوودا، موڵك هەم بە فەرمانبەران، هەمیش بەو كەسانەی پێویست و شایستەن بدەین و دابەش بكەین.
لە بارەی رێگە پێدانی خانوو لە سنووری گوندەكانی وەك دێڵزیان و بادلیان پلانی داهاتوویان، سەرۆك شارەوانی سۆران، ئەوەی خستەڕوو:” تا ئێستا مۆڵەتییان پێدراوە، بەڵام گەر موڵكێك لەدەرەوەی سنووری گوند بێت رێگە پێنادرێت خانوو دروست بكات، بەڵكو دەخرێتە قاڵبی زەویە بەتاڵەكانی دیكە، هەر رێنمایەك بۆ ئەو زەویانە دەربچێ ئەو شوێنانەش دەگرێتەوە، هەروەها پلانمان زۆرە بۆ ئەم ساڵ وەك شارەوانی سۆران هەم لەرووی پڕۆژە هەم لە رووی جوانكردنی سیمای شارو خزمەتگوزاری، لە هەموو روویێكەوە هەوڵی رژد دەدەین .
لە كۆتایی قسەكانیدا، ئەندازیار سەلوا شۆڕۆ، گوتیشی:” لە پلانمان دایە ئەمساڵ پڕۆژەی شەقامە ناوخۆیەكانی چەند گەڕەكێك و شەقامی 30مەتری لە سۆران جێبەجێ بكەین، لە قۆناغی یەكەم لە نەخشەی 25 و شەقامە ناوخۆیەكانی هەمان نەخشە، شەقامە ناوخۆییەكانی نەخشەی 22 دەستپێدەكەین، كە ئەم نەخشەیە زۆر گرنگە و لەو رێگەیەوە گرفتێكی زۆر چارەسەر دەكرێت، ئەمەش لەپلانی ئێمەدایە، هاوكات دروستكردنی پاركێكی سەوزایی لە گەڕەكی شەهیدانی بەختیاری و چەندین پلان و بەرنامەی دیكە، بەڵام پلانی گەورە هەیە لە داهاتوو بۆ دروستكردنی ئۆڤەر پاس و ئەندەر پاس تائێستا شوێنەكەمان دیار نییە، لەپلانمان دایە، داوا ئاراستەی هاوشاریان دەكەم پێیان رادەگەیێنم بە هەموو شێوەیەك هاوكار دەبم و ساڵانی داهاتوو دوای جێ بەجێ كردنی پلانەكانمان با خەڵك ئەوكات بڕیار لەسەریان بدات”.