محیەدین بادلی
ئەو عەقلیەتە سیاسی و مەزهەبییەی كە ئەمڕۆ جلەوی حوكمڕانی عێراقی بەدەستەوەیە، وەكو هەمان دەستەڵاتەكانی ڕابردوو، ناتوانن بوونی كورد و حكوومەتداریی و پێشكەوتنەكان قەبول بكەن، هەر وەكو بینیمان ئەو هەنگاوە دوژمنكاریانەی لە ڕابردوودا ڕوویانداوەو لە ئێستاشدا پەیڕەوی دەكەن، بە دەركردنی كۆمەڵێك بڕیار و نانەوەی ئاستەنگی دارایی دژ بە هەرێمی كوردستان، كە وەك و گوشارێك لە ڕێگای دادگاوە بە یاسایی دەكەن و پاڵەپەستۆ دەخەنە سەر كوردستان، بە مەبەستی ئەوەی ناچاری بكەن بڕواتە ژێر باڵ و بڕیارەكانی بەغداو خۆبەدەستەوەدانی هەرێمی كوردستان لە تەواوی بوارەكانەوە.
ئەوەش بە یارمەتی ئەجێندای نەخشە بۆكێشراوی دەرەكی و هاوكاری و چاوساغی بەشێك لە حیزب و كەسایەتییە ناوخۆیەكانی كورد، گەرەكیانە هەنگاو لەدوای هەنگاو، قەوارەی هەرێم سنووربەند بكەن و بیكەنەوە بە باكووری عێراقی جاران! چونكە لە بنچینەوە عەرەب باوەڕی بە فیدراڵی و دیموكراسی و شەراكەت و فرەدەستەڵاتی و فرە پێكهاتەیی نەبووە و نییە.
ئەوەی ڕێگا خۆشكەرەو بواری بۆ ئەوان ڕەخساندووە، قۆستنەوەی ئەو ناكۆكی و گرژیانەیە كە ماوەیەكە كەوتوونەتە نێوان كۆی هێزە سیاسییەكانی كوردستان، بەتایبەتی پارتی و یەكێتی، كە دەرگای ئاوەڵاكردووە بۆ هاتنەژوورەوی نەیارانمان.
ئەوەی تێبینی دەكرێت و لەسەر ئەرزی واقیع دەبینرێت، پارتی دیموكراتی كوردستان نیازی چارەسەركردنی كێشە ناوخۆیەكانی هەیە و هەستی بە مەترسی و لێكەوتەكانی ئەو دووری و لێكترازانەی لایەنە كوردستانیەكان كردووە، بە تەنگ ئەوەیە كە دەرچەو ڕێگەچارەیەك بۆ ئەو بارگرژیە بدۆزێتەوە، تاكو پەرلەمانێكی كاراو حكوومەتێكی بەهێزمان هەبێت، بۆ بەرگریكردن لە مافە دەستووریی و یاساییەكانی هەرێم، بەڵام یەكێتی نیشتمانی بە كشانەوەی لە حكوومەت و پەكخستنی پەرلەمان و پێداگیریكردن لەسەر هەندێك بابەتی بچووك و تایبەت بە دەستەڵاتی دادوەریی، دۆخی دامەزراوەیی هەرێمی بەرەو نەرێنی و قەیرانی سیاسی بردووە.
ئەو سەنگەرگرتنەی یەكێتی لە حكوومەتی هەرێم، كە خۆیان بەشێكی گرنگن تێیدا، هاوتەریبە لەگەڵ ئەجێنداو ویستی نەیارانمان، هەروەها زیانگەیاندنە بە یەكڕیزی نێوماڵی كورد و قۆڵتركردنەوەی قەیرانەكانە، لە كۆتاییدا جەماوەر و شەقام باجەكەی ئەدەن و تێیدا زیانمەند دەبن.
لە ئێستادا دوو ڕێگە چارە لەبەردەم دەستەڵاتی كوردستاندایە، پێویستە كاریان لەسەر بكرێت و بەهەند وەربگیرێن، یەكەمیان، دووركەوتنەوەی سەركردایەتی كورد لە پەیوەندییە كەسییەكان و بەڵێن و ڕێككەوتنی زارەكی، كاركردن و چەسپاندن و پراكتیزەكردنی ئەو فیدراڵیەی كە لە دەستووری عێراقیدا چەسپێندراوەو بەتەواوی پایەو دەستەڵاتە فیدراڵییەكان كاریان پێ بكرێت و تەواوی مافە دەستوورییەكانی هەرێم بخرێنە قالبی یاسایی و ڕێسایی، تاكو بۆ هەر هەنگاوێكی هەرێم لە بوارەكانی سیاسی و ئابووریەوە پاڵپشتێكی ڕوونی یاسایی و بڕگەیی دەستووریمان بە دەستەوە بێت…
دووەم، هەنگاونان و دیتنەوەی چارەسەر بۆ قەیرانەكانی دارایی و كۆكردنەوەی داهاتی پێویست، بۆ دابینكردنی لایەنی خۆشگوزەرانی و فەراهەمكردنی بژێو و پێویستییەكانی ژیانی ڕۆژانەی هاووڵاتییان و سوكتركردنی باری ئەو قەیرانە داراییەی كە دەمێكە لە ڕووی ناوەخۆیی دا تێیكەوتووینە…
ئەوانەش تەنها لە ڕێگای حكوومەتێكی دامەزراوەیی و بەهێزەوە چارەسەر دەكرێت، كە هەموو حیزبەكان ئیرادەیەكی كوردانە و دڵسۆزانە بێننەكار و دووركەونەوە لە ململانێ و سەنگەر لە یەكترگرتن و دەست تێكەڵكردنی ژێربەژێری حیزبی لەگەڵ بەغدا، بۆ یەكتر شكاندن و لاوازكردنی حكوومەتی هەرێمی كوردستان. دەكرێت نەیاریی بەشێك لە هێزە نەتەوەپەرستەكانی عێراق و لاساری دادگای باڵای عێراق و بڕینی بەشە بوودجەو قوتی خەڵك ببنە پەندێك تاكو كورد لۆژیكانەتر و خوێندنەوەی وردترو ژیرانەتری بۆ دۆخەكە هەبێت و لە خەوی خۆخۆری بە ئاگابێنەوە و دەستبەرداری بەشێك لە بەرژەوەندییە كەسیی و حزبیەكانیان ببن، تاكو بتوانرێت ڕووبەڕوی پیلان و كایەمەترسیدارەكان ببینەوە و هەرێمەكەشمان پارێزراوتر و پێشكەوتووتر بێت.
