بەرپرسی ناوەندی باڵای مێرگەسۆر: گەنجانی مێرگەسۆر كێشە و گرفتیان هەیە

شەهلا سۆفی – زاری كرمانجی :

لە جیهان یەكێك لەو توێژەی گرنگییەكی زۆری پێ دەدرێت لاوانن كە یەكێكن لە پێكهێنەرەكانی كۆمەڵگە و دوا ڕۆژی میللەتن.
لە دیدارێكی تایبەت لە بەرنامەی هیوا، ڕادیۆی زاری كرمانجی لەسەر پرسی لاوان و كێشە و كەموكوڕییەكانی ناوەندی لاوانی مێرگەسۆر میوانداری (فەرسەت ساڵح دۆلەمەری) بەرپرسی ناوەندی باڵای مێرگەسۆری كرد.
دۆلەمەری لە دەستپێكی قسەكانیدا باسی ناوەندی لاوانی كردو گوتی: “ئێمە وەك یەكێتی لاوانی دیموكراتی كوردستان لە سنووری قەزای مێرگەسۆر كە ناوەندی باڵای مێرگەسۆر لەخۆ دەگرێت و شەش ناوەندی چالاكیمان هەیە :(ناوەندی چالاكی شێروان مەزن، ناوەندی چالاكی پیران، سنوور، گۆڕەتوو، مەزنێ و ناوەندی چالاكی قەلەندەر).
بەرپرسی ناوەندی باڵای مێرگەسۆر باس لە كارو چالاكییەكانی ناوەندەكەیان دەكات لە دەڤەرەكەدا و دەڵێ:”كار و چالاكییەكانی ئێمە وەك ناوەندی باڵا لە ماوەی ڕابردوودا، كردنەوەی دوو خولی پێگەیاندنی كادیران لە ساڵی (2019و2002) لەژێر چاودێری نووسینگەی مەلا مستەفا بارزانی و بە سەرپەرشتی مەكتەبی سكرتاریەت، خولی یەكەم بە وتەیەكی بارزانی نەمر كە دەڵێت: (پێویستە لەگەڵ سەردەم بڕۆین و دوا نەكەوین). بۆیە پێویستە منداڵەكانمان بە فیكرەی تازە و عەقڵێكی نوێ پەروەردە بكەین.
ئەم خولانەمان كردەوە بۆ پەرەپێدان و ڕۆشنبیركردن و گەشەپێدانی هزری لاوان لەدەڤەرەكە، خولەكان لەلایەن كەسانی حزبی و مامۆستایانی ئەكادیمی زانكۆ و ئەندامانی پەرلەمان بەڕێوە دەچوون و ژمارەی بەشداربووانی هەر دوو خولەكە (70) گەنج بوون كە خۆشبەختانە كاتێك ئەو گەنجانە لە زانكۆ و كۆلێژەكان وەرگیران بەشێكیان توانیان لەسەر ئاستی هەرێمی كوردستان پلەی یەكەم بەدەست بهێنن.
ئەو خولانە چەندین تەوەری لە خۆ گرتبوو وەك: گوێگرتن لە سیمینار، پرسیار و وەڵام و ڕاگۆڕینەوە لەنێوان مامۆستا و بەشداربوو، وتاربێژی، تاقیكردنەوە و توێژینەوەكان لە كۆتایی خولدا لە پێشانگایەكی تایبەت خرانە ڕوو.
لە وەڵامی پرسیاری ئەوەی كە تا چەند توانیویانە بەهرە و توانای ئەو گەنجە بەهرەمەندانە بەگەڕ بخەن و یارمەتییان بدەن؟ بەرپرسی ناوەدی باڵای مێرگەسۆر گوتی: ژمارەیەكی زۆری گەنجانی دەڤەرەكە بەهرەی جیاوازیان هەیە، بەڵام بەداخەوە بەهۆی نەبوونی توانای ماددی و سەختی ناوچەكە چونكە شوێنێكی شاخاوییە نەمانتوانیوە وەك پێویست یارمەتیدەریان ببین و خزمەتیان بكەین، ئێمە كەموكوڕی زۆرمان هەیە و داواكاریمان زۆرە تا بتوانین پاڵپشتی ئەو گەنجانە بكەین، بۆ نموونە هۆڵێكی كۆبوونەوەمان نییە بۆ پیشاندانی تواناكانی ئەو لاوانە، هەر چەندە سەرەڕای هەوڵەكانمان بڕیارە ئەم هەفتەیەش دووبارە نووسراومان دەبێت بۆ لایەنی پەیوەندیدار بۆ دروستكردنی یاریگایەكی یانزە كەسی كە تا ئێستا دروست نەكراوە، هەر چەندە لە ساڵی 2009 بڕیار درا بە دروستكردنی یاریگایەك لە ناحیەی مەزنێ، بەڵام بە هەر هۆكارێك ئەو گوژمەیەی بۆی تەرخان كرابوو بۆ شوێنێكی تر خەرج كرا، كە یاریگایەك نەبێت چۆن بتوانین یانەیەكی وەرزشی پێك بهێنین بۆ ئەو گەنجانەی توانایان هەیە و خۆیان لە وەرزشدا دەبیننەوە، زیاتر گوتی: سەرەڕای هەبوونی دامەزراوە و ڕێكخراوی حیزبی و حكومی لە سنووری قەزای مێرگەسۆر و هەبوونی پەیوەندی كەسی، بەڵام نەبوونی توانای ماددی ڕێگر بووە لە خزمەت كردن بە توێژی لاوان، بۆ نموونە بەهۆی ئەوەی كە بەرپرسی وەرزش و لاوان ( ئەمیر سەلیم )كە لە ئێستادا بووەتە بەڕێوەبەری كانزاكان لە ئیدارەی سۆران بۆشایی دروست بووە، هەروەها سەنتەری ڕۆشنبیری و وەرزش كە ئەوانیش بە هەمان شێوە نە توانای ماددی نە شوێنییان هەیە بەڵام لەگەڵ هەموو ئەم گرفتانەدا بەردەوام لە پەیوەندی داین و چالاكیمان هەیە.
لە كۆتایی قسەكانیدا فەرسەت ساڵح بەرپرسی ناوەندی باڵای مێرگەسۆر ئاماژەی بەوە كرد:”بڕیارە لەم ساڵدا كۆنگرەی (لاوان، قوتابییان و ئافرەتان) ببەسترێت بە جیا و بەرنامە و پرۆگرامەكانمان بەپێی پەیڕەوی كۆنگرە دەچێتە پێش وە دیسان داواكارین لەلایەنە پەیوەندیدارەكان (هۆڵی كۆبوونەوە، یانەی وەرزشی، پاركێكی گەشتیاری) پێویستییەكی گرنگی دەڤەرەكەمانن وە سوپاسی نووسینگەی ڕێزدار مەلا مستەفا بارزانی دەكەین كە لەسەر هێڵە لەگەڵمان بۆ برەودان بەتوانای لاوان و خزمەتكردنیان.”