نووسینی : كرێكار قادر ڕوستایی
بەشی : یەكەم
ئەوەی دەیبینین كە لەڕێگەی سۆشیال میدیا و بڵاوكراوە و وێب سایت…هتد ڕیكلام و كڕین فرۆشتن بۆ كاڵاو بەرهەمی دەرمانی گیایی دەكرێت، بابەتێكی زۆر هەستیارە و دەبێ لایەنی پەیوەندار ئاگاداری بن.
خەڵكانێك كڕین و فرۆشتن دەكەن، بەناوی چارەسەری سروشتی بەدەرمانی گیایی، پسپۆڕنین و شارەزانین لەبواری چارەسەر بە دەرمانی گیایی، تەنها بۆ پارە پەیدا كردن و بازرگانی كردن بەخەڵكی هەموو كارێكی نایاسایی و ناتەندروست ئەنجام دەدەن.
ئەوەندەی من بەدواداچوونم كردووە و لەنزیكەوە ئاگاداری بووم، بەشێك لەو خەڵكانەی دووكانی عەتاریان هەیە یان شوێنێكیان كردۆتەوە بەناو گیادەرمانی، هەندێ گژو گیا تێكەڵ دەكەن و دەیكەنە ناو قوتو یان كەپسول یان بەشێوازێكی تەڕ تێكەڵەیەك ئامادە دەكەن، بەناوی چارەسەری سروشتی بۆ دابەزاندنی كێش، قەڵەوكردنی جەستە و دەم وچاو، گەورەكردن و بچوكردنەوەی سمت و ڕان و سنگ، شەكرە، لاوازی جنسی، نەزۆكی لەپیاوان و ئافرەتاندا هتد…
دواتر لەڕێگەی سۆشیال میدیاوە، پڕو پاگندە و ڕیكلامی بۆ دەكەن، بەناوی چارەسەری سروشتیەوە بەپارەیەكی زۆر دەیفرۆشن بەخەڵكی.
كارەساتەكە لێرەوە دەستپێدەكات، هەندێ لە عەتارەكان و غەیری عەتارەكانیش لەژێر ناوی چارەسەركاری سروشتی و شارەزا لەبواری دەرمانی گیانی، هاتوون تێكەڵەی گژو گیای پزیشكی خۆیان بە شێوەیەكی هەڕەمەكی ئامادە دەكەن!
دوور لەبنەمای زانستی، كە لە ڕووی ڕێژەی گژوگیاكانەوە لە تێكەڵەكەدا ئەگەر لێی نەزانێت و شارەزای گرتنەوە و ئامادەكردنیان نەبێت، كارەسات دروست ئەبێت. بەهۆی نەزانینی ئەو ماددە چالاك و ناكاریگەرانەی كە لە گیاكاندا هەیە، ئەم تێكەڵە مەترسیدار و ژەهرە، دەبێتە هۆی تێكچوونی تەندروستی ئەو كەسەی بەكاری دێنێت و دەیخوات، چونكە كاریگەری زۆر خراپی دەبێت بۆ گورچیلەكانی، جگەری، سپڵی، پەنكریاسی، كۆڵۆنی، گەدەی، ڕەنگە ئەندامێكی لەدەست بدات، یا ژەهراوی ببێت بیكوژێت یا تووشی ژێرپەنجەی بكات!
بۆیە ئەوانەی پسپۆڕ و شارەزانین لەبواری چارەسەری بە گژو گیای پزیشكی، یان ئەو كەسانەی بۆ پارە پەیداكردن دەستیان كردوە بەو كارە لەدواوەی شاشەی لاپتۆپ و مۆبایل تێكەڵە و گیراوەی گژو گیای ناتەندروست دەفرۆشن بەخەڵكی، تەندروستی خەڵكی دەخەنە مەترسی و زۆر جاریش كەسانێك بەهۆی بەكارهێنانی ئەو جۆرە دەرمانە گیاییانەوە مردوون.
میكانیزمی كاركردن بە گژو گیایی پزیشكی، پێویستە ئەو كەسە، بەتەواوەتی لەبوارە خوێندبێتی و خول و ڕاهێنانی كردبێت و پسپۆڕ و شارەزایی تەواوی هەبێت، لەبواری چارەسەر بە گژو گیای پزیشكی، چونكە هەندێ كەس لەڕێگەی چەند خولێك لەو بوارەدا یان لای كەسێك كاری كردووە دواتر هاتووە دەستی كردووە بە خوێندنەوەی لەڕێگەی پەرتوك و ئەنترنێت و سەیركردنی ڤیدیۆ هەندێ زانیاری وەرگرتووە، دووكان و شوێنێكی داناوە لەژێر ناونیشانی چارەسەری نەخۆشی بە گژو گیای پزیشكی. بۆیە پێویستە لەژێر دەرمانە گیاییە هاوردەكان تۆمار بكرێن و مۆڵەتیان پێ بدرێت، لەلایەن حكومەت و لایەنە پەیوەندیدارەكانی لێژنەی تەندروستی.
تێبینی // هیچ بەرهەم و دەرمانێكی گیایی مەكڕن، كە لەڕێگەی سۆشیال میدیاوە دەفرۆشرێت یان ئەو كەسەی كەنایناسیت، نازانیت كێیە، تا دوای ئەوەی پشتڕاستی دەكەنەوە ئایا پسپۆڕ و شارەزایە لەبواری دەرمانی گیایی، یان دەبێت دەرمانی گیایی بەفلتەری كوالێتی كۆنتڕۆڵەوە داخل كرابێت و ستیكەری وەزارەتی تەندروستی لەسەربێ بۆ دڵنیابوون لەوەی دەرمانەكە قاچاغ و نامۆ نیە.
ئەو خەڵكانەی پسپۆڕ و شارەزای بواری دەرمانی گیایین، گیراوە و تێكەڵەكانیان، بەكەپسول یان بەقوتو یان بەهەر جۆرێك بێت، دەبێ لەلایەن حكومەت و وەزارەتی تەندروستی ڕێگەیان پێ بدرێت و یاسایەك بەو بوارە دەربچێت، بۆ ڕێكخستنەوە و دروستكردن و بەرهەم هێنانی دەرمانی گیایی. دەبێ بە فلتەری لێژنەی فەرمی تەندروستی حكومەت تێپەڕبێ و هەڵسەنگاندنی زانستی بۆ بكرێت، وە دەبێ حكومەت لەڕێگەی لێژنەكانی تەندروستی چاودێری وردی شوێنی فرۆشتنی دەرمانی گیایی بكات. ئەگەرنا بەشێكی هەرە زۆری دەرمانی گیانی كەدروستی دەكەن و بەرهەم دێت ناتەندروستە، چونكە بۆ پارە خەڵكانێك دەستیان داوەتە ئەم بوارە كەزۆریش هەستیارە، هەموو كەسێك پسپۆڕ و شارەزا نیە، تابتوانێ گیراوە و تێكەڵە ئامادە بكات بیدات بەنەخۆش، ئەو كات ژیانی ئەو خەڵكانە دەكەوێتە مەترسیەوە كەبەشێوازێكی زانستی و تەندروست بەرهەم نەیەت.
