ئ/ گولستان بەهجەت
لە سەر رێگەی سەرەكی هاملتۆن و چەند مەترێك لەو بەری پردی ناوكێلان، كار بۆ بنیادنانی مۆزەخانەیەك دەكرێت كە پەیوەندار دەبێت بە شۆڕشی ئەیلول.
هونەر كاك ئەحمەد، لە بارەی بیرۆكەی ئەم پڕۆژە كلتووری و مێژووییە گووتی ” لە ساڵی 2019 مۆنۆمێنتی وەفایەك بۆ ئەیلول بنیاتنرا، دوای هاتنی جەنابی سەرۆك بارزانی لە هەمان ساڵدا بۆ شوێنی مۆنۆمێنتەكە كە پردی بنكێلانە بیرۆكەی گۆڕینی شوێنەكەمان لا دروستبوو لە مۆنۆمێنتەوە بۆ مۆزەخانە ، مەبەستیشمان نیشاندانی مێژوو لە ڕێی ئەو كەل و پەل و بابەتانەی لەوێ نمایش دەكرێن بە ئامانجی زیندوو هێشتەنەوەی مێژووی شۆڕش و ئاشناكردنی بە گەشتیاران و نەوەی تازە پێگەیشتوو”.
هونەر كاك ئەحمەد، لە بارەی پێشواوی هاووڵاتییان بۆ هێنانی كەل و پەلەكانی تایبەت بە شۆڕشی ئەیلول بە زاری كرمانجی گووت ” خەڵكێكی زۆر پەیوەندیان پێوەكردوین بۆ هێنانی هەبووەكانیان لە جۆری ( كەل و پەلی سەربازی، كۆمەڵایەتی، پەروەردەیی و تەندروستی، وێنە و دەستنووس)، بەڵام تا ئێستا هیچمان لە كەس وەرنەگرتووە لەبەر ئامادەنەبوونی شوێنەكە”.
زیاتر روونیكردەوە ” چەندین كاری هەماهەنگیمان هەبووە لەگەڵ دەزگا ڕاگەیاندنەكان لە كارە دیكۆمێنتارییەكانی داستان و ڕووداوە گرنگەكان بە ڤیدیۆ، فۆتۆ، تۆماركردنی چیرۆك و سەربوردەی ژیانی پێشمەرگایەتی كۆمەڵێك پێشمەرگەی ئەیلولمان كار لەسەر كردووەو بەردەوامیشین” .
بەرپرسی رێكخراوی نەوەكانی ئەیلول لە بارەی پێشوازی بەرپرسان لەم مۆزەخانەیە ئاماژەی بەوەدا ” ڕێزدار كاك نێچیرڤان بارزانی دەسپێشخەری كرد لە پشتیوانی كردن بۆ جێبەجێكردنی قۆناغی یەكەمی مۆزەخانەكە، كە خۆی دەبینێتەوە لە ئۆفیسی ڕێكخراو و بەشێكی مۆزەخانە ، بەڵام بە دڵنیاییەوە گەشبینین لە پشتیوانی و پێشوازی تەواوی بەرپرسان و لایەنە پەیوەندارەكان بۆ سەرخستنی ئەم بیرۆكەو پڕۆژەیە، چونكە لای هەمووان دیارە شۆڕشی ئەیلول یەكەم و گەورەترین بنەمای هێنانەكایەی ئەم حكومەتەیە كە ئێستا بەشێكی زۆر لە كوڕ و نەوەكانی كارەكتەرەكانی شۆڕش تێیدا حكومڕانی دەكەن، ئەوەی ئێستا لەبەرچاوانەو جێبەجێ كراوە ڕێژەیەكی كەمە لەو پلان و كارنامەیەی هەمانە، بەدڵنیاییەوە لە پردی بنكێلان تەواوی مێژووی شۆڕشی ئەیلوول نیشان دەدرێت”.
پلانتان هەیە قوتابیان سەردانی ئەم شوێنە بكەن و زانیاریان پێ بدەن لە وەڵامدا هونەر ئەحمەد گووتی ” لە ماوەكانی ڕابردوو قوتابی و مامۆستایانی ناوەندەكانی خوێندنی ئامادەیی و خوێندنی باڵا لە شوێنی جیاوازەكانی كوردستان سەردانیان كردووین ، لەم ڕووەوە ئێمەش تەواوی ئاسانكاری دەكەین بۆ ڕێكخستنی گەشتی زانستی چونكە ئەم سەردانانە لەكارە لەپێشینەكانمانن” .
لە كۆتایی قسەكانیدا هونەر كاك ئەحمەد، بەرپرسی مۆنۆمێنتەكە گووتی ” گرنگی دان بە بنكەو بارەگاكانی شۆڕشی مەزنی ئەیلوول لە ڕێگای گەیاندنی خزمەتگوزاری بۆیان هەروەها ناساندن و پاراستنیان و دووبارە دروستكردنەوەی ئەو بنكەو بارەگایانەی بەهۆكاری جیا لەناوچوونە یان خاپوورن، لە پلانی سەرەكیماندایە” .
