” توانیومە هاوكاری چەندین كەسی وەك خۆم بكەم “
بەیان یوسف – زاری كرمانجی:
سەركۆ رەحیم هاووڵاتییەكی دانیشتووی پاریزگەی هەڵەبجەیە، لە رووداوێكدا هەردوو قاچی لەدەستداوە، بەڵام بە ئومێدەوە لە ژیان دەڕوانێ و خاوەنی چەندین بەهرەیە و بووەتە فریاد ڕەسی كەسانی دیكەی خاوەن پێداویستی تایبەت، لە دیدارێكی زاری كرمانجیدا زانیاری زیاتر دەخاتەڕوو .
لە دەستپێكی قسەكانیدا، سەركۆ رەحیم، بە زاری كرمانجی گووت:” لە منداڵییەوە بەشێوەیەكی ئاسایی چوومەتە باخچەی ساوایان و دواتر قوتابخانە لە پۆلی چواری بنەڕەتی تووشی رووداوی هاتووچۆ بووم، هەمیشە حەزم بە یاریكردن كردووە و بەتایبەت یاری تۆپی پێ، بەڵام لە رووداوێكدا هەردوو قاچم لە دەستدا .
دووپاتی كردەوە:” بۆ ماوەی دوو مانگ كەوتمە سەرجێگا، دووای نەشتەرگەری قاچەكانیان لێ بڕیمەوە، كە زانیم هەردوو قاچم نەماون تووشی ناڕەحەتییەك بووم كە بە هیچ شێوەیەك وەسف ناكرێ، وا هەستم كرد لە دوونیایە تەنها خۆم قاچم نییە و كاریگەری زۆری لەسەر ژیانم دروست كرد”.
سەركۆ، وێڕای لەدەستدانی قاچەكانی، بەڵام هێشتا ئومێدی زۆری بۆ ژیان هەیە و گووتی:” دووای نەشتەرگەرییەك و بینینی حاڵەتی زۆر لەخۆم خراپتر، وای لێ كردم ئومێدم بۆ ژیان بگەڕێتەوە و بیرۆكەی ئەوەم لا دروست بوو، ببمە فریادڕەسی ئەو منداڵانەی لە رووداوێكدا تووشی لە دەستدانی ئەندامێكی جەستەیان هاتوون یا ئیفلیجی مێشكیان هەیە.”
دەشڵێت:” دوای ئەوەی چوومە وەڵاتی ئوردن لەوێ فێری زمانی ئینگلیزی و عەرەبی بووم، هەر لە ماڵەوە دەستم كرد بە دامەزراندنی سەنتەرێك بۆ كوردانی ئۆردن و بە هاوكاری هاوڕێیەكم لەوێ زیاتر لە 100 منداڵی كوردمان فێری نووسین و زمانی عەرەبی و ئینگلیزی كرد، دواتر ڕووم لە ویلایەتە یەكگرتووەكانی ئەمریكا كرد، ساڵی 2008 گەڕاومەتەوە كوردستان”.
لە كۆتایی دیدارەكە، سەركۆ رەحیم، گووتیشی:” بە مەبەسەتی خزمەتگەیاندن بە خاوەن پێداویستییە تایبەتییەكان دەستم كردووە بە هاوكاری كردن لە رێگەی رێكخراوێكی نێودەوڵەتی، هەروەها لە ساڵی 2017 رێكخراوێكم بەناوی ( بەرەو ژیانێكی نوێ) دامەزراند، بە هاوكاری خێرخوازان بەردەوامین و لەو رێگەیەدا عارەبانە بۆ ئیفلیج بووانی مێشك دابین دەكەین، هەروەها دەست و قاچی دەستكردیان بۆ دروست دەكەین، دوو ئۆفیسیشمان هەیە یەكێك لە پارێزگای هەولێر بۆ ئەو خاوەن پێداویستە تایبەتانەی كە لە دەورووبەری هەولێر و دهۆك كەركوك و شوێنەكانی دیكە، هەروەها ئۆفیسی دیكەمان لە شاری هەڵەبجەیە، پەیوەستە بەو منداڵ و هاووڵاتییانەی كە لە دورو پشتی هەڵەبجە و شارەزور و سلێمەنی تاد… پێویستیان بەهاوكاری ئێمەیە”.
